Read nande Yeremĩa 40 Bible Online

Yeremĩa 40 - nande bible

Yeremĩa 40

¹Ekĩnywa ekyahĩka uku Yeremĩa kĩkalũa oko Mwami Mukulu enyũma Nebũzaradanĩ omukulu wʼabateya abimubohola eRama, omugulu amutwala ĩnĩabohĩre omo mahulula omo katĩkatĩ kʼabanyegwa bosĩ bʼeYerũsalema nʼeYũda, abatwalawa mo banyegwa eBabelĩ.

²Neryo omukulu wʼabateya abya iniabirihamba Yeremĩa, mwamubwira ati, Omwami Mukulu, Nyamuhanga wawe mwalaga erĩkwa erĩ busana na hano.

³Kandi omwami Mukulu abiriretalyo nʼerikola ngoko alaga kusangwa mwabĩrĩhalĩrya Omwami Mukulu, kandi simwetakenga omulenge wuwe, kikaleka omwatsi oyũ ĩnĩabahĩkako.

⁴Na lino, lebaya, ngakubohola mũnabwĩre kwʼamahulula awali oko byala byawe. Wamasĩma erigenda haguma nage eBabelĩ, wase, nasyakulembera ndeke. Nĩkwa wamatĩndasĩma eriasa haguma nage eBabelĩ, sihali mwatsi. Lebaya, ekihugo kyosĩ kiri embere syawe. Aho gũkasĩma nʼahatolere omo meso wawe uyeho.

⁵Neryo omugulu Yeremĩa ate agenda, mwabũga ati, Usube eyiri Gedalĩa mugala wa Ahĩkamũ, mugala wa Safanũ, oyo mwami wʼeBabelĩ ayira mo mũtabalĩ oko mĩyĩ yʼeYũda, Wĩkale naye omo katĩkatĩ kʼabandu, kutse ugende eyo ahatolere omo meso wawe. Neryo omukulu wʼabateya mwamuha akalyo nʼolũsũnzo, kandi mwamuleka ati agende.

⁶Neryo Yeremĩa mwaya eyiri Gedalĩa mugala wa Ahĩkamũ eMĩsĩpa, mwĩkala haguma naye omo katĩkatĩ kʼabandu abasĩgala omo kihugo.

⁷Neryo abakulu bosĩ bʼemilondo ababya omolĩ, ibo nʼabandu babo, mobowa ambu omwami wʼeBabelĩ abĩrĩhĩra Gedalĩa mugala wa Ahĩkamũ mo mũtabalĩ omo kihugo, kandi inabirimuha erĩteya abalume, nʼabakalĩ, nʼabana, abera kutsibu bʼekihugo abatahekawa mo banyegwa eBabelĩ.

⁸Neryo mobahĩka uku Gedalĩa eMĩsĩpa, haguma na Ĩsĩmaelĩ mugala wa Netanĩa, na Yohananĩ na Yonatana abagala ba Karea, na Seraya mugala wa Tanũhĩmetĩ, nʼabagala ba Efaĩ Omũnetofatĩ, na Yezanĩa mugala wa Makatĩtĩ, ibo nʼabalume babo.

⁹Na Gedalĩa mugala wa Ahĩkamũ, mugala wa Safanũ mwalahĩrya kubo nʼoko balume babo ati, Simubahe erikolera Abakaldea. Mwĩkale omo kihugo, mukolere omwami wʼeBabelĩ, imwatoka erĩowana.

¹⁰Nĩkwa ĩngye, lebaya nasyĩkala eMĩsĩpa, eribahanganira embere syʼAbakaldea abakatũhĩkako. Nĩkwa ĩnywe, mwohe ebĩnyũ nʼebĩgũma byʼekirimo kyʼomwisi, nʼamagũta, mũhĩrebyo omo nyungu syenyũ, kandi mwĩkale omo mĩyĩ yenyũ eyo mwabĩrĩhũnga.

¹¹Nibya Abayũda bosĩ ababya eMoabũ, nʼomo katĩkatĩ kʼabana ba Amonĩ, nʼabʼeEdomũ, nʼababya omo bindi bihugo byosĩ, mobowa ngoko mwami wʼeBabelĩ abĩrĩsĩga abasĩgalira bʼeYũda, nʼakandi ngoko abĩrĩhĩra Gedalĩa mugala wa Ahĩkamũ mugala wa Safanũ eritabalirabo.

¹²Neryo Abayũda bosĩ mobasubula bakalũa ehosĩ bahiyirawa, mobahĩka omo kihugo kyʼeYũda, nʼuku Gedalĩa, eMĩsĩpa, moboha ebĩnyũ nʼebĩgũma byʼekirimo kyʼomwisi ebingi kutsibu.

¹³Neryo Yohananĩ mugala wa Karea, nʼabakulu bosĩ bʼemilondo yʼabasĩrĩkanĩ eyabya omolĩ mobahĩka uku Gedalĩa eMĩsĩpa.

¹⁴Mobamubwira bati, Ũnasĩ ngoko Baalĩsĩ omwami wʼabana ba Amonĩ abirituma Ĩsĩmaelĩ mugala wa Netanĩa erĩkwĩta kwehĩ? Nĩkwa Gedalĩa mugala wa Ahĩkamũ mwatĩkĩrĩryabo.

¹⁵Neryo Yohananĩ mugala wa Karea mwabwira Gedalĩa eMĩsĩpa bũbĩso-bĩso ati, Ngakũbũlaya uleke nyigende erĩĩta Ĩsĩmaelĩ mugala wa Netanĩa, isihali mundu wasyaminyago. Busana nakĩ angakwĩta, nʼAbayũda bosĩ ababĩrĩhĩndana aho guli ibapanza-panzwa, nʼamasĩgalira wʼeYũda iniahera kwehĩ?

¹⁶Nĩkwa Gedalĩa mugala wa Ahĩkamũ mwabwira Yohananĩ mugala wa Karea ati, Susyekola omwatsi oyũ, kusangwa ukahandikirira Ĩsĩmaelĩ nʼamabehĩ.