Read nande Yeremĩa 29 Bible Online

Yeremĩa 29 - nande bible

Yeremĩa 29

¹Ebĩ bye bĩnywa byʼebarua omũmĩnyererĩ Yeremĩa atuma ĩkalũa eYerũsalema eriya oko basĩgalira bʼabakulu bʼabandu abahũngawa, abahererĩ, nʼabamĩnyererĩ, nʼabandu bosĩ abo Nebũkadeneza aheka mo banyegwa erĩlũa eYerũsalema eriya eBabelĩ.

²Yeremĩa mwasaka ebarua eyĩ enyũma wʼerigenda lyʼOmwami Yekonĩa, na nyĩnya wʼOmwami, nʼabakulu, nʼabanya-mwami bʼeYũda nʼeYerũsalema, nʼabanyima-nyima, nʼabahesĩ ĩbamabĩlũa eYerũsalema.

³Ebarua yarumawa omo byala bya Elasa mugala wa Safamũ, na Gemarĩa mugala wa Hĩlkĩa, oyo Zedekĩa omwami wʼeYũda atuma eBabelĩ uku Nebũkadeneza omwami wʼeBabelĩ ati,

⁴Omwami Mukulu wʼemilondo, Nyamuhanga wa Ĩsraelĩ akabwira abosĩ abahũngawa, abo nahũngĩsaya erĩlũa eYerũsalema eriya eBabelĩ nyiti,

⁵Mũhĩmbe amanyũmba, mwĩkale mugo. Muhere amalima, kandi mulye ebĩgũma byago.

⁶Mũtahaye abakalĩ, mubute abagala nʼabali. Mũtahĩraye abagala benyũ bʼabakalĩ, kandi mũherũkaye abali benyũ oko bĩba, imwatoka eributa bagala nʼabali. Mukanyirire eyo, simukehe.

⁷Mũsondaye Obuholo bʼomũyĩ oyo eyo nabahũngĩsaya, musabirego oko Mwami Mukulu. Kusangwa omo buholo bwago mwasyabana Obuholo.

⁸Kusangwa Omwami Mukulu wʼemilondo, Nyamuhanga wa Ĩsraelĩ, akabũga ati, Simuleke abamĩnyererĩ benyũ abali omo katĩkatĩ kenyũ, nʼabalagũlĩ benyũ eribateba. Kutse simuhulikirire erilota eryo bakalota.

⁹Kusangwa bakaminyerera amabehĩ busana nenyũ omo lĩna lyage. Omwami Mukulu ati, Sinditatumabo.

¹⁰Kusangwa Omwami Mukulu akabũga ati, Enyũma wʼemyaka makũmĩ alinda yabibererera busana nʼeBabelĩ, nasyayayo erĩbalũngũlĩra, nʼerĩberererya ekĩnywa kibuya kyage busana nenyũ, erĩbasũbya hano.

¹¹Kusangwa Omwami Mukulu ati, Nyĩnasĩ amalengekanĩa ago ngalengekanaya busana nenyũ, amalengekanĩa wʼobuholo, si wʼekibi, eribaha amaha oko biro byenyũ ebikasa.

¹²Kandi mwasyanyilakira, kandi mwasyasa nʼerinyisaba, nage nasyabahulikirira.

¹³Nenyũ mwasyanyisonda-sonda, mwasyanyibana, omugulu mwasyanyisonda-sonda nʼomutima wenyũ gosĩ.

¹⁴Omwami Mukulu ati, Nage nasyabanika ũkwʼĩnywe, kandi nasyabakũndũla omo bunyegwa bwenyũ, nʼeribakuma-kuma erĩlũa omo bihanda byosĩ nʼehosĩ-hosĩ eyo nabahigira, Omwami Mukulu atya; kandi nasyaswabaleta aho nabalũsaya ngʼabasayĩ.

¹⁵Kusangwa mwabĩrĩbũga muti, Omwami Mukulu abĩrĩtũhanganĩrya abamĩnyererĩ eBabelĩ.

¹⁶Omwami Mukulu akabũga busana nʼomwami oyo wĩkere oko kĩtũmbĩ kyʼobwami kya Dawĩdĩ, na busana nʼabandu bosĩ abĩkere omo mũyĩ oyũ, abagala benyũ abatagenda haguma nenyũ omo bunyegwa.

¹⁷Omwami Mukulu wʼemilondo ati, Lebaya, ngatuma kubo kʼomũyalĩ, nʼenzala, nʼendwala yʼakasũsũ, nasyayirabo ngʼomũtĩnĩ mubi owatetoka eriribwa, kusangwa ni mubi kutsibu.

¹⁸Kandi nasyakwamabo omo mũyalĩ, nʼenzala, nʼendwala yʼakasũsũ, kandi nasyayirabo mwʼekyʼerĩũbahya omo katĩkatĩ kʼamami wʼekihugo, eribya ekĩtakĩrwe, nʼesyonye nʼekyʼeriahirwa, nʼekyʼeriponwa, omo bihanda byosĩ eyo nahigirabo.

¹⁹Omwami Mukulu ati, Kusangwa sibetahulikirira ebĩnywa byage ebyo natumirabo kandi nʼakandi omo bagombe bage abamĩnyererĩ, nĩkwa momũtowa, Omwami Mukulu atya.

²⁰Neryo mowe ekĩnywa kyʼOmwami Mukulu, ĩnywe bosĩ banyegwa, abo nahiga eYerũsalema erilola eBabelĩ.

²¹Omwami Mukulu wʼemilondo, Nyamuhanga wa Ĩsraelĩ akabũga busana na Ahabũ mugala wa Kolaya, na busana na Zedekĩa mugala wa Masea, abakaminyerera busana nenyũ nʼamabehĩ oko lĩna lyage: Lebaya, nasyahĩrabo omo byala bya Nebũkadeneza omwami wʼeBabelĩ, naye asyĩtĩrabo embere syʼameso wenyũ.

²²Kandi busana nabo, abanyegwa bosĩ bʼeYũda abali eBabelĩ, basyahulabo mwʼitakira bati, Omwami Mukulu akuyire nga Zedekĩa, kandi nga Ahabũ, abo omwami wʼeBabelĩ okaya omo muliro,

²³kusangwa babirikola obũkĩrũ omo Ĩsraelĩ ĩbabĩrĩsĩngĩra abakalĩ bʼabalĩkyabo, kandi babĩrĩbũga ebĩnywa byʼamabehĩ omo lĩna lyage, ebyo ndabahana. Nage indi oyukaminya, kandi indi mũlangĩrĩ, Omwami Mukulu atya.

²⁴Kandi busana na Semaya Omũnehelamĩ wasyabũga uti,

²⁵Omwami Mukulu wʼemilondo, Nyamuhanga wa Ĩsraelĩ akabũga ati, Kusangwa wabirituma esyobarua omo lĩna lyawe oko bandu bosĩ abali eYerũsalema, nʼuku Zefania mugala wʼomũhererĩ Masea, nʼoko bahererĩ bosĩ uti,

²⁶Omwami Mukulu abirikuyira mo mũhererĩ omo mwanya wʼomũhererĩ Yehoyada eribya mũlangĩrĩ omo nyũmba yʼOmwami Mukulu, busana nʼobuli mundu oyuli mũsĩre oyukaminyerera, erĩmũhĩra omo mahulula nʼomo mũlĩkĩ wʼekyuma oko bĩkya biwe.

²⁷Neryo lino, busana nakĩ sulitakunga Yeremĩa wʼeAnatotĩ oyukaminyerera ũkwʼĩnywe kwehĩ?

²⁸Kusangwa abiritutumira eBabelĩ ati, Obunyegwa ni buli. Mũhĩmbe amanyũmba, mwĩkale mugo, Muhere amalima, mulye embuto yago.

²⁹Nʼomũhererĩ Zefania mwasomera ebarua eyĩ omo matwĩ wʼomũmĩnyererĩ Yeremĩa.

³⁰Neryo ekĩnywa kyʼOmwami Mukulu mokyahĩka uku Yeremĩa kiti,

³¹Utume oko basayĩ bosĩ uti, Omwami Mukulu akabũga busana na Semaya Omũnehelamĩ: Kusangwa Semaya abiriminyerera busana nenyũ, nage mondamutuma, naye abirireka imwayiketera amabehĩ.

³²Busana nʼekyo, Omwami Mukulu ati, Lebaya nasyasuyira Semaya Omũnehelamĩ nʼabana buwe. Siendisyabya nʼomundu wʼerĩĩkala omo katĩkatĩ kʼabandu aba, kutse siendisyalola oko kibuya ekyo nasyakolera abandu bage, Omwami Mukulu atya, kusangwa abĩrĩbũga ebyʼerihona oko Mwami Mukulu.