Read nande Yeremĩa 15 Bible Online

Yeremĩa 15 - nande bible

Yeremĩa 15

¹Neryo Omwami Mukulu mwambwira ati, Nomo Musa na Samwelĩ bangahangana embere syage, nĩkwa omutima wage siangabya haguma nʼabandu aba. Utumebo balũe embere syage, bagende!

²Neryo, omugulu basyakubwira bati, Tuyehi kwehĩ? Neryo wasyabwirabo uti, Omwami Mukulu ati, Abali busana nʼoluholo, baye oko luholo, nʼabali busana nʼomũyalĩ, baye oko mũyalĩ, nʼabali busana nʼenzala, baye oko nzala, nʼabali busana nʼerinyegwa, baye okwʼinyegwa.

³Omwami Mukulu ati, Nage nasyahĩra kubo kwʼemĩsĩndo ĩnĩ yʼerĩkwa, omũyalĩ wʼerĩĩta, nʼesyombwa syʼeritulanga, nʼesyonyonyũ syʼomo kyanya, nʼesyonyama syʼekihugo erirya nʼerĩherya.

⁴Nage nasyaleka ibabya ekindu kyʼesyonye omo katĩkatĩ kʼamami gosĩ wʼekihugo, busana na Manase mugala wa Hezekĩa, omwami wʼeYũda, busana nʼebyo akola eYerũsalema.

⁵Kusangwa uwe Yerũsalema, nindi wasyakuganyira kwehĩ? Kutse nindi wasyakulirira kwehĩ? Kutse nindi wasyakita emũsĩke erĩbũlya ngʼuli uti kwehĩ?

⁶Omwami Mukulu ati, Ĩnywe mwabirinyigana, mukinasuba enyũma. Kikaleka inasumba ebyala byage erilwa nenyũ, nʼerĩbaherya. Namaluha erĩyĩkakĩrya!

⁷Nabĩrĩgũlũkyabo omo kĩbĩngyo omo syongyo syʼekihugo. Nasyĩta abana babo, nasyaherya abandu bage. Mobatabũnũkala erireka esyonzira syabo.

⁸Abakwakalĩ babo babirikanyifira embere syage kwilaba emisege yʼomo ngetsi. Nasyaleta omwĩtĩ uku nyĩnya wʼomũlwana, oyũkaheraya omwʼitungi, nasyamuletera lũba obũlĩge nʼerisweka.

⁹Oyo wabuta abalinda akakongolũka. Erihumula liwe rĩkalĩre. Bũkamwĩrako ĩbũkĩnalolĩre. Abĩrĩlolĩbwa kwʼesĩsonĩ nʼerihemulwa. Nʼabakasĩgalira kubo, nasyahabo oko mũyalĩ embere wʼesyonzĩgũ syabo, Omwami Mukulu atya.

¹⁰Obũlĩge ũkwʼĩngye, koyo wage, kusangwa mowanyibuta mo mundu wʼamalwa nʼomundu wʼobuhaka oko kihugo kyosĩ! Sinditabweka, kutse abandu sibetambweka, nĩkwa obuli mundu akanyitakira.

¹¹Omwami Mukulu ati, Kwenene ngandikuha obwĩranda busana nʼekibuya, kwenene nasyaleka enzĩgũ iyakusaba oko mugulu wʼekibi nʼomugulu wʼobũlĩge.

¹²Omundu anganatũa ekyuma, ekyuma ekĩkalũa elutambi lwʼendata, kutse omulinga kwehĩ?

¹³Nasyaha ebindu byawe nʼobuteke bwawe mo munyego butsira obũgũlĩ, ni busana nʼebibi byawe byosĩ, nʼomo mitano yawe yosĩ.

¹⁴Neryo nasyaleka esyonzĩgũ syenyũ isyaleta obuteke bwawe omo kihugo, mũtasĩ. Kusangwa omuliro abiriaka omwʼihitana lyage, owakandĩsyabahĩsya.

¹⁵Uwe Mwami Mukulu, uwe wasĩ; unyibuke, ũnyĩlũngũlĩre, ũnyĩkĩsĩraye abakanyendereraya, sũnyĩlũsayeho omwʼiyitondeka lyawe. Uminye ko ngatsumawa busana nawe.

¹⁶Ebĩnywa byawe mobyabanika, nage monalyabyo. Nʼebĩnywa byawe mobyabya obutseme busana nage, nʼeritsanga lyʼomutima wage. Kusangwa ngahulawa omo lĩna lyawe, uwe Mwami Mukulu Nyamuhanga wʼemilondo.

¹⁷Mondĩkala omo ndeko yʼabakayĩtsemesaya, kutse mondatsema. Monĩkala ĩngyowene busana nʼebyala byawe, kusangwa wabĩrĩnyũsũlya nʼerihitana.

¹⁸Busana nakĩ eriagalwa lyage ni ryʼebiro byosĩ, nʼekironda kyage ekitebala, kandi kikagana erilama kwehĩ? Wasyabya busana nage ngʼolũsĩ olukateba, ngʼamagetsi awakuma kwehĩ?

¹⁹Busana nʼekyo, Omwami Mukulu ati, Wamasubula, nasyakũsũbya, wasyahangana embere syage. Kandi wamahũlũkya ebyʼobũgũlĩ erĩlũa omo bibi, wasyabya embũyĩ yage. Basyakusubako, nĩkwa uwe susube kubo.

²⁰Nage nasyakuyira oko bandu aba mo lũhĩmbo lukongotere lwʼomulinga. Nabo nomo basyalwa nawe, nĩkwa sibendĩsyakũkĩnda, kusangwa ĩngye indi haguma nawe erĩkũlamya nʼerĩkũlekerya, Omwami Mukulu atya.

²¹Nasyakũlamya omo byala byʼabandu babi, kandi nasyakũtongolĩa omo byala byʼabatsibu.