Read nande Yeremĩa 30 Bible Online

Yeremĩa 30 - nande bible

Yeremĩa 30

¹Ekĩnywa ekyahĩka uku Yeremĩa kĩkalũa oko Mwami Mukulu kiti,

²Omwami Mukulu Nyamuhanga wa Ĩsraelĩ akabũga ati, Usake omo kitabu ebĩnywa byosĩ ebyo nabĩrĩbũga nawe.

³Kusangwa Omwami Mukulu ati, Lebaya, ebiro bikasa nasyasũbũlya abanyegawa bʼabandu bage Ĩsraelĩ na Yũda. Omwami Mukulu ati, Kandi nasyasũbyabo omo kihugo ekyo naha abotata wabo, nabo basyasĩgalyakyo.

⁴Ebĩ bye bĩnywa Omwami Mukulu abũga busana na Ĩsraelĩ na busana na Yũda.

⁵Kusangwa ati, Twabĩrĩowa omulenge wʼerĩũbahya, nʼobuba, kandi sihali Obuholo.

⁶Mũbũlaye lino, mũlebaye, omulume ngʼakanakunda. Busana nakĩ ngalola oko buli mulume nʼebyala biwe oko mbindi yiwe ngʼomũkalĩ oyukakunda kwehĩ? Busana nakĩ obũsũ bosĩ bukahinduka nʼerĩtũmba kwehĩ?

⁷Ĩ-yoo! kusangwa ekiro ekyo ni kikulu, sihali ekiringene nakyo. Ni mugulu wʼobũlĩge bwa Yakobo, nĩkwa asyalamĩbwa mubo.

⁸Omwami Mukulu wʼemilondo ati, Kyasyabya oko kiro ekyo, nasyatũa engomo omo bĩkya byabo, kandi nasyatũa emĩrĩkĩ yabo. Nʼabʼehandi sibendisyaswamuyira mo mukobe wabo.

⁹Nĩkwa basyakolera Omwami Mukulu, Nyamuhanga wabo, na Dawĩdĩ omwami wabo, oyo nasyahanganĩryabo.

¹⁰Neryo Omwami Mukulu ati, Uwe Yakobo, mugombe wage, Sigubahe. Kutse uwe Ĩsraelĩ, subye nʼengitsi. Kusangwa lebaya, nasyakũlamya inyikine hali, nʼabana bawe omo kihugo kyʼobunyegwa bwabo. Na Yakobo asyasubula, nʼeribya nʼobuholo nʼeriluhuka, isihali omundu wasyamũbahya.

¹¹Omwami Mukulu ati, Ĩngye indi haguma nawe erĩkũlamya, kusangwa nasyaherya kutsibu ebihanda byosĩ eyo nakupanza-panzira, nĩkwa uwe sindiendĩsyakũherya kutsibu, nĩkwa na nasyakukunga omo lĩbanza litunganene, sindiendisyakuleka butsira erikusuyira.

¹²Kusangwa Omwami Mukulu ati, Ekihutale kyawe kitalukene, nʼekironda kyawe ni kitsibu.

¹³Sihali oyo wahanganira omwatsi wawe. Sihali eribala busana nʼekironda kyawe, suwite erilama.

¹⁴Abĩra bawe bosĩ babirikwibirirwa. Sibekusonda-sonda, kusangwa nabĩrĩkũhũtalya nʼekironda kyʼenzĩgũ, nʼerisuyira lyʼomundu Ũkalĩre, kusangwa ebibi byawe ni binene, nʼebibi byawe bĩkanyĩre.

¹⁵Busana nakĩ ukalaka busana nʼekihutale kyawe kwehĩ? Obwagalĩ bwawe butalukene. Kusangwa ebibi byawe ni bingi, kusangwa ebibi byawe bĩkanyĩre, nabirikukolera emyatsi eyĩ.

¹⁶Neryo abosĩ abakakulya basyalibwa nʼesyonzĩgũ syawe syosĩ, obuli muguma wa kubo asyaya omo bunyegwa. Nʼabakakunyega basyanyegwa, nʼabosĩ abakakũhũngako nasyahũngĩsyabo.

¹⁷Omwami Mukulu ati, Nasyakũsũbya kʼomulamo, kandi nasyalamya ebironda byawe, kusangwa babirikwahula mo muguswa, bati: Nĩ Sĩonĩ. Isihali mundu umutsomene.

¹⁸Omwami Mukulu ati, Lebaya, nasyasũbũlya amahema wa Yakobo awanyegawa, nʼerigenyera aho ĩkere. Nʼomũyĩ asyahĩmbwa oko kĩma kyago, nʼekikali kyasyabya aho wakyo ngoko kitula.

¹⁹Nʼewasĩngya yasyahuluka kubo, nʼomulenge wʼabakatsanga, nage nasyakanyĩrĩryabo, kandi sibendisyakeha. Nasyasĩkyabo, nabo sibendisyabya bake-bake.

²⁰Abana babo nabo basyabya ngʼomugulu wʼerĩmbere, nʼendeko yabo yasyasĩka embere syage. Kandi nasyasuyira abosĩ abakanũbayabo.

²¹Omũsondolĩ wabo asyabya wa kubo, nʼomũtabalĩ wabo asyalũa omo katĩkatĩ kabo. Nage nasyamũsegerya hakũhĩ, naye asyasegera hakũhĩ nage, kusangwa nindi angatsama engebe yiwe busana nʼerisegera hakũhĩ nage kwehĩ? Omwami Mukulu atya.

²²Nenyũ mwasyabya bandu bage, nage inabya Nyamuhanga wenyũ.

²³Lebaya, ekihunga kyʼOmwami Mukulu! Erihitana lyabirihuluka, ekihunga ekikakona. Kyasyawa oko mitwe yʼababi.

²⁴Erihitana lĩkalĩre lyʼOmwami Mukulu sĩryendĩsyabũnũkala ate akola, kandi ate aberererya amalengekanĩa wʼomutima wuwe. Mwasyaminyago oko biro byʼenyũma.