Read nande Abalawĩ 22 Bible Online

Abalawĩ 22 - nande bible

Abalawĩ 22

¹Neryo Omwami Mukulu mwabũga na Musa ati,

²Ubwire Harũnĩ nʼabagala buwe, bayigegene oko bindu bĩbũyĩrĩre byʼabandu ba Ĩsraelĩ, ebyo bakahigula busana nage, bakasyatsandya erĩna lyage lĩbũyĩrĩre. Ĩngye indi Mwami Mukulu.

³Ubwirebo uti, Omundu oyuli omo bana benyũ bosĩ omo syondengo syenyũ syosĩ oyo wasyahĩka hakũhĩ nʼebindu bĩbũyĩrĩre, ebyo abandu ba Ĩsraelĩ bakahigulira Omwami Mukulu, naye anatsandĩre, omundu oyo asyalũsĩbwa embere syage. Ĩngye indi Mwami Mukulu.

⁴Nʼomundu wʼoko bana ba Harũnĩ amabya muhaga, kutse akwĩre ekinyaro; iye siendisyalya oko bindu bĩbũyĩrĩre, erĩhĩka oko mugulu asyera. Nʼoyũkatũla oko kĩndũkĩ ekĩtsandĩre busana nʼekĩnda, kutse omundu oyũkatogaya obũhalya buwe,

⁵kutse mundu wahi oyũkatũla oko kindu ekikakululuka, ekikamuyira mo mũtsandĩrya, kutse oyũkasĩgalirako obũtsandĩrya bwʼomundu, nʼomo bwangabya bũtsandĩrya bwahi ali nabo;

⁶omundu oyũkatũla oko kindu ngʼekyo, asyabya mũtsandĩrya erĩhĩka omwʼĩgolo-golo, isiangalya oko bindu bĩbũyĩrĩre, ate akosa omubiri wuwe omo magetsi.

⁷Nʼomugulu eryuba lyamabirenga asyera; nʼenyũma wʼaho asyalya oko bindu bĩbũyĩrĩre; kusangwa ni kalyo kuwe.

⁸Eyikayiholera, kutse eyiriatulawa nʼesyonyama, isialyayo erĩyĩtsandya muyo. Ĩngye indi Mwami Mukulu.

⁹Neryo basyateya erihana lyage, bakasyaheka ebibi busana nabyo, ibahola mubyo kusangwa bamanyĩhalyako. Ĩngye indi Mwami Mukulu oyukahigulabo.

¹⁰Owʼehandi siasyerya oko lũsũnzo lũbũyĩrĩre; omubunga wʼomũhererĩ kutse omũhĩngĩ isibalya oko kindu kĩbũyĩrĩre.

¹¹Nĩkwa omũhererĩ amagula omundu, oko syofranka, omundu oyo asyalya kukyo; nʼabakabutawa omo nyũmba yiwe, nabo basyalya oko kalyo kuwe.

¹²Nʼomwali wʼomũhererĩ amahĩkĩbwa nʼowʼehandĩ, siasyerya oko buhere bwʼerisumba obwʼesyonzũnzo sĩbũyĩrĩre.

¹³Nĩkwa omwali wʼomũhererĩ amabya mũkwakalĩ kutse amahigwa isiawite mwana, amasũbĩbwa omo nyũmba yʼĩse wuwe, ngʼomugulu gʼobumbesa buwe, naye asyalya oko kalyo ka tata wuwe; nĩkwa isihabya owʼehandi oyo wasyalya kuko.

¹⁴Omundu amalya oko lũsũnzo lũbũyĩrĩre atasĩ, asyatomeka kulo kwʼekiguma kyʼomo bitanu, neryo asyaha olũsũnzo lũbũyĩrĩre oko mũhererĩ.

¹⁵Sĩbasyetsandaya esyonzũnzo sĩbũyĩrĩre syʼabandu ba Ĩsraelĩ, esyo bakaherera Omwami Mukulu,

¹⁶kikaleka ibaheka ebibi ebikaleta erisuyirwa busana nʼolubanza omugulu bakalya esyonzũnzo sĩbũyĩrĩre syabo; kusangwa indi Mwami Mukulu oyukabahigula.

¹⁷Neryo Omwami Mukulu mwabũga na Musa, ati,

¹⁸Ubwire Harũnĩ, nʼabagala buwe, nʼabandu bosĩ ba Ĩsraelĩ, uti, Omundundi oyuli wʼenyũmba ya Ĩsraelĩ, kutse ababunga bʼomo Ĩsraelĩ, oyukaleta obuhere buwe, bwamabya ĩlahĩrya lyabo lyahi, kutse amahere wabo wʼerĩyĩsũnza ago bakaletera Omwami Mukulu busana nʼobuhere bwʼerĩokererya;

¹⁹imwatoka erĩrĩgwa, bwasyabya enume eyite ko bulema, enume yʼende nʼeyʼembũlĩ, nʼeyʼembene.

²⁰Nĩkwa esyosĩ esiri kwʼamalema isimwaherasyo kusangwa sĩbwendĩsyalĩgwa busana nenyũ.

²¹Nʼomundundi oyukaherera Omwami Mukulu amatolere wʼamahere wʼobuholo erĩhĩkania erĩlahĩrya, kutse obuhere bwʼerĩyĩsũnza, omo nde kutse omo mbũlĩ, bwasyabya ĩbũhĩkene ndeke busana nʼerĩrĩgwa; isihabya bulema kusyo.

²²Endĩmatĩme, kutse ekĩbũnĩkĩre, kutse ekirema, kutse esĩkwĩre ekironda, kutse obuhere, kutse olukerere, simusyehera esĩ oko Mwami Mukulu, kutse eriyira obuhere omo muliro musyo busana nʼOmwami Mukulu oko kiherero.

²³Kandi enume yʼende kutse ekyana kyʼembũlĩ ekiri kʼobulema kutse ekindu ekĩbondĩre oko mubiri wakyo, esyo mwanganaherasyo busana nʼobuhere bwʼerĩyĩsũnza; nĩkwa sĩyendĩrĩgwa busana nʼerĩlahĩrya.

²⁴Eyiwite emihege eyihutere, kutse eyĩtũtĩrye, kutse eyĩbũnĩkĩre, kutse eyĩkonĩre, simusyeherasyo oko Mwami Mukulu; kutse erihongasyo mutya omo kihugo kyenyũ.

²⁵Kutse sĩmũsyĩmaya oko sĩkalũa omo byala byʼowʼehandi erihereraryo mo kalyo ka Nyamuhanga wenyũ; kusangwa eritsanda lyasyo liri musyo, siri kʼobulema; sĩsyendĩsyalĩgwa busana nenyũ.

²⁶Neryo Omwami Mukulu mwabũga na Musa ati,

²⁷Omugulu enume yʼende, kutse embũlĩ kutse embene, eyikabutawa, yasyabya uku nyĩnya wayo ebiro birinda; nʼerĩtsũka oko kiro kyʼomunani yasyalĩgwa busana nʼerikerwa mo buhere erĩokĩbwa oko muliro oko Mwami Mukulu.

²⁸Kandi yamabya ende kutse etsugutsi, simusyekerayo nʼekyana kyayo esyosĩ esĩbĩrĩ ekiro kiguma.

²⁹Kandi omugulu mukatolera Omwami Mukulu amatolere wʼewasĩngya, mwasyahongago imwatoka erĩrĩgwa,

³⁰Yasyalibwa ekiro ekyo kisa-kisa; ĩsĩmwasĩganaya kuyo ko nʼakake erĩhĩka engyakya. Ĩngye indi Mwami Mukulu.

³¹Busana nʼekyo mwasyateya ebihano byage, nʼerikolabyo. Ĩngye indi Mwami Mukulu.

³²Kandi ĩsĩmwatsandaya erĩna lyage lĩbũyĩrĩre; nĩkwa nasyahigulwa omo katĩkatĩ kʼabandu ba Ĩsraelĩ. Ĩngye indi Mwami Mukulu oyukabahigula,

³³oyo wabalũsaya omo kihugo kyʼeMĩsĩrĩ, eribya Nyamuhanga wenyũ. Ĩngye indi Mwami Mukulu.