Read nande Yeremĩa 11 Bible Online

Yeremĩa 11 - nande bible

Yeremĩa 11

¹Ekĩnywa ekyasa uku Yeremĩa kĩkalũa oko Mwami Mukulu, kiti,

²Muhulikirire ebĩnywa byʼerilagana erĩ, kandi Ubwire abandu bʼeYũda, nʼesyondũlanĩ syʼeYerũsalema.

³Ubwirebo uti, Omwami Mukulu Nyamuhanga wa Ĩsraelĩ ati, Omundu oyũtĩowa ebĩnywa byʼerilaga erĩ atakirawe,

⁴erilagana eryo nahana abotata wenyũ ekiro nalũsayabo omo kihugo kyʼeMĩsĩrĩ, omo ngwekwe yʼomuliro wʼekyuma, nyiti, Mukenge omulenge wage, mukolego, ngʼebyosĩ ngabahana. Ko mwasyabya bandu bage mutya, nage nasyabya Nyamuhanga wenyũ.

⁵Neryo inatoka erĩberererya erĩlahĩrya eryo nalahĩrĩraya abotata wenyũ, erihabo ekihugo kikasenda mwʼamasabũ nʼobuki, ngoko biri mũnabwĩre. Neryo monasũbĩrya nyiti, Uwe Mwami Mukulu, Amina.

⁶Neryo Omwami Mukulu mwambwira ati, Ũtũlĩre ebĩnywa ebĩ byosĩ omo mĩyĩ yʼeYũda, nʼomo nzira yʼeYerũsalema uti, Muhulikirire ebĩnywa byʼerilagana erĩ, kandi mukolebyo.

⁷Kusangwa monakunga abotata wenyũ bo kutsibu ekiro nalũsayabo omo kihugo kyʼeMĩsĩrĩ, erĩhĩka mũnabwĩre, iningahangana omo ngyakyangyakya nʼerikungabo nyiti, Mukenge omulenge wage.

⁸Nĩkwa mobatakengago, kutse eritega okũtũ kwabo, nĩkwa mobagenda obuli mundu omo butsibu bwʼomutima mubi wuwe. Busana nʼekyo monaleterabo ebĩnywa byosĩ byʼerilagana erĩ, eryo nahanabo erikola, nĩkwa mobatakolabyo.

⁹Neryo Omwami Mukulu mwambwira ati, Oluhota lwamabanika omo bandu bʼeYũda, nʼomo katĩkatĩ kʼesyondũlanĩ syʼeYerũsalema.

¹⁰Babirisubira ebibi byʼabotata-kulu wabo, abagana erĩowa ebĩnywa byage; kandi babirikwama esindi nyamuhanga erikolerasyo. Ekĩtũnga kya Ĩsraelĩ nʼekĩtũnga kya Yũda babĩrĩtwa erilagana lyage eryo nayira nʼabotata wabo.

¹¹Neryo Omwami Mukulu ati, Lebaya, ngaleterabo obubi, obo bate bangatoka eribala. Abo, nomo basyanyilakira, nĩkwa sindiendisyahulikirirabo.

¹²Neryo emĩyĩ yʼeYũda nʼesyondũlanĩ syʼeYerũsalema basyayalakira esyonyamuhanga esyo bakaherera obukwa. Nĩkwa sisyendĩsyalamyabo nʼahake oko mugulu wʼobũlĩge bwabo.

¹³Uwe Yũda, kusangwa ngʼemiganzo yʼesyonyamuhanga syawe ko yingana, nʼemĩyĩ yawe ko yingaho. Kandi ngʼemiganzo yʼesyonzira syʼeYerũsalema, ko mwabirisingika ebiherero oko kindu ekyo kyʼesĩsonĩ, ebiherero byʼerĩhĩsya obukwa oko Baalĩ.

¹⁴Neryo susabire abandu aba, kutse sulake, kutse erisabirabo, kusangwa sĩndĩendĩsyowabo omugulu bakanyilakira busana nʼobũlĩge bwabo.

¹⁵Omwanze wage awite hamũlĩ yahi omo nyũmba yage omugulu abirikola emĩbĩrĩ mibi mingi kwehĩ? Omũbĩrĩ wʼobuhere angatoka erĩlũsya erĩkwa lyawe iwatoka eritsema kwehĩ?

¹⁶Omwami Mukulu mwahula erĩna lyawe mo muti wʼomũzeĩtũnĩ mubisi, omubuya nʼowʼebĩgũma byowene. Omulenge wʼomwaga munene abĩrĩakya omuliro kugo, nʼemitahi yago yabiribya buyira.

¹⁷Omwami Mukulu wʼemilondo, oyo wakuhanda, abĩrĩbũga ebibi busana nawe busana nʼebibi byʼekĩtũnga kyʼeĨsraelĩ nʼekĩtũnga kyʼeYũda, ebyo babirikola erĩnyĩhĩtanĩa busana nʼerĩhĩsĩrya Baalĩ yʼobukwa.

¹⁸Kandi, Omwami Mukulu mwanyĩmĩnyĩsyakyo, nage monaminyakyo. Neryo mowanyĩkangya emĩbĩrĩ yabo.

¹⁹Nĩkwa nabya ngʼekyana kyʼembũlĩ kyolo-kyolo ekikatwalawa okwʼĩsĩnzwa. Kandi mondaminya ko babiriya embĩta yʼamenge busana nage, bati, Tũheraye omuti nʼebĩgũma byago, tũmwĩte erĩmũlũsya omo kihugo kyʼabaliho, nʼerĩna liwe siryangaswibukwa.

²⁰Nĩkwa uwe Mwami Mukulu wʼemilondo, oyukatswera eritunganene, oyukalenga omutima nʼobũlengekanĩa, uleke nyilangire erĩkĩsya lyawe busana nabo, kusangwa nabĩrĩkũbĩsũlĩra omwatsi wage.

²¹Neryo Omwami Mukulu ati, Busana nʼabandu bʼeAnatotĩ abakasonda-sonda engebe yawe bati, Susyeminyerera oko lĩna lyʼOmwami Mukulu, ukasyaholera omo byala byetu.

²²Busana nʼekyo Omwami Mukulu wʼemilondo ati, Lebaya, nasyasuyirabo! Abalwana basyahola omo mũyalĩ. Abagala nʼabali basyahola omo nzala,

²³kandi sihendisyasaka nʼomuguma kubo, kusangwa nasyaletera abandu bʼeAnatotĩ erihera oko mwaka wʼerisuyirabo.