Read nande Yeremĩa 49 Bible Online

Yeremĩa 49 - nande bible

Yeremĩa 49

¹Omwami Mukulu akabũga busana nʼabana ba Amonĩ ati, Ĩsraelĩ siawite abagala kwehĩ? Siawite omũsĩgalya kwehĩ? Busana nakĩ Malkamũ abĩrĩsĩgalĩa Gadĩ, nʼabandu buwe abĩkere omo mĩyĩ yayo kwehĩ?

²Neryo lebaya Omwami Mukulu ati, Ebiro bikasa, nasyatũla endulo yʼamalwa omo ngubi erĩogũbwa busana nʼeRaba wʼabana ba Amonĩ. Nago asyabya ekilundo kyʼekĩma, nʼemĩyĩ yako yasyahĩsĩrĩrĩbwa omo muliro. Neryo Ĩsraelĩ asyasĩgalyabo abamũsĩgalaya, Omwami Mukulu atya.

³Uwe Hesĩbonĩ, ulire, kusangwa Aĩ abĩrĩtĩngĩtĩbwa. Ĩnywe bali bʼeRaba, mulire, mwambale emisarandwe. Mũsũsũmane, mutibite eyĩ nʼeyĩ omo katĩkatĩ kʼesyombĩmbo, kusangwa Malkamũ asyanyegwa, nʼabahererĩ buwe, nʼabanya-mwami buwe haguma.

⁴Ĩnywe bandu abakalegula, busana nakĩ mukayihalamba kwehĩ? Amaka wenyũ akahwa. Mukayiketera amaka wenyũ busana nakĩ, muti sihali mundu oyo wangalenga eribabambira kwehĩ?

⁵Omwami Mukulu wʼemilondo ati, Lebaya, nasyaleta eriubaha ukʼuwe, erĩkasyalũa ehosĩ ahakũtĩmbĩreko. Nenyũ mwasyahigirwa eyĩhya obuli mundu erĩlolya embere siwe, isihendisyabya mundu wʼerĩhĩndanĩa abakatibita haguma.

⁶Omwami Mukulu ati, Nĩkwa enyũma wʼaho nasyasũbũlya obunyegwa bwʼabana ba Amonĩ.

⁷Omwami Mukulu akabũga busana na Edomũ ati, Sihakiri menge omo Temanĩ kwehĩ? Erihana lyabirihwa oko bandu bʼamenge kwehĩ? Nʼamenge wabo ahwereho kwehĩ?

⁸Mutibite, musube enyũma, mwĩkale hali, ĩnywe ndũlanĩ syʼeDedanĩ, kusangwa nasyamuleta kʼobũlĩge bwa Esaũ, omugulu nasyayamusuyira.

⁹Abohĩ bʼebĩnyũ bamakũhĩkako, sĩbangasĩga amasĩgalira wʼebĩnyũ kwehĩ? Abarahĩ bamakũhĩkako omo kiro, sibangaherya erĩhĩka aho bamũgũtĩra bingaho kwehĩ?

¹⁰Nĩkwa nabiriambula Esaũ, nabirimusukulira emyanya ahabĩsamĩre huwe, naye siendisyatoka erĩyĩbĩsa, Abana buwe babĩrĩherĩbwa, nʼabagala babo, nʼabalĩkyabo, naye siakiriho.

¹¹Ũsĩge esyongũbĩ syawe, nage nasyateyasyo isyabyaho. Abakwakalĩ bawe bayiketere ngye.

¹²Kusangwa Omwami Mukulu ati, Lebaya, abatatswerawa erĩpũlya oko lũtehĩ, kwenene basyapũlya, nawe uli oyo wasyabala kwenene kwehĩ? Siwendisyabala butsira erisuyirwa, nĩkwa wasyapũlyalo kwenene.

¹³Omwami Mukulu ati, Kusangwa nabĩrĩyĩlahĩryako, nyiti eBozra yasyabya kindu kyʼesyonye, nʼeriponwa, nʼekĩma, nʼeritakira. Emĩyĩ yosĩ yako yasyabya kĩma luguma-guma.

¹⁴Nabĩrĩowa engulu ĩkalũa ewʼomwami Mukulu, nʼomukwenda akatumawa omo bihanda, ati, Mũyĩhĩndanaye haguma, mubambire Edomũ muhanganire amalwa!

¹⁵Kusangwa lebaya, nabirikuyira mo muke omo bihanda, nʼoyukaponawa omo bandu.

¹⁶Nĩkwa busana nʼerĩũbahya lyawe eriyiheka lyawe lyabirikuteba, uwe wĩkere omo butule bwʼerĩbwe nʼomo singi yʼekitwa. Nomo wangahĩra Olutu lwawe endata ngʼerĩsamba, nasyakũtogya erĩkũlũsya eyo, Omwami Mukulu atya.

¹⁷NʼeEdomũ yasyabya kindu kyʼesyonye. Obuli mundu ukalabako asyasweka, kandi asyasitula oko bironda byosĩ byago.

¹⁸Omwami Mukulu ati, Ngʼerihera lyʼeSodomo nʼeGomora nʼemĩyĩ eyĩhererenĩe nayo, sihali mundu wasyĩkalako, kandi sihali omundu oyo wasyĩkalaho.

¹⁹Lebaya, omundu asyahetuka ngʼendale akalũa omo bisaka byʼeYorodanĩ oko lũlĩsĩryo lubisi. Kusangwa nasyaleka iniasagaho lũba, nʼoyukayisogawa nasyamũhĩra endata kuho. Kusangwa nindi alinga ngye kwehĩ? Kandi nindi wasyanyitwala omwʼĩbũgĩro kwehĩ? Nʼomũlĩsya nindi oyo wasyimana mo nzĩgũ yage kwehĩ?

²⁰Busana nʼekyo mowe erĩyĩsũnza lyʼOmwami Mukulu, eryo abĩrĩyĩsũnza busana na Edomũ, nʼamaganĩryo, ago aganĩraya erilwa nʼesyondũlanĩ syʼeTemanĩ. Kwenene basyakurasyo ngʼehyana hyʼekihangulo. Kwenene asyayira olũlĩsĩryo lwasyo mo kĩma busana nabo.

²¹Ekihugo kikatitimana okwʼihuha lyʼeriwa lyabo. Hali ekiriro! Omulenge wakyo akogũbawa omo Ngetsi yʼEngula.

²²Lebaya, asyahetuka nʼeriguluka ngʼerĩsamba, nʼerisanza ebĩbũpa biwe erilwa na Bozra. Emitima yʼesyombangĩ syʼeEdomũ oko kiro ekyo yasyabya ngʼomutima wʼomũkalĩ omwʼikunda liwe.

²³Busana nʼeDamasekĩ. Hamatĩ na Arpadĩ bamahemuka, kusangwa babĩrĩowa engulu nyibi, emitima yabo ĩkalũa omo nda. Hali obũlĩge oko ngetsi. Siritoka eritekana.

²⁴Damasekĩ abirioloba, akayikeba busana nʼeritibita, nʼerititimana lyabirihambago. Engitsi nʼobũlũmĩ bwʼerikunda byabirihambago, ngʼerikunda lyʼomũkalĩ.

²⁵Omũyĩ wʼeripipa, go mũyĩ wʼobutseme bwage, sĩalĩtasĩganĩbwa ati!

²⁶Neryo abalwana bako basyawa omo nzira syako, nʼabalume bosĩ bʼamalwa basyahũnĩbwa oko kiro ekyo, Omwami Mukulu wʼemilondo atya.

²⁷Nage nasyakya omuliro omo lũhĩmbo lwʼeDamasekĩ, nago asyahĩsya amanyũmba mali-mali wa Benĩ-hadadĩ.

²⁸Busana na Kedarĩ, nʼamami wʼeAzorĩ, ago Nebũkadeneza omwami wʼeBabelĩ akĩnda. Omwami Mukulu ati, Muhangane, muhetukire eKedarĩ, mũheraye abandu bʼendata.

²⁹Basyahũnga amahema nʼebĩhyo byabo. Basyayitwalira esyongimba esĩkasũkũlĩraya esyohema syabo, nʼebindu byabo byosĩ, nʼesyongamia syabo, basyabirikirana bati, Erĩũbahya oko mbande syosĩ!

³⁰Omwami Mukulu ati, Mutibite, musage! Mwĩkale hali, ĩnywe ndũlanĩ syʼeHazorĩ. Kusangwa Nebũkadeneza omwami wʼeBabelĩ abiribayira embĩta, abĩrĩganĩrya omwatsi busana nenyũ.

³¹Omwami Mukulu ati, Muhangane, muhetuke erilwa nʼekihanda ekiri omo buholo, ekĩkere butsira erĩhangahangya. Ekite nʼesyongyo kutse mĩkangyĩ, bĩkere ĩbobene.

³²Nʼesyongamia syabo syasyabya bunyegwa, nʼobungi bwʼesyonde syabo bwasyabya bunyegwa. Nage nasyapanzabo okwʼĩhũnga lyosĩ, abakatũa esyondĩna syʼesyonderũ syabo. Omwami Mukulu ati, Nasyaleta erĩkwa lyabo erĩkalũa oko mbande syosĩ.

³³NʼeHazorĩ asyabya aho esyoboha sikasiba, ekĩma kya kera na kera. Sihali mundu wasyĩkalayo, kutse sihali mugala wʼomundu oyo wasyabyaho.

³⁴Ekĩnywa kyʼOmwami Mukulu ekyahĩka oko mũmĩnyererĩ Yeremĩa busana nʼeElamũ, okwʼĩtsũka lyʼeritabala lya Zedekĩa omwami wʼeYũda, kiti,

³⁵Omwami Mukulu wʼemilondo ati, Lebaya, nasyabũnanga obuta bwʼeElamũ, omukulu wʼamaka wabo.

³⁶Kandi nasyaletera Elamũ amahunga ani awakalũa oko nũnga ĩnĩ syʼekyanya, kandi nasyapanzirabo oko mahunga ani gosĩ aya. Isihali ekihanda aho abagusawa bʼeElamũ batesyahĩkamo.

³⁷Nage nasyĩta Elamũ embere syʼesyonzĩgũ syabo, nʼembere syabo abakasondaya engebe yabo. Kandi nasyaleta erĩkwa lyo kubo, omwʼihitana lĩkalĩre lyage, Omwami Mukulu atya. Kandi nasyatuma omũyalĩ erikwamabo erĩhĩka aho nasyabuyirabo.

³⁸Omwami Mukulu ati, Nasyahanda ekĩtũmbĩ kyage kyʼobwami eElamũ. Neryo nasyaherya omwami nʼesyongũla syayo.

³⁹Omwami Mukulu ati, Oko biro byʼenyũma, nasyasũbũlya omũyĩsa wʼeElamũ.