Read nande Abalawĩ 21 Bible Online

Abalawĩ 21 - nande bible

Abalawĩ 21

¹Kandi Omwami Mukulu mwabũga na Musa ati, Ubwire abahererĩ, abana ba Harũnĩ, uti, Sihabye oyũkayĩtsandaya busana nʼekĩnda omo katĩkatĩ kʼabandu buwe;

²kyamabya kite busana nʼekĩtũnga kiwe, ekiri hakũhĩ naye, busana na nyĩnya, na tata wuwe, na busana na mugala wuwe, na busana namwali wuwe, na busana na mugala wabo,

³na busana na mwali wabo, omumbesa oyuli hakũhĩ naye, oyũtahĩkĩbwe; anganayĩtsandya busana naye.

⁴Syasyeyĩtsandaya ngʼoyũhĩkĩrye omo katĩkatĩ kʼabandu buwe, nʼerĩyĩtsandya atya.

⁵Sĩbayĩhĩre ko luhala omo mutwe kutse erĩsĩsa esyonũnga syʼesyonderũ syabo, kutse eriyisakanga oko mibiri yabo.

⁶Basyabya babũyĩrĩre uku Nyamuhanga wabo, nʼerĩtĩndatsandya erĩna lya Nyamuhanga wabo; kusangwa bakahera amahere oko Mwami Mukulu awakokĩbawa oko muliro, obundu bwa Nyamuhanga wabo; busana nʼekyo basyabya babũyĩrĩre.

⁷Sĩbasyĩmaya omũkalĩ mũtetĩ, oyũtsandĩre; kutse ĩsĩbĩmaya omũkalĩ oyuliahigawa nʼĩba wuwe; kusangwa omũhererĩ abũyĩrĩre uku Nyamuhanga wuwe.

⁸Busana nʼekyo wasyamuhigula, kusangwa akaherera akalyo ka Nyamuhanga wawe; asyabya mũbũyĩrĩre ukʼuwe; kusangwa ĩngye Mwami Mukulu, oyukabahigula, nyĩbũyĩrĩre.

⁹Nʼomwali wʼomũhererĩ wahi amayĩtsandya omo luteto, akahemula tata wuwe; asyahĩsĩbwa omo muliro.

¹⁰Nʼoyuli mũhererĩ mukulu omo katĩkatĩ kʼabagala babo, oyo gũtũlĩrawa kwʼamagũta oko mutwe, nʼoyukasololawa busana nʼeriambala esyongimba esĩ, siendisyambula omutwe wuwe, kutse eritulanga esyongimba siwe;

¹¹kutse siendisyasegera ahali ekĩnda, kutse erĩyĩtsandya busana nʼĩse wuwe, kutse busana na nyĩnya wuwe;

¹²kutse sĩalũe ahʼerĩĩkala habũyĩrĩre, kutse erĩtsandya ahʼerĩĩkala habũyĩrĩre ha Nyamuhanga wuwe; kusangwa erihigula lyʼamagũta wʼerĩhakabya lya Nyamuhanga wuwe limuliko. Ĩngye indi Mwami Mukulu.

¹³Naye asyĩmya omũkalĩ omo bumbesa buwe.

¹⁴Ĩsyĩmaya omũkwakalĩ, kutse oyuliahigawa, kutse omũkalĩ mutya-mutya omũtetĩ, nĩkwa asyahĩkya omumbesa wʼekĩtũnga kyabo.

¹⁵Ĩsĩatsandaya abana buwe omo kĩtũnga kiwe; kusangwa ĩngye indi Mwami Mukulu oyukamusolola.

¹⁶Neryo Omwami Mukulu mwabũga na Musa ati,

¹⁷Ubwire Harũnĩ, uti, Sihabye omundu wʼoko bana bawe omo syondengo syabo syosĩ oyuli kʼobulema, kandi sĩahĩke hakũhĩ eriherera akalyo ka Nyamuhanga wuwe.

¹⁸Kusangwa omundu oyuli nʼobulema sĩahĩke hakũhĩ; endĩmatĩme, kutse oyukahinira, kutse oyuwite obũsũ obuli kʼobulema, kutse ekĩtsũko ekiri kʼobulema,

¹⁹kutse omundu ũtwĩkĩre ko kisando, kutse ebyala bĩbũnĩkĩre,

²⁰kutse wʼomugongo akondomĩre, kutse omũkũhĩ, kutse owʼerĩsongo, kutse wʼobuhere, kutse omunyora, kutse oyũbũnĩkĩre kwʼemihege.

²¹Sihabye omundu wʼabana ba Harũnĩ omũhererĩ, oyuwite obulema oyũkahĩka hakũhĩ nʼeriherera amahere awakokĩbawa oko muliro wʼOmwami Mukulu; kusangwa awite obulema, ĩsĩahĩka hakũhĩ eriherera akalyo ka Nyamuhanga wuwe.

²²Anganalya akalyo ka Nyamuhanga wuwe, oko kabũyĩrĩre kutsibu, nʼoko kabũyĩrĩre.

²³Nĩkwa isyingira enyũma wʼolukimba olũkasũkũlĩraya, kutse erĩhĩka hakũhĩ nʼekiherero, kusangwa alehemĩre; akasyatsandya ahabũyĩrĩre hage. Kusangwa indi Mwami Mukulu oyukahigulabo.

²⁴Neryo Musa mwabũga atya na Harũnĩ, nʼoko bagala buwe, nʼoko bandu bosĩ ba Ĩsraelĩ.