Read nande Abalawĩ 9 Bible Online

Abalawĩ 9 - nande bible

Abalawĩ 9

¹Neryo oko kiro kyʼomunani, Musa mwabirikira Harũnĩ nʼabagala buwe, nʼabakulu ba Ĩsraelĩ;

²neryo mwabũga na Harũnĩ, ati, Ĩmaya enume yʼekyana kyʼende busana nʼobuhere bwʼebibi, nʼembangale busana nʼobuhere bwʼerĩokererya, eyite ko bulema, muhereresyo embere syʼOmwami Mukulu.

³Neryo wasyabũga nʼabandu ba Ĩsraelĩ uti, Mwĩmaye embaya busana nʼobuhere bwʼebibi nʼekyana kyʼende nʼekyana kyʼembũlĩ, ebibiri byosĩ byʼomwaka muguma, ebite ko bulema, busana nʼobuhere bwʼerĩokererya;

⁴kandi enume yʼende nʼembangale busana nʼamahere wʼobuholo, erihongerasyo embere syʼOmwami Mukulu; kandi obuhere bwʼeyĩsyano yʼengano obũtũlũngene nʼamagũta; kusangwa mũnabwĩre Omwami Mukulu akandibahulukira.

⁵Neryo mobaleta ebyo Musa ahula embere syʼeHema yʼerĩhĩndanamo; nʼendeko yosĩ moyasegera hakũhĩ mobahangana embere syʼOmwami Mukulu.

⁶Neryo Musa mwabũga ati, Oyũ go mwatsi ogo Mwami Mukulu ahana ati mukole; nʼolukengerwa lʼOmwami Mukulu lubahulukireko.

⁷Kandi Musa mwabũga na Harũnĩ ati, Segera hakũhĩ nʼekiherero uhere obuhere bwawe bwʼebibi, nʼobuhere bwawe bwʼerĩokererya eriyirihira embanulo nʼeyʼabandu; neryo uhere obuhere busana nʼabandu, nʼeririhira abandu bʼembanulo, ngoko Mwami Mukulu ahana.

⁸Neryo Harũnĩ mwasegera hakũhĩ nʼekiherero, mwakera ekyana kyʼende kyʼobuhere bwʼebibi, obwabya busana naye ĩyowene.

⁹Nʼabagala ba Harũnĩ mobamuletera omusasi; naye mwatũlya omunwe wuwe gʼomo musasi, mwahĩrago oko mahembe wʼekiherero, neryo mũta ogundi musasi gʼomo ndĩna yʼekiherero.

¹⁰Nĩkwa mokerya oko kiherero kwʼebĩsabũ, nʼesyombĩko, nʼendulu yʼoko bulepe byʼobuhere bwʼebibi; ngoko Mwami Mukulu ahana Musa.

¹¹Nʼesĩswĩ nʼengobĩ mwahĩsĩrĩryabyo omo muliro ekyaswa kyʼekilaliriro.

¹²Neryo mwakera obuhere bwʼerĩokererya; nʼabagala ba Harũnĩ mobamũhererya omusasi, naye mwatsatsangago oko kiherero erĩtĩmbya goho.

¹³Neryo mobamuletera obuhere bwʼerĩokererya mo kitswe-kitswe, nʼomutwe; naye mwahĩsĩrĩryabyo oko kiherero.

¹⁴Neryo mwerya ebila, nʼeminono, neryo mwahĩsĩrĩryabyo omo mũkĩ mo buhere bwʼerĩokererya oko kiherero.

¹⁵Neryo mwaleta obuhere busana nʼabandu, kandi mwĩmya embene yʼobuhere bwʼebibi eyabya busana nʼabandu neryo mwakerayo, mwaherayo busana nʼebibi, ngʼeyʼerĩmbere.

¹⁶Neryo mwaleta obuhere bwʼerĩokererya, mwaherabo ngʼekihano.

¹⁷Neryo mwaleta obuhere bwʼeyĩsyano yʼengano, kandi mũsũlya omo kiganza kiwe mwʼeyĩsyano, mwahĩsĩryabo oko kiherero, obuhere bwʼerĩokererya obwʼengyakya buteko.

¹⁸Neryo mwĩta enume yʼende nʼembangale, ehongo yʼamahere wʼobuholo, eyabya busana nʼabandu; neryo abagala ba Harũnĩ mobamuletera omusasi, neryo mwatsatsangago oko kiherero erĩtĩmbyago ehosĩ.

¹⁹Nĩkwa ebĩsabũ byʼenume yʼende nʼebyʼembangale, nʼomukira wʼebĩsabũ, nʼebĩsabũ ebĩswĩkĩre ebila, nʼesyombĩko, nʼendulu yʼoko bulepe

²⁰mobahĩra ebihande byʼebĩsabũ byʼoko bĩkũba; neryo mwahĩsĩrĩrya ebĩsabũ byʼomo mũkĩ oko kiherero mo buhere.

²¹Nĩkwa Harũnĩ mwahũnga-hũngya ebĩkũba ebyo nʼekihinga kyʼamali busana nʼobuhere bwʼerĩhũnga-hũngya embere syʼOmwami Mukulu; ngoko Musa ahana.

²²Neryo Harũnĩ mwasumba ebyala biwe erĩlolyabyo oko bandu, mwatsumulabo, neryo mwakĩma erĩlũa okwʼihera; obuhere bwʼebibi, nʼobuhere bwʼerĩokererya, nʼamahere wʼobuholo.

²³Neryo Musa na Harũnĩ mobingira omo Hema yʼerĩhĩndanamo. Babere bahuluka, nʼeritsumula abandu, olukengerwa lʼOmwami Mukulu molwahulukira abandu bosi.

²⁴Nʼomuliro mwahuluka embere syʼOmwami Mukulu, mwakĩrĩrya obuhere bwʼerĩokererya nʼebitswe byʼebĩsabũ oko kiherero; nʼomugulu abandu bosĩ balangirago, mobasumba emirenge mobawira oko mũsũ wabo.