Read nande Yeremĩa 5 Bible Online

Yeremĩa 5 - nande bible

Yeremĩa 5

¹Mulendere eyĩ nʼeyĩ omo nzira syʼeYerũsalema, mulangire lino, nʼeriminya, mũsondaye omo bibuga byayo, nga mwanganabana omundu, nga hane omundu muguma oyukakola erĩbanza litunganene, oyũkasonda-sondaya ekwenene, nage nasyabuyirago.

²Nomo bangabũga bati, Ngoko Mwami Mukulu aneho; kwenene bakalahĩraya omo mabehĩ.

³Ameso wawe sĩalĩrebaya ekwenene kwehĩ? Wabĩrĩswĩryabo, nĩkwa mobatoloba. Mowahwerekereryabo, nĩkwa mobagana erikungwa. Babĩrĩkalya obũsũ bwabo bo po-po-po kwilaba erĩbwe; babirigana eribinduka nʼerireka ebibi.

⁴Nage monabũga nyiti, Kwenene aba ni bera, nĩ bakĩrũ, kusangwa sĩbasĩ enzira yʼOmwami Mukulu, kutse ekilayiro kya Nyamuhanga wabo.

⁵Ngandiya oko bakulu ĩnabũga nabo, kusangwa banasĩ enzira yʼOmwami Mukulu, nʼekilayiro kya Nyamuhanga wabo. Nĩkwa aba nʼomutima muguma babirigana ehamũlĩ yʼomukama. Bakagana erĩmowa.

⁶Busana nʼekĩ endale ĩkalũa omolĩ yasyĩtabo, nʼembwa yʼomolĩ yʼembwarara yasyaheryabo, esoro yasyalindirira emĩyĩ yabo. Yasyatulanga obuli mundu oyũkalũamo, kusangwa ebibi byabo ni bingi, nʼerisuba enyũma lyabo lyamakanya.

⁷Nangakubuyira busana nakĩ kwehĩ? Abagala bawe babĩrĩnyĩsĩganĩa, nʼerĩlahĩrya ukwʼabo bate esyonyamuhanga. Omugulu namabĩũgũtyabo, mobasĩngĩra, kandi mobaya omo nyũmba yʼabamalaya.

⁸Mobabya ngʼesyosabayĩrĩ esĩkũgũta nʼerirendera litya-litya. Obuli muguma akabirikira omũkalĩ wa mũlĩkyabo.

⁹Omwami Mukulu ati, Sindiendisyasuyira abandu aba kwehĩ? Nage sindiendĩsyakĩsya ekihanda ngʼekĩ kwehĩ?

¹⁰Musambe oko mbĩmbo siwe syʼebĩnyũ, mũherayesyo, nĩkwa simubugirirebo. Mũlũsaye emitahi yiwe; kusangwa si yʼOmwami Mukulu.

¹¹Kusangwa ekĩtũnga kya Ĩsraelĩ nʼekĩtũnga kyʼeYũda byabirinyipona kutsibu, Omwami Mukulu atya.

¹²Babirigana Omwami Mukulu bati, Si ye; kutse ekibi sĩkyendĩsyatũhĩkako; kutse sitwendisyalola oko malwa kutse enzala.

¹³Nʼabamĩnyererĩ basyabya ngʼerihunga, nʼekĩnywa sikiri mubo. Ko kyasyakolwa kubo ko kitya.

¹⁴Busana nʼekyo Omwami Mukulu, Nyamuhanga wʼemilondo ati, Kusangwa mũkabũga ekĩnywa ekĩ, lebaya, nasyayira ebĩnywa byage mo muliro omo buno bwawe, nʼabandu aba eribya esyongwĩ, nʼomuliro asyahĩsyabo.

¹⁵Omwami Mukulu ati, Lebaya, uwe kĩtũnga kya Ĩsraelĩ, lebaya nasyabaletera ekihanda ekĩkalũa ehali, ni kihanda kyʼamaka, ni kihanda kya kera, ekihanda mũtasĩ omũbũge wakyo, kutse eriminya ebyo bakabũga.

¹⁶Olubo lwabo ni ʼsinda ĩgasamĩre, abosĩ nĩ mbangĩ.

¹⁷Nabo basyalya erigesa lyawe, nʼobundu bwawe, basyalya abagala bawe nʼabali bawe. Basyalya ebĩhyo byawe nʼebihangulo byawe. Basyalya emĩrĩkĩ yʼebĩnyũ byawe nʼemiti yʼemĩtĩnĩ yawe. Basyatererya ahisi omo mũyalĩ emĩyĩ yawe eyikongotere eyo ukayiketera.

¹⁸Omwami Mukulu ati, Nĩkwa omo biro ebyo nibya, sindiendisyababuga ndeke.

¹⁹Neryo omugulu mwasyabũlya muti, Busana nakĩ Omwami Mukulu Nyamuhanga wetu abiritukola emyatsi yosĩ eyĩ kwehĩ? Neryo wasyabwirabo uti, Ngoko mwanyĩsĩganaya nʼerikolera esyonyamuhanga syʼehandi omo kihugo kyenyũ, ko mwasyakolera abʼehandi bo mutya omo kihugo ekite kyenyũ.

²⁰Mũtũlego omo kĩtũnga kya Yakobo, mũkangayego eYũda, muti,

²¹Muhulikirire ekĩ ĩnywe bandu bakĩrũ, abate nʼeriminya. Abawite ameso, isibelangira. Abawite amatwĩ, ĩsĩbalĩowa.

²²Omwami Mukulu ati, Simulinyubaha kwehĩ? Simwendisyatitimanira embere syage, ĩngye nayira emisege eribya mutano wʼengetsi, ni kihano kyʼebiro byosĩ isiyangalaba kugo. Nomo ebisunda byayo byangayigusanga, sibyangatoka. Nomo byangahuha sibyangatwangana kuyo.

²³Nĩkwa abandu aba bawite omutima wʼerihona nʼowʼerĩyĩyĩnĩa; babirikitira ehandi nʼerigenda.

²⁴Sĩbebũga omo mutima wabo bati, Lino tubahe Omwami Mukulu Nyamuhanga wetu, oyukaha embũla omo kirimo kyayo, eyʼerĩmbere nʼeyʼenyũma oko kirimo kyayo; oyukatubikira emigulu yʼerigesa eyahulawa.

²⁵Ebibi byenyũ byabiribindula emyatsi eyĩ, nʼamalolo wenyũ abĩrĩbakakĩrya eribana ebibuya.

²⁶Kusangwa abandu babi babiribanika omo katĩkatĩ kʼabandu bage. Bakalindirira, ngʼabateyĩ ko bakalindirira, bakahĩra ekitego, bakahamba abandu.

²⁷Ngʼesyonyonyũ, sĩkũsũla omwʼĩtonga, amanyũmba wabo akũsũla nʼeriteba atya. Busana nʼekyo babiribya bakulu, kandi bakamahĩre.

²⁸Babirineneha, babĩrĩkangabasanĩa. Ega, babirilaba omo mĩbĩrĩ yʼebibi. Sibalyimira omwatsi, omwatsi wʼesyongũbĩ, ibatoka erĩũwana, kandi isibetswera eritunganene lyʼabera.

²⁹Omwami Mukulu ati, Sindiendiyasuyira abandu aba kwehĩ? Omutima wage siendĩsyakĩsĩrya oko kihanda ngʼekĩ kwehĩ?

³⁰Ekindu kibi kutsibu nʼekyʼeriswekera kyabĩrĩhĩka omo kihugo.

³¹Abamĩnyererĩ bakaminyerera omo mabehĩ, nʼabahererĩ bakatabala omo hamũlĩ yabo, nʼabandu bage bakanza batya! Nenyũ mwasyakolakĩ omugulu endũlĩ yasyahĩka kwehĩ?