Read nande Yeremĩa 4 Bible Online

Yeremĩa 4 - nande bible

Yeremĩa 4

¹Omwami Mukulu ati, Wamasonda erisubula, uwe Ĩsraelĩ, neryo litolere Unyisubeko, kandi wamasonda erĩlũsya esyonye syawe embere syʼameso wage, isiwendisyatika-tika,

²nawe wasyalahĩrya uti, Ngoko Mwami Mukulu aliho, omo kwenene, omo lĩbanza libuya, nʼomo litunganene; neryo ebihanda byasyayitsumula umwʼiye, kandi basyayipipa umwʼiye.

³Kusangwa Omwami Mukulu akabwira abalume bʼeYũda nʼeYerũsalema ati, Ulime ekitaka kyenyũ kĩtalĩmĩre, kandi simubibe omo katĩkatĩ kʼemisakisaki.

⁴Mũyĩbanaye busana nʼOmwami Mukulu, mũlũsaye obũsonĩ bwʼemitima yenyũ, ĩnywe balume ba Yũda nʼesyondũlanĩ syʼeYerũsalema. Erihitana lyage likasyahuluka ngʼomuliro, nʼeriaka isihali oyo wangalĩmyago, busana nʼobubi bwʼemĩbĩrĩ yenyũ.

⁵Mũtũlego eYũda, kandi mũkangayekyo omo Yerũsalema; muti Mubuhe engubi omo kihugo. Mubirikire kutsibu muti, Mũyĩhĩndanaye, tugende oko mĩyĩ ikongotere.

⁶Musumbe ebendera erĩlolya eSĩonĩ. Mutibite mubale, simulindirire, kusangwa nasyaleta obubi bũkalũa elutambi lwʼendata nʼerĩherya ĩnene.

⁷Endale yabirihetuka ĩkalũa omo kisaka kyayo, nʼOmũherya wʼebihanda alimwasa omo nzira, abĩrĩlũa aho wuwe, eriyira ekihugo kyawe mo kĩma, emĩyĩ yawe yasyabya mulala, ahate ndũlanĩ.

⁸Busana nʼekyo muyibohe emisarandwe, mũsũsũmane mulire. Kusangwa erihitana lĩkalĩre lyʼOmwami Mukulu sĩryetatũlũako.

⁹Neryo Omwami Mukulu ati, Oko kiro ekyo kikandisyabya, omutima wʼOmwami asyalĩma, nʼomutima wʼabanya-mwami nibya. Abahererĩ basyasweka, nʼabamĩnyererĩ basyagasama.

¹⁰Nage monabũga nyiti, Ĩlolo, Mukama Nyamuhanga! Kwenene wabiriteba abandu aba bo kutsibu, nʼeYerũsalema, uti, Mwasyabya nʼobuholo; nĩkwa omũyalĩ abĩrĩhĩka oko mumero.

¹¹Oko mugulu oyo abandu aba nʼeYerũsalema basyabwirwa ambu, Erihunga lĩhũhĩre likasira oko mitwe yʼebitwa byʼobwerere omo mbwarara erĩlolya eyiri mwali wʼabandu bage, erĩtegũlũkaya, kutse erĩerya!

¹²Erihunga lyʼamaka erĩlabĩre erĩ lyasyasa busana nʼerihamula lyage. Lino nasyatũa eritswera lyabo.

¹³Lebaya, akasyahetuka ngʼebĩtũ, nʼesyogalĩ siwe syʼamalwa syasyabya ngʼakanyabungu. Esyosabayĩrĩ siwe syangũhĩre kwilaba amasamba. Obũlĩge kwĩtwe, kusangwa twabiritsanda!

¹⁴Uwe Yerũsalema, weraye omutima wawe kwʼebibi, ubane erĩlamĩbwa. Amalengekanĩa wawe mabi asyĩkala omwisi wawe erĩkolyahi kwehĩ?

¹⁵Kusangwa omulenge akalũa eDanĩ akatũlago, nʼerĩkangya ebibi erĩlũa oko bitwa bya Efũraĩmũ.

¹⁶Mũtũlego oko bihanda lino! Mũtũlego busana nʼeYerũsalema, abahũngĩ abalũa oko kihugo kyʼehali, ibakatanda omulenge wabo erilwa nʼemĩyĩ yʼeYũda.

¹⁷Omwami Mukulu ati, Bakamũtĩmbako ngʼabateya bʼeririma, kusangwa abirinyihonako.

¹⁸Enzira yawe nʼemĩbĩrĩ yawe yabĩrĩkũkolya kwʼemyatsi eyĩ. Obũ bo bubi bwawe. Bũkalĩhĩre buti! Bũhĩkĩre oko mutima wawe buti!

¹⁹Ekĩrĩmũ kyage! Ekĩrĩmũ kyage! Ngagalawa! Uwe mutima wage! Omutima wage akalũa omo nda. Sinditoka erihuna, kusangwa uwe mutima wage, wabĩrĩowa omulenge wʼengubi, ehee yʼamalwa.

²⁰Erĩherya lĩkwamĩre erĩherya lĩkabũgawa, kusangwa ekihugo kyosĩ kyamakwa. Lũba-lũba esyohema syage sĩkaherĩbawa, nʼesyongimba syage esĩkasũkũlĩraya sĩkaherĩbawa neryo-neryo.

²¹Erĩhĩka omugulu wahi nasyasamalira ebendera, nʼerihulikirira omulenge wʼengubi kwehĩ?

²²Kusangwa abandu bage nĩ bakĩrũ, sĩbanyasĩ. Ni bana batyabatya, kandi sibawite amenge. Bawite amenge wʼerikola ebibi, nĩkwa sĩbasĩ erikola ndeke.

²³Monasamalira ekihugo, neryo talebaya, ikyabiribya busa ĩsĩmũlĩkĩ. Monalangira amatũkũ, nago isiawite ekyakakala.

²⁴Monasamalira ebitwa, lebaya, mobyatitimana, nʼebitwa bike-bike byosĩ mobyahũma-hũma.

²⁵Monasamalira, neryo, isihali mundu, nʼesyonyonyũ syosĩ syʼomo kyanya syabiritibita.

²⁶Monalangira, neryo lebaya, eririma eryeraya kutsibu lyabya mbwarara, nʼemĩyĩ yakyo yosĩ yabirisambukala embere syʼOmwami Mukulu, nʼembere syʼerihitana litsibu liwe.

²⁷Kusangwa Omwami Mukulu ati, Ekihugo kyosĩ kyasyabya kĩma, nĩkwa ekyosĩ sĩndĩendĩsyaheryakyo.

²⁸Busana nʼekĩ ekihugo kyasyalira, nʼamatũkũ endata asyakĩna. Kusangwa nabĩrĩbũgakyo, nabĩrĩganĩryakyo, isindiendisyaleka obũlengekanĩa obo kutse sindiendisyahinduka.

²⁹Obuli mũyĩ akasaga busana nʼolukanda lwʼabali oko sabayĩrĩ nʼabʼamata. Bakingira omo bisaka bakasamba oko mabwe. Obuli mũyĩ abĩrĩsĩganĩbwa, isihakiri mundu oyo wĩkere mugo.

³⁰Nawe, omundu wʼobũlĩge, wasyakolakĩ kwehĩ? Nomo wangambala esyʼomunyama, nomo wangayĩsũga omo byambalo byʼesyamagetsi, nomo wangagalĩhya ameso wawe omo rangĩ, ũkayĩtendereraya busa, abanze bawe bakakupona, bakasonda-sonda engebe yawe.

³¹Kusangwa monowa erilaka ngʼeryʼomũkalĩ ukakunda, eriagalwa lyʼoyukabuta omwana wuwe wʼerĩmbere, omulenge wa mwali wʼeSĩonĩ, oyukahumulikana busana nʼomuka, oyukasanza ebyala biwe, ati, Lino, obũlĩge ũkwʼĩngye! Kusangwa omutima wage akalembera embere syʼabĩtĩ!