Read nande Yeremĩa 24 Bible Online

Yeremĩa 24 - nande bible

Yeremĩa 24

¹Neryo enyũma, Nebũkadeneza omwami wʼeBabelĩ abere abĩhũnga Yekonĩa mugala wa Yehoyakĩmũ, omwami wʼeYũda, nʼabakulu bʼeYũda, haguma nʼabanyima-nyima nʼabahesĩ bʼeYerũsalema, nʼeriretabo eBabelĩ, Omwami Mukulu mwanyĩkangya ahabya ebitiri bibiri byʼemĩtĩnĩ ebĩtekĩre embere wʼeHekalũ yʼOmwami Mukulu.

²Ekitiri kiguma ekirimo emĩtĩnĩ yowene ndeke, ngʼemĩtĩnĩ eyĩkatsũka eriera, nʼekindi kitiri ekirimo emĩtĩnĩ mibi kutsibu, eyitetoka eriribwa, kusangwa ni mibi.

³Neryo Omwami Mukulu mwambwira ati, Yeremĩa, Wamalangirakĩ kwehĩ? Neryo monabũga nyiti, Emĩtĩnĩ, emĩtĩnĩ yowene, mibuya ndeke, nʼemĩtĩnĩ mibi ni mibi kutsibu, eyite yangalibwa, kusangwa ni mibi kutsibu.

⁴Neryo ekĩnywa kyʼOmwami Mukulu mokyanyĩhĩkako, kiti,

⁵Omwami Mukulu Nyamuhanga wa Ĩsraelĩ ati, Ngʼemĩtĩnĩ yowene eyĩ, ko nasyaswalebya nyitya abanyegawa bʼeYũda, ngʼababuya, abo nahiga hano eriya omo kihugo kyʼAbakaldea.

⁶Kusangwa nasyalolya ameso wage go kubo busana nʼebibuya, kandi nasyaswaletabo omo kihugo ekĩ. Kandi nasyahĩmbabo butsira erĩhĩmbũlabo. Kandi nasyahandabo, butsira erikulabo.

⁷Nasyahabo omutima wʼerinyiminya, ko nyiri Mwami Mukulu. Nabo basyabya bandu bage, nage nasyabya Nyamuhanga wabo, kusangwa basyanyisubako nʼomutima wabo gosĩ.

⁸Kandi ngʼemĩtĩnĩ mibi eyo, eyite yangalibwa, kusangwa ni mibi kutsibu, Kwenene, Omwami Mukulu ati, Ko nasyaleka nyitya Zedekĩa omwami wʼeYũda, nʼabakulu buwe, nʼamasĩgalira wʼeYerũsalema, abasĩgala omo kihugo kino, nʼabĩkere omo kihugo kyʼeMĩsĩrĩ.

⁹Nasyayirabo ekyʼerĩũbahya nʼebibi omo mami gosĩ wʼekihugo; babye ekĩponĩrwe nʼomũsyo, nʼerisekwa nʼekĩtsũmĩ, ehosĩ eyo nasyapanza-panzirabo.

¹⁰Kandi nasyatuma omũyalĩ, nʼenzala, nʼendwala yʼakasũsũ, omo katĩkatĩ kabo, erĩhĩka aho basyahwera omo kihugo ekyo nahabo nʼabotata wabo.