Read nande Abalawĩ 25 Bible Online

Abalawĩ 25 - nande bible

Abalawĩ 25

¹Neryo Omwami Mukulu mwabwira Musa omo kitwa kyʼeSĩnaĩ ati,

²Ũbũge nʼabana ba Ĩsraelĩ, ubwirebo uti, Omugulu mũkahĩka omo kihugo ekyo ngabaha, ekitaka kyasyabya nʼeSabato busana nʼOmwami Mukulu.

³Wasyahera eririma lyawe myaka ndatu, nʼoko myaka ndatu wasyakolera eririma lyawe lyʼebĩnyũ, nʼerioha ebĩgũma byalyo;

⁴nĩkwa oko mwaka wʼakalinda yasyabya eSabato yʼeriluhuka busana nʼekitaka, eSabato yʼOmwami Mukulu; Susyehera eririma lyawe, kutse erikolera eririma lyawe lyʼebĩnyũ.

⁵Ekikayilasira omwʼigesa lyawe, isiwagesakyo, nʼebĩgũma byʼemĩrĩkĩ yʼebĩnyũ eyitakolerawa susyohabyo; hasyabya Omwaka wʼeriluhuka busana nʼekitaka.

⁶Nʼebyalya byʼeSabato yʼekitaka byasyabya kalyo busana nenyũ; busana nawe nʼomugombe wawe nʼomugombe wawe wʼobũkalĩ, na busana nʼomũhĩngĩ wawe na busana nʼowʼehandi wawe, oyukabungira omwawe.

⁷Na busana nʼesyonde syawe, nʼesyonyama esiri oko kitaka kyawe, syasyalya akalyo kosĩ kakyo.

⁸Kandi wasyayiganzira esyo Sabato sirinda syʼemyaka, emyaka irinda ngendo sirinda; kandi hasyabya busana nawe ebiro byʼesyo Sabato sirinda syʼemyaka, eyo ni myaka makũmĩ ani nʼomwenda.

⁹Neryo oko kiro kyʼerĩkũmĩ kyʼomukera wʼakalinda wasyabũhĩsya engubi yo kutsibu ehosĩ; oko kiro kyʼerihanula wasyabũhĩsya engubi omo kihugo kyenyũ kyosĩ.

¹⁰Kandi mwasyahigula Omwaka wʼamakũmĩ atanu, wasyatũlaganĩa engulu yʼobwĩranda omo kihugo kyosĩ nʼesyondũlanĩ syosĩ syakyo; asyabya Yũbĩle busana nenyũ; nenyũ mwasyasuba obuli mundu oko kitaka kiwe, mwasyasubula obuli mundu oko kĩtũnga kiwe.

¹¹Omwaka oyũ wʼamakũmĩ atanu asyabya Yũbĩle busana nenyũ; simwendisyahera kalyo, kutse erigesa ekikayilasira mukyo, kutse erioha ebĩgũma byʼebĩnyũ mukyo oko mĩrĩkĩ yʼebĩnyũ eyĩtatũbawa.

¹²Kusangwa nĩ Yũbĩle; yasyabya ĩbũyĩrĩre busana nenyũ. Mwasyalya ebyalya byalyo ebĩkalũa omwʼirima.

¹³Oko mwaka oyũ wʼeYũbĩle mwasyasubula obuli mundu oko kitaka kiwe.

¹⁴Wamagũlya kindu uku mũlĩkyenyũ, kutse ukagula kindu ewa mũlĩkyenyũ, isimwakolerana nabi.

¹⁵Ngʼeriganza lyʼemyaka enyũma wʼeYũbĩle wasyagula uku mũlĩkyenyũ, ngʼeriganza lyʼemyaka yʼerigesa asyakũgũlya atya.

¹⁶Ngʼobungi bwʼemyaka wasyatomekera obũgũlĩ bwakyo, nʼoko buke bwʼemyaka wasyakehya obũgũlĩ bwakyo; busana nʼeriganza lyʼerigesa akakũgũlyakyo.

¹⁷Kandi simukolerane nabi, nĩkwa mubahe Nyamuhanga wenyũ. Kusangwa ĩngye indi Mwami Mukulu Nyamuhanga wenyũ.

¹⁸Neryo mwasyakola emigambo yage, nʼerĩteya erihamula lyage erikolalyo; neryo imwatoka erĩĩkala omo kihugo mo buholo.

¹⁹Nʼekitaka kyasyalasya ebĩgũma byakyo, nenyũ mwasyalya nʼerĩũgũta, nʼerĩĩkala mukyo mo buholo.

²⁰Neryo mwamabũga muti, Twasyalyakĩ oko mwaka wʼakalinda kwehĩ? Lebaya, twamatendisyabiba, kutse erigesa akalyo ketu.

²¹Nasyabahamulira omũyĩsa wage oko mwaka wʼendatu, nago asyabalasĩrya ebĩgũma busana nʼemyaka ĩsatu.

²²Omugulu mukabiba oko mwaka wʼomunani, imukalya ebĩgũma, enya-mukuru ya kera, erĩhĩka oko mwaka wʼomwenda, omugulu ebyalya bikaswera.

²³Nʼekitaka sĩkyendĩsyagũlĩbwa na kera; kusangwa ekitaka ni kyage; kusangwa muli bʼehandi nʼababunga haguma nage.

²⁴Nenyũ mwasyabana endongolya busana nʼekitaka busana nʼobuli bũsokĩ bwenyũ.

²⁵Nʼomugala wenyũ amabya mwera, akagũlya oko bũsokĩ buwe, neryo ekĩtũnga kiwe ekiri hakũhĩ naye kyasyasa, kyasyatongolya ekyo mugala wabo agũlaya.

²⁶Kandi mugala wabo atawite omundu wʼerĩtongolyakyo, naye iniabiribya wʼebindu akabana ebyangatongolyakyo;

²⁷neryo aganze emyaka yʼerigulakyo, nʼerĩsũbũlĩrya omundu oyo wagulakyo ebĩlabĩremo; naye iniasubana nʼobũsokĩ buwe.

²⁸Neryo amataluka erĩyĩsũbũlĩryakyo, neryo ekyo agũlaya kyasyasĩgala omo byala byʼoyo wagulakyo erĩhĩka oko mwaka wʼeYũbĩle; nʼoko Yũbĩle kyasyalũayo, naye iniasubana nʼobũsokĩ buwe.

²⁹Kandi omundu amagũlya enyũmba yʼerĩĩkalamo omo mũyĩ owali kwʼekĩyĩte, angatoka erĩtongolyayo oko mwaka muguma enyũma wʼerĩgũlĩbwa lyayo; oko mwaka mũyĩma-yĩma asyabya nʼehamũlĩ yʼerĩtongolyayo.

³⁰Kandi yamatindatongolĩbwa omo mugulu wʼomwaka muguma-guma, neryo enyũmba eyo eyiri oko mũyĩ awali kwʼekĩyĩte yasyasĩgalira ukwʼoyo wagulayo ebiro byosĩ; omo syondengo siwe syosĩ; sĩyendĩsyalũayo omo Yũbĩle.

³¹Nĩkwa amanyũmba wʼemĩyĩ eyĩtatĩmbĩrye kwʼekĩyĩte asyaganzwa haguma nʼamalima wʼekihugo. Nago anganatongolĩbwa, kandi asyasubula omo Yũbĩle.

³²Nĩkwa emĩyĩ yʼAbalawĩ, amanyũmba wʼemĩyĩ yʼobũsokĩ bwabo, Abalawĩ bawite ehamũlĩ yʼerĩtongolyago oko migulu yosĩ.

³³Kandi ekindu kyʼAbalawĩ kyanganatongolĩbwa, neryo enyũmba eyagũlĩbawa, omo mũyĩ wʼobũsokĩ buwe, yasyasubula omo Yũbĩle; kusangwa amanyũmba wʼAbalawĩ nĩ bũsokĩ bwabo omo katĩkatĩ kʼabandu ba Ĩsraelĩ.

³⁴Nĩkwa amalima wabo wʼerĩrĩsya awʼemĩyĩ yabo ĩsyagũlĩbawa; kusangwa nĩ bũsokĩ bwabo ebiro byosĩ.

³⁵Kandi mũlĩkyenyũ amabya mwera, nʼebindu biwe bikakeha; neryo ĩwamũwatĩkya, asyĩkala nawe ngʼowʼehandi nʼomubunga.

³⁶Sumusonde kwʼendũndĩ kutse engemu, nĩkwa Ukenge Nyamuhanga wawe; omũlĩkyenyũ atoke erĩĩkala nawe.

³⁷Susyemuha ebĩtsĩpa byawe busana nʼeribana endũndĩ, kutse erimuha ebyalya byawe busana nʼerikuliha endũndĩ.

³⁸Ĩngye indi Mwami Mukulu Nyamuhanga wenyũ oyo wabalũsaya omo kihugo kyʼeMĩsĩrĩ, eribaha ekihugo kyʼeKanana, nʼeribya Nyamuhanga wenyũ.

³⁹Kandi omũlĩkyenyũ amabya mwera kutsibu ati akayĩgũlaya ukʼuwe; ĩsĩwamũkolesaya ngʼomukobe.

⁴⁰Asyabya nawe ngʼomũhĩngĩ, kandi ngʼomusunga; asyakukolera erĩhĩka oko mwaka wʼeYũbĩle.

⁴¹Neryo asyalũa kuwe, iye nʼabana buwe, kandi asyasuba oko kĩtũnga kiwe, kandi asyasuba oko bũsokĩ bwʼabotata wuwe.

⁴²Kusangwa ni bagombe bage abo nalũsaya omo kihugo kyʼeMĩsĩrĩ; sĩbasyegũlĩbawa ngʼabakobe.

⁴³Isiwamutabalako nʼamaka, nĩkwa wasyakenga Nyamuhanga wawe.

⁴⁴Kandi busana nʼabakobe bʼobulume, nʼabakobe bawe bʼobũkalĩ, abo Wasyabya nabo; oko bihanda ebĩkũtĩmbĩreko, wasyagula abakobe bʼobulume nʼabakobe bʼobũkalĩ ukwʼabo.

⁴⁵Kandi omo bagala bʼehandi abakabungira omo katĩkatĩ kenyũ, mwasyagula kubo, nʼabʼebĩtũnga byabo abali haguma nenyũ, abo babutira omo kihugo kyenyũ; banganabya enzĩgalya yenyũ nibya.

⁴⁶Nenyũ mwanganahĩtyabo mo mwandu oko bana benyũ enyũma syenyũ, erihambabo mo nzĩgalya. Ukwʼabo, mwasyĩmya abakobe benyũ bʼobulume busana nʼebiro byosĩ kera na kera; nĩkwa isimwatabala oko bagala benyũ abana ba Ĩsraelĩ nʼamaka, ogundi oko gundi.

⁴⁷Nĩkwa owʼehandi kutse omubunga oyuli nawe amabana ebindu, nʼomũlĩkyenyũ amabya mwera hakũhĩ naye, akayĩgũlya oko wʼehandi oyukabunga haguma nawe, kutse oko bana bʼekĩtũnga kyʼowʼehandi;

⁴⁸neryo enyũma wʼerĩgũlĩbwa, awite ehamũlĩ yʼerĩtongolĩbwa; omuguma wʼoko bagala babo anganamũtongolya;

⁴⁹kutse ĩse-mulere wuwe, kutse mugala wʼĩse-mulere wuwe, anganamũtongolya, kutse omundu wʼahakũhĩ nʼekĩtũnga kiwe anganamũtongolya; kutse amayira ebindu anganayĩtongolya ĩyowene-wene.

⁵⁰Neryo iye asyaganza haguma nʼoyo wamugula erĩtsũka oko mwaka ayĩgũlayako erĩhĩka oko mwaka wʼeYũbĩle; nʼenzwere yʼerigulwa liwe yasyabya ngʼeriganza lyʼemyaka eyo. Iri ngʼebiro byʼomũhĩngĩ oko mugulu ali naye.

⁵¹Emyaka yamabya iyikine mingi, okwʼiganzirana lyayo, asyamũsũbũlĩrya obũgũlĩ bwʼerĩtongolya liwe oko bĩtsĩpa agulawamo.

⁵²Kandi hamasĩgala emyaka mike erĩhĩka oko mwaka wʼeYũbĩle, asyaganzirana naye; asyamũsũbũlĩrya enzwere yʼerĩtongolĩbwa liwe ngʼemyaka yiwe kwʼiri.

⁵³Asyabya naye ngʼomũhĩngĩ oko mwaka nʼoko mwaka oyo; isiamutabalako nʼamaka omo meso wawe.

⁵⁴Kandi amatindatongolĩbwa omo nzira eyĩ, asyasubula oko mwaka wʼeYũbĩle, iye nʼabana buwe.

⁵⁵Kusangwa abana ba Ĩsraelĩ ni bagombe bage; ibo ni bagombe bage abo nalũsaya omo kihugo kyʼeMĩsĩrĩ. Ĩngye indi Mwami Mukulu Nyamuhanga wenyũ.