Read nande Yeremĩa 33 Bible Online

Yeremĩa 33 - nande bible

Yeremĩa 33

¹Kandi ekĩnywa kyʼOmwami Mukulu mokyahĩka uku Yeremĩa engendo yʼakabiri, omugulu abya iniakinabohere omo kibuga kyʼabateya kiti,

²Omwami Mukulu, oyo wahangika ekihugo ati, Omwami Mukulu oyo wabumbakyo erĩsĩkyakyo—Omwami Mukulu lyo lĩna liwe—ati,

³Unyibirikire, nage ngandĩkũsũbĩrya, nʼerĩkũkangya emyatsi mikulu mikulu, nʼeyĩkalĩre, eyo gũtasĩ.

⁴Kusangwa Omwami Mukulu, Nyamuhanga wʼeĨsraelĩ akabũga busana nʼamanyũmba wʼomũyĩ oyũ, na busana nʼamanyũmba wʼabami bʼeYũda, awasambulawa busana nʼerilwa nʼebĩhĩnga byʼekitaka byʼeribambira omũyĩ na busana nʼomũyalĩ.

⁵Omugulu abandu bahĩka erilwa nʼAbakaldea nʼerĩũsũlya omũyĩ mwʼebĩnda byʼabandu abo nĩta omwʼihitana lyage nʼomwʼigalirwa lyage. Kandi nabĩrĩbĩsa obũsũ bwage oko mũyĩ oyũ, busana nʼebibi byosĩ byabo.

⁶Lebaya, nasyaleterago erinyagasalala nʼerilama, kandi nasyalamyabo; kandi nasyabĩsũlĩrabo obungi bʼobuholo nʼekwenene.

⁷Nasyasũbũlya omũyĩsa wa Yũda, nʼomũyĩsa wa Ĩsraelĩ, nʼerĩhĩmbaho ngoko babya erĩmbere.

⁸Kandi nasyeryabo kwʼebibi byabo byosĩ, ebyo banyĩhalayako. Kandi nasyabuyirabo ebibi byabo byosĩ ebyo banyikolera, nʼebyo banyĩhalayako.

⁹EYerũsalema yasyabya busana nage omũyĩ wʼobutseme, nʼeripipa nʼolukengerwa, embere syʼebihanda byosĩ byʼekihugo, omugulu bakandĩsyowa ebibuya ngakolerabo, neryo bakandisyubaha nʼerititimana busana nʼebibuya byosĩ nʼobuholo bosĩ ngaletera omũyĩ.

¹⁰Omwami Mukulu ati, Hano ho mukahula muti, Nĩ kĩma ahate bandu kutse nyama, omo mĩyĩ ya Yũda nʼomo nzira syʼeYerũsalema, esyabiribya bigenda-nzira, butsira mundu nʼendũlanĩ na butsira enyama, hasyowĩbwa kandi,

¹¹omulenge wʼobutseme, nʼomulenge wʼeritsanga, nʼomulenge wʼĩba wʼomũherũkĩ, nʼomulenge wʼomũherũkĩ, nʼomulenge wʼabo abakabũga bati, Muhe ewasĩngya oko Mwami Mukulu wʼemilondo, kusangwa Omwami Mukulu ni mubuya, kusangwa obubuya buwe bʼolwanzo ni bwa kera na kera; nʼabakaleta esyohongo syʼewasĩngya omo nyũmba yʼOmwami Mukulu. Kusangwa Omwami Mukulu ati, Nasyasũbũlya omũyĩsa wʼekihugo ngoko abya erĩmbere.

¹²Omwami Mukulu wʼemilondo ati, Hano ahali ekĩma, butsira bandu na butsira nyama, nʼomo mĩyĩ yosĩ yaho, hasyabya olũlĩsĩryo aho abalĩsya bakatwala esyombũlĩ syabo.

¹³Omwami Mukulu ati, Omo mĩyĩ yʼekihugo kyʼebitwa, nʼomo mĩyĩ yʼekihugo kyʼobwerere, nʼomo mĩyĩ yʼelutambi lwʼeyĩkwa, nʼomo kihugo kya Benyamĩna, nʼahatĩmbĩre eYerũsalema, nʼomo mĩyĩ ya Yũda, ebihangulo byasyalaba kandi omo byala byʼoyukaganzabyo.

¹⁴Lebaya, Omwami Mukulu ati, ebiro bikasa, aho nasyaberererya ekĩnywa kibuya ekyo nabũga busana nʼekĩtũnga kya Ĩsraelĩ na busana nʼekĩtũnga kya Yũda.

¹⁵Oko biro ebyo, nʼoko mugulu oyo, nasyalasĩrya Dawĩdĩ Omutahi atunganene. Naye asyakolesya erĩbanza nʼekitunganene omo kihugo.

¹⁶Oko biro ebyo Yũda asyalamĩbwa, nʼeYerũsalema yasyĩkala buholo. Nʼerĩ lyo lĩna asyahulwamo: Omwami Mukulu ni ritunganene lyetu.

¹⁷Kusangwa Omwami Mukulu ati, Dawĩdĩ siendisyabula omundu wʼerĩĩkala oko kĩtũmbĩ kyʼobwami kyʼenyũmba yʼeĨsraelĩ.

¹⁸Nʼabahererĩ Abalawĩ sibendisyabula omundu embere syage wʼerihera amahere wʼerĩokererya, nʼerĩhĩsya amahere wʼeyĩsyano yʼengano, nʼerĩkokotya amahere ebiro byosĩ.

¹⁹Nʼekĩnywa kyʼOmwami Mukulu mokyahĩkĩra Yeremĩa kiti,

²⁰Omwami Mukulu ati, Mwamatoka erĩtwa endagano yage busana nʼomusibo, nʼendagano yage busana nʼekiro, isihebya omusibo kutse ekiro omo migulu yabyo,

²¹neryo kwesĩ endagano yage uku Dawĩdĩ omugombe wage iyangatoka erĩtũbwa, neryo ihabula mugala eritabala omo kĩtũmbĩ kiwe kyʼobwami, kandi bitya oko Balawĩ bahererĩ, abakolĩ bage.

²²Ngoko emilondo yʼengũnũnũ yʼomo kyanya itetoka eriganzwa, kutse emisege yʼomo ngetsi itetoka eriganzwa, ko nasyatomeka nyitya abana ba Dawĩdĩ omugombe wage, nʼAbalawĩ abakanyikolera.

²³Ekĩnywa ekyo mokyahĩka uku Yeremĩa, kiti,

²⁴Sũlĩtaganĩrya ebyo abandu aba babĩrĩbũga kwehĩ? Bati, Ebĩtũnga bibiri ebyo Mwami Mukulu ayisoga, abiriganabyo. Ko bakapona batya abandu bage, Sibabye ekihanda kandi omo meso wabo.

²⁵Omwami Mukulu ati, Endagano yage yʼomo musibo nʼomo kiro yamatindahangana, kandi sinditahamula ebihano byʼelubula nʼekihugo,

²⁶neryo nasyagana abana ba Yakobo, nʼabana ba Dawĩdĩ omugombe wage, nʼerĩtendĩmya abana babo eritabalira abana ba Abrahamũ, Ĩsaka na Yakobo. Nĩkwa nasyasũbya omũyĩsa wabo, kandi nasyaganyirabo.