Read nande Yeremĩa 26 Bible Online

Yeremĩa 26 - nande bible

Yeremĩa 26

¹Oko nzũko yʼeritabala lya Yehoyakĩmũ mugala wa Yosĩa, omwami wʼeYũda, ekĩnywa ekĩ mokyalũa oko Mwami Mukulu kiti,

²Omwami Mukulu ati, Hangana omo kibuga kyʼenyũmba yʼOmwami Mukulu, Ubwire emĩyĩ yosĩ yʼeYũda abakahĩka omo nyũmba yʼOmwami Mukulu erĩramya, ebĩnywa ebyosĩ ebyo ngakuhana eribwirabo. Sukiruke kwʼekĩnywa nʼekiguma.

³Kwamũhwa basyowa, nʼeribinduka erireka ebibi obuli mundu oko nzira nyibi yiwe, neryo inatoka erireka obũlĩge naganĩraya erikolerabo busana nʼobubi bwʼemĩbĩrĩ yabo.

⁴Nawe wasyabwirabo uti, Omwami Mukulu ati, Mwamatindambulikirira, erirendera omo mahano wage, ago nabĩrĩhĩra embere syenyũ,

⁵erihulikirira ebĩnywa byʼabagombe bage abamĩnyererĩ abo ngabatumira, engendo nyingi, nĩkwa ĩnywe momũtowa,

⁶neryo nasyayira enyũmba eyĩ ngʼeSĩlo, kandi, nasyayira omũyĩ oyũ mo kĩtsũmĩ oko bihanda byosĩ byʼekihugo.

⁷Nʼabahererĩ nʼabamĩnyererĩ nʼabandu bosĩ mobowa Yeremĩa akabũga ebĩnywa ebĩ omo nyũmba yʼOmwami Mukulu.

⁸Neryo Yeremĩa abere abibuga erĩbũga ebyosĩ ebyo Mwami Mukulu amuhana eribwira abandu bosĩ, abahererĩ nʼabamĩnyererĩ nʼabandu bosĩ mobahamba Yeremĩa bati, Lero ukandihola.

⁹Busana nakĩ wabiriminyerera omo lĩna lyʼOmwami Mukulu, uti, Enyũmba eyĩ yasyabya ngʼeSĩlo, nʼomũyĩ oyũ asyabya kĩma, ahate mundu kwehĩ? Kandi abandu bosĩ mobahĩndanira Yeremĩa omo nyũmba yʼOmwami Mukulu.

¹⁰Nʼomugulu abanya-mwami bʼeYũda bowa emyatsi eyĩ, mobalũa omo nyũmba yʼOmwami eriyahetukira omo nyũmba yʼOmwami Mukulu. Mobĩkala omo bwingiriro bʼolũkyo Luhya-luhya lwʼenyũmba yʼOmwami Mukulu.

¹¹Neryo abahererĩ nʼabamĩnyererĩ mobabwira abakulu nʼabandu bosĩ batĩ, Omundu oyũ atolere erihola. Kusangwa abiriminyerera nabi busana nʼomũyĩ oyũ, ngoko mwabĩrĩowa omo matwĩ wenyũ.

¹²Neryo Yeremĩa mwabwira abakula bosĩ nʼabandu bosĩ ati, Omwami Mukulu mwanyituma eriminyerera obũlĩge busana nʼenyũmba eyĩ na busana nʼomũyĩ oyũ omo bĩnywa byosĩ mwabĩrĩowa.

¹³Neryo lino mũwanaye esyonzira syenyũ nʼemĩbĩrĩ yenyũ, mukenge omulenge wʼOmwami Mukulu Nyamuhanga wenyũ. NʼOmwami Mukulu asyayĩkũbya busana nʼobũlĩge abũga busana nenyũ.

¹⁴Nĩkwa ĩngye, lebaya, nyiri omo byala byenyũ. Munyikolere ekibuya nʼekitunganene omo meso wenyũ.

¹⁵Nĩkwa ekiguma muminye, mwamanyĩta, mwasyayiretera omusasi owate ko musango, nʼoko mũyĩ oyũ, nʼoko syondũlanĩ syago. Kusangwa kwenene Omwami Mukulu mwanyituma ũkwʼĩnywe erĩbũga ebĩnywa ebĩ byosĩ omo matwĩ wenyũ.

¹⁶Neryo abakulu nʼabandu bosĩ mobabwira abahererĩ nʼabamĩnyererĩ bati, Omundu oyũ siatolere erihola kusangwa abĩrĩbũga netu omo lĩna lyʼOmwami Mukulu Nyamuhanga wetu.

¹⁷Neryo abandi bʼoko bakulu bʼekihugo mobahangana, mobabwira endeko yʼabandu bati,

¹⁸Mĩka wʼeMoratĩ mwaminyerera oko biro bya Hezekĩa omwami wʼeYũda. Mwabwira abandu bosĩ bʼeYũda ati, Omwami Mukulu wʼemilondo akabũga ati, eSĩonĩ yasyalimwa ngʼeririma, nʼeYerũsalema yasyabya kĩhĩnga, nʼekitwa kyʼenyũmba ikyabya ngʼehitwa omo mũsĩtũ.

¹⁹Hezekĩa omwami wʼeYũda, nʼeYũda yosĩ mobamwĩta kwehĩ? Nĩkwa Hezekĩa mwatubaha Omwami Mukulu nʼerisaba Omwami Mukulu olukogo kwehĩ? NʼOmwami Mukulu mwatayĩkũbya nʼerireka obũlĩge obo abũga busana nabo kwehĩ? Nĩkwa ĩtwe tũkayĩkolesaya ebibi binene busana netu.

²⁰Kandi mohabya omundu oyo waminyerera omo lĩna lyʼOmwami Mukulu, ye Ũrĩa mugala wa Semaya wʼeKĩrĩatĩ-yearĩmũ. Naye mwaminyerera obũlĩge busana nʼomũyĩ oyũ na busana nʼekihugo kino omo bĩnywa byosĩ ebĩsosĩre ebya Yeremĩa.

²¹Neryo omugulu omwami Yehoyakĩmũ, haguma nʼesyombangĩ siwe syosĩ, nʼabakulu bosĩ bowa ebĩnywa biwe, omwami mwasonda erĩmwĩta nĩkwa omugulu Ũrĩa owakyo, mubaha, mwatibita eriya eMĩsĩrĩ.

²²Neryo omwami yo Yehoyakĩmũ mwatuma abandu eMĩsĩrĩ, Elenatanĩ, mugala wa Akĩborĩ, nʼabandi bandu haguma naye eriya eMĩsĩrĩ.

²³Nabo mobenda Ũrĩa yʼeMĩsĩrĩ mobamuleta oko mwami Yehoyakĩmũ, naye mwamwĩta omo mũyalĩ, mwagusa ekĩnda kiwe omo masinda wʼabandu buyira.

²⁴Nĩkwa ebyala bya Ahĩkamũ mugala wa Safamũ byabya haguma na Yeremĩa sĩbamũhĩre omo byala byʼabandu erĩmwĩta.