Read nande Yeremĩa 39 Bible Online

Yeremĩa 39 - nande bible

Yeremĩa 39

¹Neryo omugulu eYerũsalema yahũngawa omo mwaka wʼomwenda owʼeritabala lya Zedekĩa omwami wʼeYũda, oko mukera wʼerĩkũmĩ, Nebũkadeneza omwami wʼeBabelĩ mwasa nʼabasĩrĩkanĩ buwe bosĩ nʼerilwa nʼeYerũsalema, mobabambirago.

²Omo mwaka wʼerĩkũmĩ nʼomuguma wa Zedekĩa, oko mukera wʼakani, ekiro kyʼomwenda kyʼomukera, olũhĩmbo lwʼomũyĩ molwatobolwa.

³Neryo abakulu bosĩ bʼomwami wʼeBabelĩ mobingiramo, mobĩkala omo Lũkyo lwʼomo katĩkatĩ, ye Nergalĩ-Sarezerĩ, Samgarĩ-Nebo, Sarsekĩmũ, Raba-sarĩsĩ, Nergalĩ-Sarezerĩ, Raga-magĩ, nʼabandi bakalu bosĩ bʼomwami wʼeBabelĩ.

⁴Neryo omugulu Zedekĩa omwami wʼeYũda nʼabandu bosĩ bʼamalwa balangirabo, mobatibita, mobalũa omo mũyĩ omo kiro, omo nzira yʼeririma lyʼOmwami omo lũkyo lwʼomo katĩkatĩ kʼesyombĩmbo ĩbĩrĩ. Mobahuluka bakalolya eAraba.

⁵Nĩkwa abasĩrĩkanĩ bʼAbakaldea mobakwamabo, mobeya Zedekĩa omo bwerere bwʼeYerĩko. Neryo babere babimuhamba, mobamuletera Nebũkadeneza omwami wʼeBabelĩ eRĩbla omo kihugo kyʼeHamatĩ, naye mwamutswera.

⁶Neryo omwami wʼeBabelĩ mwĩtĩra bagala ba Zedekĩa eRĩbla, embere syʼameso wuwe. Kandi omwami wʼeBabelĩ mwĩta abakulu bosĩ bʼeYũda.

⁷Kandi mwalola ameso wa Zedekĩa, kandi mwamuboha omo mĩrĩkĩ yʼebyuma byʼemiringa erimutwala eBabelĩ.

⁸NʼAbakaldea mobahĩsya ekikali kyʼOmwami, nʼamanyũmba wʼabandu omo muliro, mobaterya esyombĩmbo syʼeYerũsalema.

⁹Neryo omukulu wʼabateya ye Nebũzaradanĩ mwahũnga abasaka oko bandu, abasĩgala omo mũyĩ eritwalabo eBabelĩ mo basayĩ nʼabandu abatswa bakaya oko luhande luwe, nʼabandi oko bandu abasĩgala.

¹⁰Nĩkwa Nebũzaradanĩ omukulu wʼabateya mwaleka abera bʼabandu, ababya batawite ekindu omo kihugo kyʼeYũda, mwahabo amalima wʼebĩnyũ nʼawandi malima oko mugulu oyo.

¹¹Neryo omwami wʼeBabelĩ ye Nebũkadeneza mwahana Nebũzaradanĩ omukulu wʼabateya busana na Yeremĩa ati,

¹²Ũmwĩmaye, ũmũtegaye ndeke, sumukole nabi. Nĩkwa umukolere ngoko akakubwira.

¹³Neryo Nebũzaradanĩ omukulu wʼabateya, mwatuma ekĩnywa haguma na Nabũsazbanĩ omukulu wʼababũnĩre, na Nergalĩ-Sarezerĩ omukulu, nʼabakulu bosĩ bʼomwami wʼeBabelĩ.

¹⁴Mobatuma nʼerĩlũsya Yeremĩa omo kibuga kyʼenyũmba yʼobũteya, nʼerimuha uku Gedalĩa mugala wa Ahĩkamũ, mugala wa Safanũ, amutwale eka wuwe. Neryo mwĩkala omo katĩkatĩ kʼabandu atya.

¹⁵Neryo ekĩnywa kyʼOmwami Mukulu mokyahĩka uku Yeremĩa omugulu abya abohere omo kibuga kyʼenyũmba yʼabateya, kiti,

¹⁶Ugende, Ubwire Omũetĩopĩa yo Ebedĩmelekĩ uti, Omwami Mukulu wʼemilondo, Nyamuhanga wʼeĨsraelĩ ati, Lebaya, ngaletera omũyĩ oyũ ebĩnywa byage busana nʼerĩkwa butsira omũyĩsa. Nabyo byasyaberererĩbwa embere syawe oko kiro ekyo.

¹⁷Nĩkwa Omwami Mukulu ati, Nasyakũlamya ekiro ekyo. Kandi siwendisyahabwa omo byala byʼabandu abo ukubaha.

¹⁸Kusangwa kwenene nasyakũlamya, isiwendisyawa omo mũyalĩ, nĩkwa wasyabala nʼengebe yawe, kusangwa wabiriyiketera ngye, Omwami Mukulu atya.