Read nande Yeremĩa 17 Bible Online

Yeremĩa 17 - nande bible

Yeremĩa 17

¹Ebibi bya Yũda bĩsakĩre omo kalamu kʼekyuma. Nʼomo busongero bwʼedĩama, bĩsakĩre oko kisayi kyʼomutima wabo, nʼoko syonũnga syʼebiherero byabo.

²Omugulu bakibuka abana babo, litya bakinibuka amaherero wabo nʼesyosanamu sya Asera syabo, hakũhĩ nʼemiti mibisi oko bitwa biri-biri.

³Uwe kitwa kyage omolĩ, nasyaha ebindu byawe nʼobũsokĩ bwawe eribya binyegwa, nʼahʼendata hawe busana nʼebibi, omo mitano yawe yosĩ.

⁴Uwe nawe, wasyũmbya oko kihugo kyawe ekyo nakuha. Nasyaleka iwakolera esyonzĩgũ syawe omo kihugo ekyo gũtasĩ. Kusangwa wabĩrĩakya omuliro omwʼihitana lyage owakandisyaka kera na kera.

⁵Omwami Mukulu ati, Omundu oyukayiketera abandu atakirawe, oyukayiketera amaka wʼabandu, nʼomutima wuwe akatswa oko Mwami Mukulu.

⁶Kusangwa asyabya ngʼebiti byʼomwʼirungu, siendisyalangira omugulu omũyĩsa akasa, nĩkwa asyĩkala ahali amabwe omo mbwarara, ekitaka kyʼomũnyũ, ekite mo mundu.

⁷Obutseme buli oko mundu oyukayiketera Omwami Mukulu, kandi Omwami Mukulu ni ʼyiketera liwe.

⁸Kusangwa asyabya ngʼomuti owaherĩre hakũhĩ nʼamagetsi, owakasanza emĩrĩhĩ yago hakũhĩ nʼolũsĩ, isyaliubaha omugulu wʼerĩhĩka lyʼekĩhũhanĩ, nĩkwa ekikoma kyago kyasyabya kibisi; kandi omo mwaka wʼobugoma sĩalĩkwa ngitsi, kutse sĩendĩsyũmbya eributa ebĩgũma.

⁹Omutima ni wʼeriteba kwilaba emyatsi yosĩ, kandi alwere nabi. Nindi wangatoka eriminyago kwehĩ?

¹⁰Ĩngye Mwami Mukulu ngasonda-sondaya omutima, ngalenga obũlengekanĩa, eriha obuli mundu ngʼesyonzira siwe ko siri, ngʼebyo akakola.

¹¹Ngoko engwali ikalalira amayi ago italekera, nʼoyukabana ebindu butsira omo kwenene, kwʼali atya. Byasyamũsĩganĩa omo katĩkatĩ kʼebiro biwe, naye oko ndũlĩ yiwe asyabya mũkĩrũ.

¹²Omwanya wʼeHekalũ yetu nĩ kĩtũmbĩ kyʼobwami kyʼolukengerwa, ekihangene endata erĩtsũka erĩmbere.

¹³Uwe Mwami Mukulu, uwe maha wa Ĩsraelĩ, abosĩ abakakũsĩganaya basyakwa esĩsonĩ. Abakatswa muna-kihugo, amena wabo asyasakwa omo kitabu, kusangwa babĩrĩsĩganĩa Omwami Mukulu, ye yĩsoko yʼamagetsi wʼengebe.

¹⁴Uwe Mwami Mukulu, ũnyĩlamaye, nage nasyalamĩbwa. Ũndamaye nage ĩnalamĩbwa. Kusangwa uli oyo ngapipa.

¹⁵Lebaya, bakambwira bati, Ekĩnywa kyʼOmwami Mukulu kiri hayi kwehĩ? Kyase lino!

¹⁶Nĩkwa Omukama, ĩngye sinditakuhatikana erĩĩtabo, kutse sinditasonda obũlĩge busana nabo. Uwe ũnasĩ ebyo. Ekyo kyalũa omo mĩnywa yage kyabya embere syawe, ũnasĩkyo.

¹⁷Subye buba busana nage. Uwe uli busagiro bwage oko kiro kyʼerĩkwa.

¹⁸Bahemulawe abakanyendereraya, nĩkwa Suleke ngahemulwa. Uleke bakwe engitsi, nĩkwa Suleke ngakwa engitsi. Ulete kubo ekiro kyʼerĩkwa, ũbũnangebo nʼerihera kabiri!

¹⁹Omwami Mukulu mwabũga nage ati, Ugende, uhangane oko lũkyo lwʼabagala bʼabandu, olo abami bʼeYũda bakingiramo, nʼolo bakahulukamo, nʼomo syongyo syosĩ syʼeYerũsalema.

²⁰Ubwirebo uti, Muhulikirire ekĩnywa kyʼOmwami Mukulu, ĩnywe bami bʼeYũda, nʼeYũda yosĩ, nʼesyondũlanĩ syosĩ syʼeYerũsalema, abakingira omo syongyo esĩ.

²¹Omwami Mukulu ati, Mũyĩtegaye, simuheke omuheke nʼomuguma ekiro kyʼeSabato, kutse simuletego omo syongyo syʼeYerũsalema.

²²Kandi sĩmũhũlũkaye omuheke omo manyũmba wenyũ oko kiro kyʼeSabato, kutse Simukole omũbĩrĩ nʼomuke, nĩkwa muhigule ekiro kyʼeSabato, ngoko nahana abotata wenyũ.

²³Nĩkwa mobatahulikirira, kutse eritega amatwĩ wabo, nĩkwa mobakalya esyongoto syabo bati sĩbowe, kutse erĩowa erikungwa.

²⁴Nĩkwa Omwami Mukulu ati, Mwamanyihulikirira nʼomũhwa, erĩtendĩngĩrya omuheke nʼomuguma omo ngyo syʼomũyĩ oyũ ekiro kyʼeSabato, nĩkwa mukakenga ekiro kyʼeSabato eritindakola omũbĩrĩ nʼomuguma mukyo.

²⁵Neryo abami nʼabanya-mwami basyingira omo syongyo syʼomũyĩ oyũ, ĩbĩkere oko kĩtũmbĩ kyʼobwami kya Dawĩdĩ, ibane oko syogalĩ nʼoko sabayĩrĩ, ibo nʼabanya-mwami babo, abandu bʼeYũda, nʼesyondũlanĩ syʼeYerũsalema, nʼomũyĩ oyũ asyĩkalwamo kera na kera.

²⁶Basyasa bakalũa omo mĩyĩ yʼeYũda, nʼomo ndambi syʼeYerũsalema, nʼomo kihugo kya Benyamĩna, nʼomo kihugo kibonderere, nʼomo kihugo kyʼebitwa, nʼoko bwanga bwʼelutambi lwʼeyĩkwa, ibakaleta amahere wʼerĩokererya, nʼesyohongo, nʼamahere wʼeyĩsyano yʼengano nʼobukwa, ibakaleta esyohongo syʼewasĩngya oko nyũmba yʼOmwami Mukulu.

²⁷Nĩkwa mwamatindanyihulikirira erihigula ekiro kyʼeSabato mo kĩbũyĩrĩre eritindaheka omuheke nʼeriingira omo ngyo syʼeYerũsalema ekiro kyʼeSabato. Neryo nasyakya omuliro omo syongyo syako, nago asyahwerekererya ebikali byʼabami byʼeYerũsalema, nago sĩendĩsyalĩmĩbwa.