Read nande Yeremĩa 44 Bible Online

Yeremĩa 44 - nande bible

Yeremĩa 44

¹Ekĩnywa ekyahĩka uku Yeremĩa busana nʼAbayũda bosĩ abĩkere omo kihugo kyʼeMĩsĩrĩ, ababya bĩkere eMĩgdolĩ, nʼeTapanesĩ, nʼeNofũ, nʼomo kihugo kyʼePatro, kiti,

²Omwami Mukulu wʼemilondo, Nyamuhanga wa Ĩsraelĩ ati, Mwabirilangira ebitsibu byosĩ ebyo nabiriretera eYerũsalema, nʼoko mĩyĩ yosĩ yʼeYũda. Kandi, lebaya, mũnabwĩre nĩ kĩma, sihali mundu wĩkere muyo.

³Busana nʼebibi byabo ebyo bakola nʼerĩnyĩhĩtanĩa, kusangwa mobayahĩsya obukwa, nʼerikolera esindi nyamuhanga, esyo batabya basĩ, kutse ibo, kutse ĩnywe, kutse abotata wenyũ.

⁴Nĩkwa monabatumira abagombe bage bosĩ abamĩnyererĩ, kandi nʼakandi, nyiti, Koko, Simukole omwatsi oyũ wʼesyonye, ogo ngakwa obusu.

⁵Nĩkwa mobatowa, kutse eritega okũtũ kwabo erireka ebibi byabo nʼerĩtĩndahĩsya obukwa oko Sindi nyamuhanga.

⁶Kyaleka erihitana lyage nʼeriagalirwa lyage ĩbyũtũlĩrwa nʼeriaka omo mĩyĩ yʼeYũda, nʼomo nzira syʼeYerũsalema. Nayo yabiribya mulala nʼekĩma, ngoko biri mũnabwĩre.

⁷Neryo lino Omwami Mukulu, Nyamuhanga wʼemilondo, Nyamuhanga wʼeĨsraelĩ ati, Busana nakĩ mukakola erĩkwa lingaha busana nenyũ kwehĩ? Muti mũkĩta omo katĩkatĩ kenyũ abalume nʼabakalĩ, nʼabana, nʼesyomekeke, omo katĩkatĩ kʼeYũda, nʼerĩtĩndasakya nʼomuguma,

⁸ĩmũkanyĩhĩtanaya omo mĩbĩrĩ yʼebyala byenyũ, erĩhĩsya obukwa oko Sindi nyamuhanga omo kihugo kyʼeMĩsĩrĩ, eyo mukaya erĩĩkala, imwatoka erihola, nʼeribya kĩtsũmĩ nʼekyʼerisekwa omo katĩkatĩ kʼebihanda byosĩ byʼekihugo.

⁹Mwabiribirirwa ebibi byʼabotata wenyũ, nʼebibi byʼabami bʼeYũda, nʼebibi byʼabakalĩ babo, nʼebibi byenyũ, nʼebibi byʼabakalĩ benyũ, ebyo bakola omo kihugo kyʼeYũda, nʼomo nzira syʼeYerũsalema kwehĩ?

¹⁰Sĩbetayĩkehya nʼerĩhĩka mũnabwĩre, kutse sibetubaha, kutse erirendera omo migambo yage, kutse omo bihano byage, ebyo nahĩra embere syenyũ nʼembere syʼabotata wenyũ.

¹¹Neryo busana nʼekyo Omwami Mukulu wʼemilondo, Nyamuhanga wa Ĩsraelĩ, ati, Lebaya, nasyabaletera erĩkwa, nʼerĩherya eYũda yosĩ.

¹²Nage nasyalũsya abasĩgalira bʼeYũda, ababĩrĩyĩsũnza eriya omo kihugo kyʼeMĩsĩrĩ erĩĩkalayo, nʼabosĩ basyahwa omo kihugo kyʼeMĩsĩrĩ. Basyakwa omo mũyalĩ, nʼomo nzala. Basyahola erĩtsũka oko muke nʼerĩhĩka oko mukulu omo mĩyalĩ, nʼomo nzala. Kandi basyabya batakirwa, nʼekindu kyʼesyonye, nʼekĩtsũmĩ, nʼekyʼeriponwa.

¹³Kusangwa nasyasuyira abĩkere omo kihugo kyʼeMĩsĩrĩ, ngoko nabirisuyira eYerũsalema, omo mũyalĩ, nʼomo nzala, nʼomo ndwala yʼakasũsũ.

¹⁴Byasyaleka ihatabya nʼomuguma wʼabasĩgalira bʼeYũda ababiriya omo kihugo kyʼeMĩsĩrĩ erĩĩkalayo, oyo wasyabala, kutse erisaka, okwʼisubula omo kihugo kyʼeYũda, ekyo bakayiketera erisubamo nʼerĩĩkalayo. Kusangwa sihali oyo wasyasubula, ba nʼabasayĩ bake.

¹⁵Neryo abalume bosĩ ababya basĩ kwʼabakalĩ babo bahĩsaya obukwa oko Sindi nyamuhanga, nʼabakalĩ bosĩ abimana hakũhĩ, endeko nene, ba bandu bosĩ ababya bĩkere omo kihugo kyʼeMĩsĩrĩ, ePatro, mobasũbĩrya Yeremĩa batĩ,

¹⁶Ekĩnywa ekyo watubwira omo lĩna lyʼOmwami Mukulu, sitwendikuhulikirira!

¹⁷Nĩkwa twasyaberererya obuli kĩnywa ekyabirihuluka omo buno bwetu, erĩhĩsya obukwa oko mwami-kalĩ wʼelubula, nʼerĩmũtũlĩra amahere wʼerĩpũlya, ngoko twabirikola, ĩtwe nʼabotata wetu, nʼabami betu, nʼabanya-mwami betu bakola omo mĩyĩ yʼeYũda, nʼomo nzira syʼeYerũsalema. Kusangwa oko mugulu oyo twabya nʼakalyo kangi, motwĩkala ndeke, motutalola uku kitsibu.

¹⁸Nĩkwa omugulu tũmbaya erĩhĩsya obukwa oko mwami-kalĩ wʼelubula nʼerĩmũtũlĩra amahere wʼerĩpũlya, twabiribula ebindu byosĩ, kandi twabirihwa omo mũyalĩ nʼenzala.

¹⁹Nʼomugulu twahĩsaya amahere oko mwami-kalĩ wʼelubula, nʼerĩmũtũlĩra amahere wʼerĩpũlya, twabya isituli nʼabiba twe omugulu twamutsumbira ebitole omo kĩsosekanĩo kiwe, nʼerĩmũtũlĩra amahere wʼerĩpũlya kwehĩ?

²⁰Neryo Yeremĩa mwabwira abandu bosĩ, abalume nʼabakalĩ, abandu bosĩ abamũsũbĩraya bʼatya—ati,

²¹Nĩkwa busana nʼamahere awakatũmba ogo mwalũsaya omo mĩyĩ yʼeYũda nʼomo nzira syʼeYerũsalema, ĩnywe nʼabotata wenyũ, nʼabami benyũ, nʼabanya-mwami benyũ, nʼabandu bʼekihugo, Omwami Mukulu mwatibukabo, mokĩtahĩka omo bũlengekanĩa buwe kwehĩ?

²²Kyaleka Omwami Mukulu iniatatoka eriyisiga busana nʼebibi byʼemĩbĩrĩ yenyũ, na busana nʼesyonye esyo mwabirikola. Kikaleka ekihugo kyenyũ ikyabya kĩma, nʼekindu kyʼesyonye, nʼekĩtsũmĩ, ekite mo mundu, ngoko kiri mũnabwĩre.

²³Kusangwa mwabĩrĩokererya amahere oko Sindi nyamuhanga na kusangwa mwabirikola ebibi oko Mwami Mukulu, isimwetakenga omulenge wʼOmwami Mukulu, kutse erirendera omo migambo yiwe, kutse omo mahano wuwe, kutse erĩtũlago liwe. Busana nʼekyo erĩkwa erĩ ryabĩrĩbahĩkako, ngoko liri mũnabwĩre.

²⁴Kandi Yeremĩa mwabwira abandu bosĩ, nʼabakalĩ bosĩ ati, Mowe ekĩnywa kyʼOmwami Mukulu ĩnywe bosĩ ba Yũda abali omo kihugo kyʼeMĩsĩrĩ.

²⁵Omwami Mukulu wʼemilondo, Nyamuhanga wʼeĨsraelĩ ati, Ĩnywe nʼabakalĩ benyũ mwabĩrĩbũga omo buno bwenyũ, nʼerĩberereryago omwʼikola lyenyũ, muti kwenene twasyaberererya erilaga lyetu eryo twalaga, erĩhĩsya amahere oko mwami-kalĩ wʼelubula, nʼerĩmũtũlĩra amahere wʼerĩpũlya. Ego mukole erilaga lyenyũ, mũberereraye erilaga lyenyũ.

²⁶Neryo mowe ekĩnywa kyʼOmwami Mukulu, abandu bosĩ bʼeYũda abĩkere omo kihugo kyʼeMĩsĩrĩ. Omwami Mukulu ati, Mũlebaye, nabĩrĩlahĩrya oko lĩna lyage ĩnene, nyiti, Erĩna lyage siryendisyaswahulwa omo buno bʼomundu nʼomuguma wʼeYũda omo kihugo kyosĩ kyʼeMĩsĩrĩ, bati, Ngoko Mukama Mwami Mukulu aneho.

²⁷Lebaya, ngalemberabo busana nʼerĩkwa, si busana nʼebibuya. Nʼabandu bosĩ bʼeYũda abali omo kihugo kyʼeMĩsĩrĩ basyahwa omo mũyalĩ, nʼomo nzala, erĩhĩka aho basyahwera.

²⁸Nʼabakabala omũyalĩ basyasubula erĩlũa omo kihugo kyʼeMĩsĩrĩ eriya omo kihugo kyʼeYũda, ni bake oko miganzo. Neryo abasĩgalira bosĩ bʼeYũda, abaya omo kihugo kyʼeMĩsĩrĩ erĩĩkalayo basyaminya nga nĩ kĩnywa kyandi kyasyahangana, ekyage kutse ekyabo.

²⁹Omwami Mukulu ati, Ekĩ kyasyabya ekiminyikalo busana nenyũ, nasyabasuyira hano, imwatoka eriminya ngoko ebĩnywa byage byasyahangana busana nʼerĩkwa lyenyũ.

³⁰Omwami Mukulu ati, Lebaya, nasyaha Farao-Hofra omwami wʼeMĩsĩrĩ omo byala byʼesyonzĩgũ siwe, nʼomo byala byabo, abakasonda-sonda engebe yiwe, ngoko naha Zedekĩa omwami wʼeYũda omo byala bya Nebũkadeneza omwami wʼeBabelĩ, oyo wabya nzĩgũ yiwe, nʼoyo wasonda-sonda engebe yiwe.