Read nande Abalawĩ 23 Bible Online

Abalawĩ 23 - nande bible

Abalawĩ 23

¹NʼOmwami Mukulu mwabũga na Musa, ati,

²Ubwire abana ba Ĩsraelĩ, uti, Ebiro bikulu byʼOmwami Mukulu, ebyo mwasyatũlago eribya mahĩndano abuyĩrĩre, Ebĩ ni biro bikulu byage ebyahwĩrwe.

³Omũbĩrĩ asyakolwa ebiro ndatu; nĩkwa oko kiro kyʼakalinda ni Sabato yʼeriluhuka ndeke; nĩ ʼhĩndana lĩbũyĩrĩre. Susyekola omũbĩrĩ nʼomuke; ni Sabato oko Mwami Mukulu aho mwĩkere ehosĩ.

⁴Ebĩ ni biro bikulu byʼOmwami Mukulu ebyahwĩrwe, wa nʼamahĩndano abũyĩrĩre, ago mwasyatũlaganĩa omo mugulu wago awahamulawa.

⁵Oko mukera wʼerĩtsũka, oko kiro kyʼerĩkũmĩ nʼebini kyʼomukera omwʼĩgolo-golo, ni ʼkiruka lyʼOmwami Mukulu.

⁶Nʼoko kiro kyʼerĩkũmĩ nʼebitanu byʼomukera oyo musamusa ni kiro kikulu kyʼOmwami Mukulu ekyʼobundu bute mo kĩhamya; oko biro birinda mwasyalya oko bundu bute mo kĩhamya.

⁷Oko kiro kyʼerĩtsũka mwasyayira erĩhĩndana erĩbũyĩrĩre; simusyekola omũbĩrĩ akalĩre nʼomuke.

⁸Mwasyaherera Omwami Mukulu obuhere obwʼerĩokererya omo muliro ebiro birinda Oko kiro kyʼebirinda nĩ ʼhĩndana lĩbũyĩrĩre; simusyekola omũbĩrĩ akalĩre nʼomuke.

⁹Neryo Omwami Mukulu mwabwira Musa ati,

¹⁰Ũbũge nʼabana ba Ĩsraelĩ, ubwirebo uti, Omugulu mwasyahĩka omo kihugo ekyo ngabaha, mukagesa eriera lyakyo, neryo mwasyaletera omũhererĩ omuganda wʼobuyilula bwʼerĩerya lyenyũ.

¹¹Neryo asyahũnga-hũngya omuganda oyo embere syʼOmwami Mukulu, ĩnĩalĩgwa busana nenyũ; engyakya enyũma wʼeSabato omũhererĩ asyahũngahũngyago.

¹²Nʼoko kiro ekyo mwasyahũnga-hũngya omuganda oyo, mwasyaherera akabangale kʼomwaka muguma akate ko bulema busana nʼobuhere bwʼerĩokererya oko Mwami Mukulu.

¹³Nʼobuhere bwʼeyĩsyano yʼengano yabo, bwasyabya ebihande bibiri byʼomwʼĩkũmĩ byʼekitiri kyʼeyĩsyano yʼenzelele eyĩtũlũngene nʼamagũta, ni buhere oko Mwami Mukulu obukakolawa omo muliro busana nʼekikumbo ekĩsĩhĩre; nʼobuhere bwʼerĩpũlya bwabo bwasyabya bwʼebĩnyũ, ekihande kiguma kyʼomo bini kyʼetsũpa yʼebĩnyũ.

¹⁴Kandi Simusyerya obundu, kutse engano eyĩkotsĩrye, kutse omũsĩsa, erĩhĩka oko kiro ekĩ kisa-kisa, erĩhĩka aho mwasyaletera erĩhĩtya lya Nyamuhanga wenyũ. Oyũ asyabya mugambo wa kera na kera omo syondengo syenyũ eyo mwĩkere ehosĩ.

¹⁵Neryo mwasyayiganzira esyo Sabato sirinda esibererere, erĩtsũka engyakya enyũma wʼeSabato, nʼerĩtsũka ekiro mwaleta omuganda wʼobuhere bwʼerĩhũnga-hũngya,

¹⁶erĩhĩka engyakya wʼeSabato yʼakalinda mwasyaganza ebiro makũmĩ atanu; mukandisyaha Omwami Mukulu obuhere buhya-buhya bwʼengano.

¹⁷Mwasyahũlũkya aho mwĩkere amandu abiri wʼerĩhũnga-hũngya wʼebihanda bibiri byʼomwʼĩkũmĩ byʼekitiri; asyabya wʼeyĩsyano yʼenzelele asyokĩbwa haguma nʼekĩhamya, busana nʼamayilula oko Mwami Mukulu.

¹⁸Neryo haguma nʼamandu ayo, mwasyaleta ebyana byʼembũlĩ birinda ebyʼomwaka muguma ebite ko bulema, nʼenume yʼende, nʼesyombangale ĩbĩrĩ; byasyabya obuhere bwʼerĩokererya oko Mwami Mukulu, haguma nʼobuhere bwasyo bwʼeyĩsyano yʼengano, nʼamahere wasyo wʼerĩpũlya, bo nʼobuhere obũkokĩbawa oko muliro, obwʼerikumba lĩsĩhĩre oko Mwami Mukulu.

¹⁹Kandi mwasyaherera embaya nguma busana nʼobuhere bwʼebibi nʼehibangale hibiri hyʼomwaka muguma busana nʼeriherera amahere wʼobuholo.

²⁰Nʼomũhererĩ asyahũnga-hũngyago haguma nʼamandu wʼamayilula busana nʼobuhere bwʼerĩhũnga-hũngya embere syʼOmwami Mukulu, haguma nʼehyana hibiri hyʼembũlĩ; hyasyabya hĩbũyĩrĩre oko Mwami Mukulu busana nʼomũhererĩ.

²¹Nenyũ mwasyatũlaganĩa engulu eyo ekiro ekyo kisa-kisa; hasyabya erĩhĩndana lyʼendeko lĩbũyĩrĩre busana nenyũ. Simusyekola mũbĩrĩ akalĩre nʼomuke. Ni kihano kya kera na kera aho mwĩkere ehosĩ omo syondengo syenyũ syosĩ.

²²Nʼomugulu mukagesa erigesa lyʼekitaka kyenyũ kandi simusyegesa esyongonde syʼeririma lyawe, kutse susyesubira amahũmbĩra wʼerigesa lyawe; wasyasĩgĩrabyo abera, nʼabʼehandi. Ĩngye indi Mwami Mukulu Nyamuhanga wenyũ.

²³Neryo Omwami Mukulu mwabũga na Musa ati,

²⁴Ubwire abandu ba Ĩsraelĩ uti, Omo mukera wʼakalinda oko kiro kyʼerĩtsũka omukera, kyasyabya eriluhuka busana nenyũ, ekĩbũkyo kyʼeribuha esyongubi, erĩhĩndana lĩbũyĩrĩre.

²⁵Simusyekola omũbĩrĩ owakalĩre nʼomuke; mwasyaletera Omwami Mukulu obuhere obukakolawa omo muliro.

²⁶Neryo Omwami Mukulu mwabũga na Musa, ati,

²⁷Nĩkwa oko kiro kyʼerĩkũmĩ kyʼomukera oyo wʼakalinda ni kiro kyʼerihanula; kyasyabya erĩhĩndana lĩbũyĩrĩre busana nenyũ, mwasyakehya emitima yenyũ; kandi mwasyaherera Omwami Mukulu obuhere obũkokĩbwa oko muliro.

²⁸Nenyũ simusyekola mũbĩrĩ wʼomuhandakĩ omo kiro ekyo; kusangwa ni kiro kyʼerihanula, eribahanulira embere syʼOmwami Mukulu Nyamuhanga wenyũ.

²⁹Kusangwa hamabya mundu oyũtendĩyĩkehya oko kiro ekyo, asyalũsibwa oko bandu buwe.

³⁰Nomo angabya mundu wahi akakola omũsĩndokĩ wʼomũbĩrĩ omo kiro ekyo, nasyaherya omundu oyo erĩlũa omo bandu buwe.

³¹Simusyekola mũbĩrĩ nomo angabya wa muhandakĩ. Ni mugambo wa kera na kera omo syondengo syenyũ syosĩ ehosĩ mwasyĩkala.

³²Yasyabya busana nenyũ eSabato yʼeriluhuka ndeke, nenyũ mwasyakehya emitima yenyũ; oko kiro kyʼomukera omwʼĩgolo-golo, erĩtsũka erĩgolo-golo erĩhĩka oko lindi ĩgolo-golo, mwasyateya eSabato yenyũ.

³³Kandi Omwami Mukulu mwabũga na Musa ati,

³⁴Ubwire abandu ba Ĩsraelĩ uti, Oko kiro kyʼerĩkũmĩ nʼebitanu kyʼomukera oyũ wʼakalinda ni kiro kikulu kyʼEbitalikirire oko biro birinda busana nʼOmwami Mukulu.

³⁵Oko kiro kyʼerĩtsũka hasyabya erĩhĩndana lĩbũyĩrĩre; simusyekola mũbĩrĩ akalĩre nʼomuke.

³⁶Ebiro birinda mwasyaletera Omwami Mukulu obuhere obũkokĩbawa oko muliro. Oko kiro kyʼomunani hasyabya erĩhĩndana lĩbũyĩrĩre busana nenyũ; mwasyaherera Omwami Mukulu obuhere obũkokĩbawa oko muliro; nĩ ʼhindana lĩbũyĩrĩre. Simusyekola omũbĩrĩ owakalĩre nʼomuke.

³⁷Ebĩ ni biro bikulu ebĩhĩrĩrwe byʼOmwami Mukulu, ebyo mwasyatũlagnĩa eribya mahĩndano abũyĩrĩre, eriherera Omwami Mukulu obuhere obũkokĩbawa oko muliro, obuhere bwʼerĩokererya, obuhere bwʼengano, obwʼamatolere, nʼamahere wʼerĩpũlya, obuli mwatsi oko musibo wʼekiro ekyo.

³⁸Kandi esyo Sabato syʼOmwami Mukulu, nʼolũsũnzo lwʼenyũ, nʼerĩlahĩrya lyenyũ lyosĩ, nʼakandi erĩhĩtya lyenyũ lyʼerĩyĩsũnza eryosĩ, ebyo mukaha Omwami Mukulu.

³⁹Nĩkwa oko kiro kyʼerĩkũmĩ nʼebitanu kyʼomukera wʼeyirinda, omugulu mukahulula ebĩgũma byʼekitaka, mwasyateya ebiro bikulu byʼOmwami Mukulu ebiro birinda; oko kiro kyʼerĩtsũka kyasyabya eriluhuka, nʼoko kiro kyʼomunani kyasyabya ekiro kyʼeriluhuka.

⁴⁰Oko kiro kyʼerĩtsũka ekyo, mwasyĩmya ebigũma byʼemiti eyowenenga, nʼemitahi yʼamabondo, nʼemitahi yʼemiti minene-minene nʼemiti yʼoko mũsĩke wʼolũsĩ; kandi mwasyatsema embere syʼOmwami Mukulu Nyamuhanga wenyũ ebiro birinda.

⁴¹Nenyũ mwasyateyabyo mo biro bikulu busana nʼOmwami Mukulu ebiro birinda omo mwaka. Ni mugambo wʼebiro byosĩ omo syondengo syenyũ syosĩ; mwasyateyabyo oko mukera wʼakalinda.

⁴²Mwasyĩkala omo bitalikirire biro birinda; abosĩ ababũtĩrwe eka wʼeĩsraelĩ basyĩkala omo bitalikirire.

⁴³Esyondengo syenyũ sitoke eriminya ngoko nahĩra abana ba Ĩsraelĩ erĩĩkala omo bitalikirire, omugulu nalũsayabo omo kihugo kyʼeMĩsĩrĩ. Ĩngye indi Mwami Mukulu Nyamuhanga wenyũ.

⁴⁴Neryo Musa mwatũlĩra abana ba Ĩsraelĩ emigulu eyo Mwami Mukulu ahĩra.