Read nande Yeremĩa 35 Bible Online

Yeremĩa 35 - nande bible

Yeremĩa 35

¹Ekĩnywa ekyahĩka uku Yeremĩa kĩkalũa oko Mwami Mukulu omo biro bya Yehoyakĩmũ mugala wa Yosĩa, omwami wʼeYũda kiti,

²Uye oko kihanda kyʼAbarekabũ, ũbũge nabo, uletebo omo nyũmba yʼOmwami Mukulu, omo kyumba kiguma, uhebo ebĩnyũ byʼerĩpũlya.

³Neryo monatwala Yasanĩa mugala wa Yeremĩa, mugala wa Habazĩnĩa, nʼabagala babo, nʼabagala buwe bosĩ, nʼenyũmba yosĩ ya Rekabũ.

⁴Monaletabo omo nyũmba yʼOmwami Mukulu, omo kyumba kyʼabagala ba Hananĩ mugala wa Ĩgĩdalĩa, omundu wa Nyamuhanga, ekyabya hakũhĩ nʼekyumba kyʼabakulu, ekyabya endata oko kyumba kya Maseya mugala wa Salumu, omũteya wʼolũyĩ.

⁵Kandi monahĩra ebibindi nʼesyondehĩ ebyoswĩre mwʼebĩnyũ, embere syʼabagala bʼenyũmba ya Rekabũ, monabwirabo nyiti, Mũnywe ebĩnyũ.

⁶Nĩkwa mobabũga bati, Sĩtwendĩpũlya ebĩnyũ, kusangwa Yonadabũ mugala wa Rekabũ, tata wetu, mwatuhana, ati, Sĩmũsyepũlaya ebĩnyũ, kera na kera, kutse ĩnywe, kutse abagala benyũ,

⁷kutse sĩmũsyehĩmba enyũmba, kutse erihera embuto, kutse erihera eririma lyʼebĩnyũ, kutse eribya ngʼabenyelyo. Nĩkwa oko biro byenyũ byosĩ mwasyĩkala omo mahema, imwatoka eribyaho biro bingi omo kihugo ekyo mukabungiramo.

⁸Netu twabirikenga omulenge wa Yonadabũ, mugala wa Rekabũ, tata wetu, omo byosĩ atuhana, sĩtũpũlaye ebĩnyũ omo biro byetu byosĩ, ĩtwe, nʼabakalĩ betu, nʼabagala nʼabali,

⁹kutse erĩyĩhĩmbĩra amanyũmba wʼerĩĩkalamo, kandi situwite eririma lyʼebĩnyũ, kutse eririma, kutse embuto.

¹⁰Twabĩrĩĩkala omo mahema, kandi twabirikenga, nʼerikola ngʼebyosĩ tata wetu Yonadabũ atuhana.

¹¹Nĩkwa omugulu Nebũkadeneza omwami wʼeBabelĩ ahĩka eribambira ekihugo, motwabũga tuti, Mwase, tuye eYerũsalema embere wʼabasĩrĩkanĩ bʼAbakaldea, nʼembere wʼabasĩrĩkanĩ bʼAbasĩrĩa. Ko twĩkere tutya eYerũsalema.

¹²Neryo ekĩnywa kyʼOmwami Mukulu mokyahĩka uku Yeremĩa kiti,

¹³Omwami Mukulu wʼemilondo, Nyamuhanga wa Ĩsraelĩ ati, Ugende, Ubwire abandu bʼeYũda nʼesyondũlanĩ syʼeYerũsalema uti, Ko simwendisyangirira erĩkangĩrĩrya erĩowa ebĩnywa byage kwehĩ? Omwami Mukulu atya.

¹⁴Ebĩnywa bya Yonadabũ mugala wa Rekabũ, ebyo ahana bagala buwe, erĩtĩndapũlya ebĩnyũ, byabĩrĩberererĩbwa. Nʼerĩhĩka munabwĩre Sĩbepũlaya ebĩnyũ, kusangwa bakowa erihana lya tata wabo. Nĩkwa nabĩrĩbũga nenyũ, kandi nʼakandi, nĩkwa simwetambulikirira.

¹⁵Kandi nabiribatumira abagombe bage bosĩ abamĩnyererĩ, eritumabo kandi nʼakandi nyiti, Lino musubule obuli mundu alũe omo nzira nyibi yiwe, mũtũngananaye emĩbĩrĩ yenyũ, kandi simukwame esindi nyamuhanga erĩramyasyo, neryo mwasyĩkala omo kihugo ekyo nabiribaha nʼabotata-kulu wenyũ. Nĩkwa momutatega amatwĩ wenyũ, kutse erimbulikirira.

¹⁶Kwenene abagala ba Yonadabũ mugala wa Rekabũ baberereraya erihana lya tata wabo eryo ahanabo, nĩkwa abandu aba sibetambulikirira.

¹⁷Busana nʼekyo, Omwami Mukulu, Nyamuhanga wʼemilondo, Nyamuhanga wʼeĨsraelĩ, ati, Lebaya, nasyaleta uku Yũda nʼoko syondũlanĩ syosĩ syʼeYerũsalema erĩkwa lyosĩ eryo nabĩrĩbũga busana nabo. Kandi kusangwa nabũga nabo, nĩkwa mobatowa. Nabirikirabo, nĩkwa sĩbetasũbĩrya.

¹⁸Neryo Yeremĩa mwabũga nʼenyũmba yʼAbarekabũ ati, Omwami Mukulu wʼemilondo, Nyamuhanga wʼeĨsraelĩ ati, Kusangwa mwabirikenga erihana lya tata wenyũ Yonadabũ, nʼeribika amahano wuwe gosĩ nʼerikola ngʼebyosĩ abahana.

¹⁹Busana nʼekyo, Omwami Mukulu wʼemilondo, Nyamuhanga wa Ĩsraelĩ ati, Yonadabũ mugala wa Rekabũ siendisyabula omundu wʼerihangana embere syage ebiro byosĩ.