Read nande Yeremĩa 22 Bible Online

Yeremĩa 22 - nande bible

Yeremĩa 22

¹Omwami Mukulu akabũga ati, Wandagalire oko nyũmba yʼOmwami wʼeYũda, ũbũge eyo ekĩnywa ekĩ,

²uti, Uwe mwami wʼeYũda, oyo wĩkere oko kĩtũmbĩ kya Dawĩdĩ kyʼobwami, uhulikirire ekĩnywa kyʼOmwami Mukulu, uwe, nʼabagombe bawe, nʼabandu bawe abakingira omo syongyo esĩ.

³Omwami Mukulu ati, Muyire erĩbanza nʼekitunganene, mũlamaye oyo wahũngawa omo byala byʼomũnũbya wuwe. Simukole nabi kutse erikola omwaga oko wʼehandi, nʼengũbĩ, kutse omũkwakalĩ. Kandi Sĩmũte hano hʼomusasi owate ko musango.

⁴Kusangwa mwamakola omwatsi ogo ngabahana, neryo abami basyingira omo syongyo syʼenyũmba eyĩ ĩbanĩkere oko kĩtũmbĩ kya Dawĩdĩ kyʼobwami, ibane oko syogalĩ nʼesyosabayĩrĩ, iye, omwami nʼabagombe buwe nʼabandu buwe.

⁵Nĩkwa mwamatendĩowa ebĩnywa ebĩ, Omwami Mukulu ati, Ngayĩlahĩrayako nyiti, enyũmba eyĩ yasyabya kĩhũma.

⁶Kusangwa Omwami Mukulu akabũga busana nʼenyũmba yʼOmwami wʼeYũda ati, Uwe uli ngʼeGĩleadĩ ũkwʼĩngye, ngʼomutwe wʼeLebanonĩ. Nĩkwa kwenene nasyakuyira ngʼembwarara nʼemĩyĩ eyite ko bandu.

⁷Kandi nasyasolola abaherya erilwa nawe, obuli mundu nʼebindu byʼamalwa biwe. Nabo basyakonda emĩerezĩ mibuya yawe, basyagusayo omo muliro.

⁸Nʼebihanda bingi byasyalaba hakũhĩ nʼomũyĩ oyũ, nabo basyabwira obuli mundu mũlĩkyabo bati, Busana nakĩ Omwami Mukulu abirikolera omũyĩ munene oyũ wʼatya kwehĩ?

⁹Nabo basyasũbĩrya bati, Ni kusangwa basĩganaya endagano yʼOmwami Mukulu Nyamuhanga wabo, mobaramya esindi nyamuhanga, nʼerikolerasyo.

¹⁰Simulire busana nʼomũholĩ, kutse sĩmũmũsũsũmanire. Nĩkwa mulire busana nʼoyo wagenda ehandi, kusangwa siendisyasubula, kutse erilola oko kihugo abutawamo.

¹¹Kusangwa Omwami Mukulu akabũga busana na Salumu mugala wa Yosĩa, omwami wʼeYũda, oyo watabala omo mwanya wa Yosĩa ĩse wuwe, oyo walũa hano: Siendisyasubayo kandi.

¹²Nĩkwa eyo bamusondola mo munyegwa, eyo yo anemwendisyaholera, isiendisyaswalola oko kihugo kino.

¹³Obũlĩge ũkwʼoyũkahĩmba enyũmba yiwe ahate ekitunganene, nʼebisenge biwe byʼendata ahate erĩbanza lyʼekwenene, oyũkakolesaya omũbĩrĩ wʼomũlĩkyabo butsira ebihembo, kandi isialimuha obũhĩngĩ buwe,

¹⁴oyũkabũga ati, Nasyahĩmba enyũmba nene nʼebyumba byʼendata ebinene binene, nʼerĩyĩtwĩra amadĩrĩsa nʼerĩhĩramo ebisayi byʼemĩerezĩ, ebĩhakabĩrye erangĩ yʼengula.

¹⁵Ukabya mwami kusangwa ukalenga erĩsĩngana omo mĩerezĩ kwehĩ? Tata wawe mwatalya nʼerĩpũlya, nʼerikola ekyʼekwenene, nʼerĩbanza litunganene kwehĩ? Neryo mwĩkala ndeke.

¹⁶Mwatswera omwatsi wʼabera nʼabʼobwaga; neryo omwatsi wuwe mũwana. Erinyiminya si ryeryo kwehĩ? Omwami Mukulu atya.

¹⁷Nĩkwa ameso wawe nʼomutima wawe ni ʼsonda endũndĩ yʼamatebo, nʼerĩũta omusasi ate ko musango, na busana nʼerĩnũbya abandu, na busana nʼerĩpũra ebindu nʼamaka.

¹⁸Neryo Omwami Mukulu akabũga, busana na Yehoyakĩmũ mugala wa Yosĩa, omwami wʼeYũda ati, Sibendimulira, bati, Ĩyo-o, mugala wetu! kutse, Ĩyo-o, mwali wetu! Sibendisyamulira bati, Ĩyo-o mukama! kutse, Ĩyo-o busana nʼobubuya buwe!

¹⁹Asyatabwa ngʼeritabwa lyʼepunda, akakurwa nʼeriguswa eyĩhya oko syongyo syʼeYerũsalema.

²⁰Uhetukire eLebanonĩ ulake, Usumbe omulenge wawe eBasanĩ, Ulakire nibya eAbarĩmũ, kusangwa abĩra bawe bosĩ babĩrĩherĩbwa.

²¹Monabũga nawe omugulu wʼerĩyĩtũndĩkanĩa lyawe, nĩkwa mowabũga uti, Sĩnangowa! Eyĩ ni mibere yawe erĩtsũka obũlwana bwawe, ĩsũlĩowa omulenge wage.

²²Erihunga lyasyatwala abalĩsya bawe bosĩ, nʼabĩra bawe basyaya omo bunyegwa. Kwenene oko mugulu oyo wasyahemuka nʼerĩsĩngwa busana nʼebibi byawe byosĩ.

²³Uwe ndũlanĩ yʼeLebanonĩ, oyukayira Olutu lwawe omo mĩerezĩ, wasyasĩmba uti omugulu amagalĩ asyakũhĩkako, ngʼamagalĩ wʼomũkalĩ oyukakunda!

²⁴Omwami Mukulu ati, Ngoko nyiriho, nomo Konĩa omugala wa Yehoyakĩmũ omwami wʼeYũda angabere mbũka oko byala byage byʼamali, nĩkwa nangakũlũsyaho.

²⁵Kandi nasyakũhĩra omo byala byʼabakasondaya engebe yawe, ega, omo byala byʼabandu abo ukubaha, bye byala bya Nebũkadeneza omwami wʼeBabelĩ, nʼomo byala byʼAbanya Kaldea.

²⁶Kandi nasyakugusa, na koyo wawe oyo wakubuta, omo kindi kihugo, ekyo mutabutawamo, kandi mwasyaholerayo.

²⁷Nĩkwa ekihugo ekyo bakasonda erisubamo, sibendisyasuba mukyo.

²⁸Omundu oyũ ye Konĩa ni nyungu ĩponĩrwe eyĩtũlĩkĩre kwehĩ? Kutse ni nyungu eyĩtetsemesaya mundu kwehĩ? Busana nakĩ bagũsĩrwe eyĩhya iye nʼabana buwe, nʼeriguswa omo kihugo ekyo batasĩ kwehĩ?

²⁹Uwe kihugo, ekihugo, ekihugo, uhulikirire ekĩnywa kyʼOmwami Mukulu!

³⁰Omwami Mukulu ati, Musake omundu oyũ ngʼoyutawite abana, omundu oyutendisyabana erikamaha omo biro biwe, kusangwa sihali omundu oko bana buwe oyo wasyaswabana erikamaha, erĩĩkala oko kĩtũmbĩ kya Dawĩdĩ kyʼobwami kutse eriswatabala eYũda.