Read nande Yeremĩa 13 Bible Online

Yeremĩa 13 - nande bible

Yeremĩa 13

¹Omwami Mukulu mwambwira ati, Ugende, uyigulire omukoba wʼekĩtanĩ, ubohego omo mbindi yawe, kandi sũhĩrego omo magetsi.

²Neryo monagula omukoba ngʼekĩnywa kyʼOmwami Mukulu monayibohago omo mbindi yage.

³Nʼekĩnywa kyʼOmwami Mukulu mokyambĩkako engendo yʼakabiri kiti,

⁴Wĩmaye omukoba ogo wabirigula, owali omo mbindi yawe, neryo uhangane, ugende oko lũsĩ lwʼeEfũratĩ, ũbĩsego eyo omo mugenyo wʼerĩbwe.

⁵Neryo monayayo, nʼerĩbĩsago hakũhĩ nʼeEfũratĩ, ngoko Mwami Mukulu anyihana.

⁶Neryo enyũma wʼebiro bingi, Omwami Mukulu mwambwira ati, Hangana, ugende eEfũratĩ, wĩmaye omukoba ogo nakuhana erĩbĩsago eyo.

⁷Neryo monaya eEfũratĩ, monatakula, monĩmya omukoba eyo nabĩsago, kandi lebaya, omukoba abya iniabiritsanda, isialigasakĩ nʼahake.

⁸Neryo ekĩnywa kyʼOmwami Mukulu mokyambĩkako kiti,

⁹Omwami Mukulu akabũga ati, Litya nasyatsandya eriyitendera lya Yũda, nʼeriyitendera lyʼeYerũsalema.

¹⁰Abandu babi aba, abakagana erĩowa ebĩnywa byage, abakagenda omo butsibu bwʼemitima yabo, ababirikwama esindi nyamuhanga erikolerasyo, nʼerĩũnamirasyo, babye ngʼomukoba oyũ, owatagasakĩ.

¹¹Kusangwa ngoko mukoba akahamba embindi yʼomundu, nabĩrĩmatĩkanĩa ũkwʼĩngye ekĩtũnga kyosĩ kyʼeĨsraelĩ, nʼekĩtũnga kyosĩ kya Yũda, Omwami Mukulu atya; babye bandu busana nage, busana nʼerĩna, nʼeripipa, nʼolukengerwa. Nĩkwa mobagana erĩowa.

¹²Neryo wasyabwirabo ekĩnywa ekĩ uti, Omwami Mukulu, Nyamuhanga wa Ĩsraelĩ ati, Obuli ĩtambya lyasyũsũlĩbwa mwʼebĩnyũ. Nabo basyakubwira bati, Sĩtwasĩ ngoko obuli ĩtambya lyasyũsũlĩbwa mwʼebĩnyũ kwehĩ?

¹³Neryo wasyabwirabo uti, Omwami Mukulu akabũga ati, Lebaya, nasyũsũlya esyondũlanĩ syosĩ omo kihugo kino, nʼabami abĩkere oko kĩtũmbĩ kyʼobwami bwa Dawĩdĩ, nʼabahererĩ, nʼabamĩnyererĩ, nʼesyondũlanĩ syosĩ syʼeYerũsalema omo bũtamĩrĩ.

¹⁴Kandi ngandĩsyahĩndanganĩabo ogundi oko gundi, abotata nʼabagala haguma, Omwami Mukulu atya. Sindiendisyaganyira, kutse erĩbalya, kutse erĩkwĩrabo olukogo erĩtendĩheryabo.

¹⁵Ĩnywe mowe, mutege okũtũ; simuyiheke, kusangwa Omwami Mukulu abĩrĩbũga.

¹⁶Muhe Omwami Mukulu Nyamuhanga wenyũ olukengerwa, ate aleta omũhĩndanĩa nʼebisando byenyũ bite byatwĩkala oko bitwa byʼomũhĩndanĩa, kandi omugulu mukine nʼamaha wʼekyakakala, akabindulakyo mo mwĩrĩmya akalĩre, nʼeriyirakyo mo mũhĩndanĩa munene

¹⁷Nĩkwa mwamatendĩowakyo, omutima wage asyalira omo bũbĩso-bĩso busana nʼeriyiheka eryo. Nʼerĩso lyage lyasyalira kutsibu, nʼerĩtoya emĩsonĩa, kusangwa ekĩhyo kyʼOmwami Mukulu kyabirihambwa mo banyegwa.

¹⁸Ubwire omwami na nya-mwami uti, Mũyĩkehaye, mwĩkale ahisi, kusangwa embĩta yenyũ nyibuya yabĩrĩlũa oko mitwe yenyũ.

¹⁹Emĩyĩ yʼelutambi lwʼeyĩkwa yabirikingwa, isihali oyo wangakingulayo. Yũda abirihekwa mo banyegwa, abosĩ bako, babirihekwa mo banyegwa kũndũ.

²⁰Musumbe ameso wenyũ mũlebaye abakasa erĩlũa elutambi lwʼendata. Kiri hahi ekĩhyo kyawe wahabawa esyombũlĩ syawe nyibuya kwehĩ?

²¹Wasyabũga ũtĩkĩ omugulu asyahĩra abĩra bawe endata kuwe ngʼabatabalĩ bawe abo wakangĩrĩraya kwehĩ? Amagalĩ asyakuhamba ngʼawʼomũkalĩ oyukakunda.

²²Kandi wamabũga omo mutima wawe uti, Busana nakĩ emyatsi eyĩ yosĩ yamambĩkako kwehĩ? Busana nʼobungi bwʼebibi byawe, esyongimba syawe syamambulwa, nʼehĩsĩnzĩro hyawe hyamakwa.

²³Ko Mũetĩopĩa angabindula erangĩ yʼengoba yiwe, kutse esoro yangabindula ebitanga-bitanga byayo kwehĩ? Nenyũ litya mwanganatoka erikola ebibuya, ĩnywe mwabiribegera erikola ebibi.

²⁴Neryo nasyapanza-panzabo ngʼesyombuba esikalaba omwʼihunga lyʼembwarara.

²⁵Oyũ ni mugereko wawe, erĩgabo eryo nakugabira, Omwami Mukulu atya; kusangwa wabirinyibirirwa, nʼeriyiketera amabehĩ.

²⁶Neryo nasyambula esyongimba syawe embere syʼobũsũ bwawe, nʼerikuhemula.

²⁷Omwami Mukulu abirilangira ukakola emyatsi eyo atanzĩre. Oko bitwa nʼokolĩ ukakwama esyonyamuhanga syʼabandu ngʼomundu Oyũkakwa engumbu yʼomũkalĩ wa mũlĩkyabo, ngʼesabayĩrĩ ikakwama eyindi. Obũlĩge ukʼuwe, uwe Yerũsalema! Wasyabya nye biro bingahi kwehĩ?