Read nande Yeremĩa 2 Bible Online

Yeremĩa 2 - nande bible

Yeremĩa 2

¹Neryo ekĩnywa kyʼOmwami Mukulu mokyambĩkako kiti,

²Ugende, ũtũlĩrego omo matwĩ wʼeYerũsalema uti, Omwami Mukulu akabũga ati, Namibuka obubuya bwʼobũlwana bwawe, nʼolwanzo lwʼerĩhatanĩa lyawe, ngoko wanyikwama omo mbwarara, omo kihugo ekitaherawamo mbuto.

³Ĩsraelĩ abya abũyĩrĩre busana nʼOmwami Mukulu, Obuyilula bwʼerigesa liwe. Abosĩ abalya kubo mobabya nʼolubanza. Omwami Mukulu ati, Obubi mobwahĩka kubo.

⁴Ĩnywe kihanda kya Yakobo, nenyũ ebĩtũnga byosĩ byʼekihanda kya Ĩsraelĩ muhulikirire ekĩnywa kyʼOmwami Mukulu.

⁵Omwami Mukulu ati, Abotata wenyũ mobanyibana kwʼĩbanza libi ryahi, kyaleka ĩbanyĩsĩga hali kwehĩ? Bamakwama emyatsi mitya-mitya, nabo babiribya batya-batya.

⁶Kutse sĩbetabũga bati, Omwami Mukulu ali hahi, oyo watũlũsaya omo kihugo kyʼeMĩsĩrĩ kwehĩ, oyo watusondola omo bwerere, omo kihugo kyʼembwarara nʼekyʼamahya, omo kihugo kyʼenyota nʼekyʼekyũtsũtsũ kyʼoluholo, omo kihugo ekitelaba mo mundu, nʼahatĩkala mundu kwehĩ?

⁷Kandi monabakolya omo kihugo kyʼebĩgũma, nyiti mulye bĩgũma byakyo, nʼobubuya bwakyo. Nĩkwa omugulu mwingira mukyo, momwatsandya ekihugo kyage, nʼomwandu wage momwayirago mo nye.

⁸Abahererĩ mobatabũga bati, Omwami Mukulu ali hahi kwehĩ? Abakahana emigambo mobatanyiminya. Kandi abatabalĩ mobanyĩhalyako nibya, nʼabamĩnyererĩ mobaminyerera busana na Baalĩ, kandi mobakwama emyatsi eyite na ndũndĩ.

⁹Neryo Omwami Mukulu ati, Nasyalwa nenyũ, kandi nasyalwa nʼabitsikulu benyũ.

¹⁰Ego musokere oko bitsira byʼeKĩtĩmũ, mulangire. Mutume eKedarĩ, mũlengekanaye kutsibu, nʼerilangira nga hane omwatsi alingene nʼoyũ!

¹¹Ekihanda kyabiribindula esyonyamuhanga syakyo esite nyamuhanga kwehĩ? Nĩkwa abandu bage babiribindula olukengerwa lwabo busana nʼekite nʼendũndĩ.

¹²Ĩnywe matũkũ, musweke busana nʼekĩ, mwĩte obuyuyu, mubye ngʼekĩma kutsibu, Omwami Mukulu atya.

¹³Kusangwa abandu bage babirikola ebibi bibiri. Babĩrĩnyĩsĩganĩa, ĩngye ĩsoko yʼamagetsi wʼengebe, babiriyitakulira ebĩrĩba, ebĩrĩba ebĩkalũa, ebitetoka eribika amagetsi.

¹⁴Ĩsraelĩ ni mukobe kwehĩ? Ni mukobe wʼembutirwa yʼeka kwehĩ? Busana nakĩ abiribya munyegwa kwehĩ?

¹⁵Esyondale ndere syabirisyamururumira, syabiriruruma kutsibu, kandi syabiriyira ekihugo kiwe mo kĩma. Emĩyĩ yayo yabĩrĩherĩbwa, siyikiri mo bandu.

¹⁶Kandi abandu bʼeMemfĩsĩ nʼeTahapanesĩ babiritulanga omutwe wawe.

¹⁷Sulitayibanira emyatsi eyĩ kusangwa wabĩrĩsĩganĩa Omwami Mukulu Nyamuhanga wawe omugulu akusondola omo nzira kwehĩ?

¹⁸Na lino Ukakolakĩ omo nzira yʼeMĩsĩrĩ kwehĩ? Erĩpũlya amagetsi wʼeNĩlĩ kwehĩ? Kandi Ukakolakĩ omo nzira yʼeAsũrĩa erĩpũlya amagetsi wʼeEfũratĩ kwehĩ?

¹⁹Ebibi byawe ĩwowene byasyakuhabula, nʼerisuba enyũma lyawe lyasyakukunga. Neryo Uminye kandi Ũlebaye kwʼali mwatsi mubi nʼowakalĩhĩre, uti ũkasĩganaya Omwami Mukulu Nyamuhanga wawe, nʼobuba bwage sibuli omwisi wawe, Omukama Omwami Mukulu wʼemilondo atya.

²⁰Kusangwa oko mugulu wa kera nabĩrĩtwa engomo yawe, nʼeritulanga emĩrĩkĩ yawe. Nĩkwa mowabũga uti, Sindiendisyakola! kusangwa oko buli kitwa kiri nʼeyĩkwa oko buli muti mubisi, mowayiyira mo mũsĩngĩrĩ.

²¹Nĩkwa nabya inabirikuhera mo mũlĩkĩ mubuya wʼebĩnyũ, embuto eyiteregula eyowenenga. Ko wamabinduka uti mo mitahi ĩtsandĩre yʼomũlĩkĩ wʼebĩnyũ wʼehandi busana nage kwehĩ?

²²Kusangwa nomo wangayerya omo nĩtre, nʼerĩyĩmĩrya esabũnĩ nyingi, nĩkwa erangĩ yʼebibi byawe ikine embere syage, Nyamuhanga Omwami Mukulu atya.

²³Wangatoka erĩbũga uti, Sindi mũhalĩrya, mondakwama Baalĩ kwehĩ? Tungerera enzira yawe omo musya! Uminye ekyo wabirikola! Uli ngamia ndere yangũhĩre eyĩkayĩgobaya omo nzira syayo,

²⁴epunda yʼomolĩ eyibegere embwarara, eyikakumba okwʼihunga omo ngumbu yayo. Omo mugulu wayo wʼengumbu nindi wangatoka eribindũlayo kwehĩ? Abosĩ abakasonda-sondayo sĩbendĩsyayĩlũhya. Oko mukera wayo basyabanayo.

²⁵Ũkakĩraye ekisando kyawe eribula engendero, nʼomumero wawe sĩakwe enyota. Nĩkwa mowabũga uti, sihali amaha! iyihi! Kusangwa nabirianza abʼehandi, nage nasyakwamabo.

²⁶Ngoko mũrahĩ akahemuka omugulu akahambawa, ekĩtũnga kyʼeĨsraelĩ kikahemuka kitya. Ibo, nʼabami babo, nʼabanya-mwami babo, nʼabahererĩ babo, nʼabamĩnyererĩ babo,

²⁷abakabwira omuti bati, Uli tata wage; nʼoko lĩbwe bati, Uwe wambuta. Kusangwa babĩrĩndolya kwʼemigongo, butsira obũsũ bwabo. Nĩkwa oko mugulu wʼobũlĩge bwabo basyabũga bati, Hangana, ũtũlamaye.

²⁸Nĩkwa esyonyamuhanga syawe wayĩkokoteraya sirihi kwehĩ? Sihangane, syamatoka erĩkũlamya omugulu wʼobũlĩge bwawe. Kusangwa uwe Yũda, emĩyĩ yawe ko yingana, nʼesyonyamuhanga syawe ko na singaho.

²⁹Omwami Mukulu ati, Ko mukalwa nage busana nakĩ kwehĩ? Ĩmwe bosĩ mwabĩrĩnyĩhalyako.

³⁰Mongaswĩrĩraya bagala bawe bo busa. Mobatalĩga erikungwa. Omũyalĩ wenyũ abĩrĩĩta abamĩnyererĩ benyũ, ngʼendale eyĩkaheraya.

³¹Uwe kihanda, mowe ekĩnywa kyʼOmwami Mukulu. Nabiribya mbwarara busana na Ĩsraelĩ kwehĩ? Kutse ekihugo kyʼomwĩrĩmya mungi kwehĩ? Busana nakĩ abandu bage bakabũga bati, Tuli nʼobwĩranda bwʼeriganga-ganga. Sĩtwendĩsyaswahĩka ukʼuwe?

³²Omumbesa anganibirirwa erĩyĩsũga liwe, kutse Omũherũkĩ esyongimba siwe kwehĩ? Nĩkwa abandu bage babirinyibirirwa ebiro bite nʼemiganzo.

³³Wamakokotya enzira yawe erisondasonda olwanzo uti! Busana nʼekyo wabĩrĩkangĩrĩrya abakalĩ babi esyonzira syawe.

³⁴Kandi omo syongimba syawe mukabanika omusasi wʼengebe yʼabera abate nʼomusango. Mutabanabo bakasambula. Nĩkwa busana nʼemyatsi eyĩ yosĩ.

³⁵Mowabũga uti, Sindi ko musango. Lero erihitana liwe lyabĩrĩnyĩlũako. Lebaya, nasyakuleta okwʼitswera, kusangwa ũkabũga uti, Sinditakola ebibi.

³⁶Busana nakĩ ukaganga-ganga eribindula enzira yawe kwehĩ? Wasyakwa esĩsonĩ busana nʼeMĩsĩrĩ, ngoko wakwa esĩsonĩ busana nʼeAsũrĩa.

³⁷Wasyalũa hano, ebyala byawe ibine oko mutwe wawe. Kusangwa Omwami Mukulu abirigana abo wayiketera, kandi siwendisyagasakĩ haguma nabo.