Read nande Yeremĩa 10 Bible Online

Yeremĩa 10 - nande bible

Yeremĩa 10

¹Uwe kĩtũnga kyʼeĨsraelĩ uhulikirire ekĩnywa ekyo Mwami Mukulu akakubwira.

²Omwami Mukulu akabũga ati, Sĩmũyĩgĩsaye enzira yʼebihanda, kandi simubahe busana nʼebiminyikalo byʼekyanya. Kusangwa ebihanda bikubahabyo.

³Kusangwa emitsye yʼabandu ni mitya-mitya. Kusangwa ni muti akakondawa omo mũsĩtũ, omũbĩrĩ wʼebyala byʼomunyima-nyima nʼembasa.

⁴Bakasũgago omo bĩtsĩpa nʼesyamagetsi. Bakawatayabyo omo mũsũmalĩ nʼenyondo sibisega-segane.

⁵Esyosanamu esĩ nĩ bĩsosekanĩo byʼekikororo kyʼerĩsagĩsya omwʼirima lyʼebyobe, kandi sĩsyebũga, litolere erihekasyo kusangwa sisyetoka erigenda! Simubahesyo, kusangwa sisyetoka erikola nabi, kutse sisiwite Obũtokĩ bwʼerikola ndeke.

⁶Sihali nʼomuguma oyuli nga we, uwe Mwami Mukulu. Uwe uli mukulu nʼerĩna lyawe ni rikulu omo maka.

⁷Uwe Mwami wʼebihanda, nindi ati siangakubaha kwehĩ? Kusangwa likutolere! Kusangwa omo katĩkatĩ kʼabandu bʼamenge bosĩ bʼebihanda, kandi omo mami gosĩ wabo sihali oyuli nga we.

⁸Nĩkwa nĩ batagangalĩ, kandi nĩ bakĩrũ erĩkangĩrĩrya lyʼesyosanamu, ka ni muti musa!

⁹Hali ebĩtsĩpa ebyahesawa, ebĩkalũsĩbawa eTarsisi, nʼesyamagetsi esĩkalũa eŨfazĩ, omũbĩrĩ wʼomunyima-nyima nʼowʼebyala byʼomũhesĩ wʼesyamagetsi. Esyongimba syabo nĩ syʼerangĩ yʼesamawĩ nʼengula, ebyosĩ ebĩ nĩ mũbĩrĩ wʼabandu banyimanyima.

¹⁰Nĩkwa Omwami Mukulu yo Nyamuhanga wʼekwenene. Iye ni Nyamuhanga oyuliho, kandi ni Mwami wa kera na kera. Erihitana liwe lĩkatĩtĩmanaya ekihugo, nʼebihanda sibyetoka eribegera erihitana liwe.

¹¹Mwasyabwirabo muti, Esyonyamuhanga esitahangika amatũkũ nʼekihugo, esĩ syasyahera omo kihugo, nʼeyĩkwa oko bũtũkũ.

¹²Abirihangika ekihugo omo bũtokĩ buwe, kandi abĩrĩsĩkya ekihugo omo menge wuwe, nʼomwʼiminya liwe abirisanza obũtũkũ.

¹³Omugulu akasumba omulenge wuwe, hali olukanda omo kyanya, akahetũkaya ebĩtũ erĩlũa oko ndũlĩ syʼekihugo. Akayira emĩpalyo busana nʼembũla, akahũlũkaya erihunga omo mbĩso siwe.

¹⁴Obuli mundu nĩ mũkĩrũ isiawite amenge. Obuli mũhesĩ wʼesyamagetsi abirihemulwa omo siwe, kusangwa esyosanamu siwe syʼerĩnũnĩa sikateba, kandi sisiri mo muka.

¹⁵Ni bitya-bitya, omũbĩrĩ wʼeriteba. Oko mugulu wʼerisuyirwa lyabo basyahera.

¹⁶Erĩgabo lya Yakobo siriri ngʼaba. Kusangwa iye nĩ mũhangĩkĩ wʼebindu byosĩ. Kandi ekihanda kya Ĩsraelĩ ni mwandu wuwe: Omwami Mukulu wʼemilondo lyo lĩna liwe.

¹⁷Songaya omuganda wawe oko kitaka, uwe wĩkere aho bakabambira omũyĩ!

¹⁸Kusangwa Omwami Mukulu ati, Lebaya, oko mugulu oyũ nasyagusa esyondũlanĩ syʼekihugo, nasyagalyabo, ibatoka eribanika.

¹⁹Obũlĩge ũkwʼĩngye busana nʼerĩbũnĩka lyage! Ekironda kyage kikagana eribala. Nĩkwa monabũga nyiti, Kwenene eyĩ ni ndwala, nage litolere inahekayo.

²⁰EHema yage yamaherĩbwa, nʼesyongoba syayo syosĩ syamatwĩka. Abagala bage babĩrĩnzĩga, sibakiri. Sihali kandi oyo wasyanyihandira eHema yage, kutse erihanika olukimba lwage olũkasũkũlĩraya.

²¹Kusangwa abalĩsya babiribya bakĩrũ kandi sĩbetasonda-sondya Omwami Mukulu. Busana nʼekyo sibetakamaha, nʼekihangulo kyabo kyosĩ kyabiripanza-panzwa.

²²Lebaya omulenge wʼengulu akasa, nʼomũsĩkĩ munene akalũa omo kihugo kyʼelutambi lwʼendata, eriyira emĩyĩ yʼeYũda mo kĩma, aho esyoboha sĩkĩkala.

²³Uwe Mwami Mukulu, nyĩnasĩ kwʼenzira yʼomundu siyiri omwisi wuwe, kandi siriri omwisi wʼomundu oyukalendera erisondola olugendo luwe.

²⁴Uwe Mwami Mukulu unyihabule, nĩkwa omo lĩbanza litunganene, butsira omwʼihitana lyawe, ũkasyanyĩta.

²⁵Gũtũlĩre erihitana lyawe oko bihanda bĩtakwasĩ, nʼoko bĩtunga byʼabandu abatiahula erĩna lyawe. Kusangwa babiribuga Yakobo, ega, babĩrĩmwĩta, babirimubuga, nʼeriyira ahʼerĩĩkala liwe mo mulala.