Read nande Abalawĩ 24 Bible Online

Abalawĩ 24 - nande bible

Abalawĩ 24

¹Neryo Omwami Mukulu mwabũga na Musa, ati,

²Uhane abana ba Ĩsraelĩ, bakuletere amagũta wʼezeĩtũnĩ agowene awagoyĩre busana nʼetala, erireka etala iyaka emigulu yosĩ.

³Eyĩhya oko lukimba olũkasũkũlĩraya, omo Hema yʼerĩhĩndanamo, Harũnĩ asyateyayo erĩtsũka erĩgolo-golo erĩhĩka omo ngyakya embere syʼOmwami Mukulu emigulu yosĩ; asyabya mugambo wʼebiro byosĩ omo syondengo syenyũ syosĩ.

⁴Asyateya ndeke esyotala oko mutagala owene wʼesyamagetsi embere syʼOmwami Mukulu emigulu yosĩ.

⁵Wasyĩmya eyĩsyano yʼenzelele nʼerĩokya amandu erĩkũmĩ nʼawabiri muyo; ebihande bibiri byʼomwʼĩkũmĩ byʼekitiri byasyabya omo buli bundu buguma.

⁶Nawe wasyahĩrago omo milondo ĩbĩrĩ, amandu ndatu oko mulondo, endata oko mesa yʼesyamagetsi embere syʼOmwami Mukulu.

⁷Kandi Wasyahĩra oũbanĩ yowene oko buli mulondo eribya kĩbũkyo busana nʼamandu, obo ni buhere oko Mwami Mukulu erĩokĩbwa oko muliro.

⁸Obuli kiro kyʼeSabato asyatondekago embere syʼOmwami Mukulu emigulu yosĩ; ni busana nʼabandu ba Ĩsraelĩ, endagano ya kera na kera.

⁹Nago asyabya busana na Harũnĩ nʼabagala buwe; basyalirago ahabũyĩrĩre; kusangwa ayo abũyĩrĩre kutsibu busana naye omo mahere wʼOmwami Mukulu awakokĩbawa oko muliro busana nʼomugambo wʼebiro byosĩ.

¹⁰Kandi omugala wʼomũkalĩ Mũĩsraelĩ, ĩse wuwe ĩnĩ Mũmĩsĩrĩ, mwayalendera omo katĩkatĩ kʼabandu ba Ĩsraelĩ; nʼomugala wʼomũkalĩ Mũĩsraelĩ mwalwa nʼOmũĩsraelĩ omo kilaliriro;

¹¹nʼomugala wʼomũkalĩ Mũĩsraelĩ mwatakira erĩna lya Nyamuhanga, kandi mwatsuma. Neryo mobamuleta uku Musa. Nʼerĩna lya koyo wuwe lyabya Selomĩtĩ, mwali wa Dĩbũrĩ, owʼekihanda kya Danĩ.

¹²Neryo mobamũhĩra omo mũlĩkĩ ibatoka eribwirwa ndeke ekihano kyʼOmwami Mukulu.

¹³Neryo Omwami Mukulu mwabũga na Musa ati,

¹⁴Ũhũlũkaye oyukatsuma eyĩhya wʼekilaliriro; nʼabosĩ abamowa bahĩre ebyala byabo oko mutwe wuwe, nʼendeko yosĩ bamuguse kwʼamabwe.

¹⁵Kandi wasyabwira abandu ba Ĩsraelĩ uti, Omundundi oyukatakira Nyamuhanga wuwe asyaheka ebibi biwe.

¹⁶Nʼoyukatsuma Erĩna lyʼOmwami Mukulu, kwenene asyĩtwa; endeko yosĩ yasyamwĩta erĩmũswĩrya omo mabwe. Amabya mubunga, kutse oyũbũtĩrwe eka, omugulu akatsuma erĩna lyʼOmwami Mukulu, asyĩtwa.

¹⁷Nʼoyũkaswĩraya omundu neryo akahola kwenene asyĩtwa.

¹⁸Nʼoyũkaswĩraya enyama ikahola asyatũhayo, engebe busana nʼeyindi ngebe.

¹⁹Nʼomundu amalehemya mũlĩkyabo; ngoko abirikola, naye asyakolwa atya,

²⁰erĩbũnĩka busana nʼerĩbũnĩka, erĩso busana nʼerĩso, erĩno busana nʼerĩno; ngoko abĩrĩhũtalĩa omundu, asyakolwa atya.

²¹Nʼoyũkĩta enyama asyatũhayo; nʼoyũkĩta omundu naye asyĩtwa.

²²Mwasyabya nʼekihano kiguma, busana nʼomubunga kutse busana nʼoyũbũtĩrwe eka; kusangwa ĩngye indi Mwami Mukulu Nyamuhanga wenyũ.

²³Neryo Musa mwabwira abandu ba Ĩsraelĩ; nabo mobahũlũkĩrya eyĩhya oko kilaliriro oyo watsuma, mobamwĩta erĩmũswĩrya omo mabwe. Neryo abandu ba Ĩsraelĩ mobakola ngoko Mwami Mukulu ahana Musa.