Read nande Yeremĩa 51 Bible Online

Yeremĩa 51 - nande bible

Yeremĩa 51

¹Omwami Mukulu ati, Lebaya, nasyahanganĩa ekĩrĩmũ ekĩkaheraya erilwa nʼeBabelĩ, nʼesyondũlanĩ syayo.

²Nasyatuma abʼehali eBabelĩ, bagũlũkayego, kandi bakwangure ekihugo kiwe. Kusangwa oko kiro kyʼobũlĩge bwako basyabya enzĩgũ yako ehosĩ.

³Nʼukwʼoyukakanda obuta buwe siakandebo, kandi siahangane omo byuma biwe byʼamalwa. Litya sĩmũbalaye abalwana buwe. Mũheraye omulondo wuwe wʼamalwa gosĩ.

⁴Nabo basyawa ahisi ibamabikererwa omo kihugo kyʼAbakaldea, nʼeritobongolerwa omo nzira syayo.

⁵Kusangwa Ĩsraelĩ, kutse Yũda sĩbetasĩganĩbwa na Nyamuhanga wabo, Omwami Mukulu wʼemilondo, nomo kihugo kyabo kyoswĩre mwʼamalolo embere syʼOyũbũyĩrĩre wa Ĩsraelĩ.

⁶Mutibite mũlũe omo Babelĩ, obuli mundu ayĩlamaye! Sĩmũkwe omwʼisuyira lyako, kusangwa oyũ ni mugulu wʼerĩkĩsya lyʼOmwami Mukulu. Asyalihako ngoko litolere.

⁷Babelĩ abiribya lũtehĩ lwʼesyamagetsi omo byala byʼOmwami Mukulu, olwatamĩraya ekihugo kyosĩ. Ebihanda mobyapũlya oko bĩnyũ byako. Busana nʼekyo ebihanda byamagunga.

⁸EBabelĩ yamatera lũba nʼerĩbũnĩka. Mumulire! Mwĩmaye obulungo bwʼamagalĩ wuwe. Mbino anganalamĩbwa.

⁹Motwalenga erĩlamya Babelĩ, nĩkwa sĩalĩtalamĩbwa. Mũmũsĩge, tuyigendere obuli mundu omo kihugo kiwe, kusangwa eritswera liwe lyamahĩka elubula, nalyo lyabirisumbirwa omo kyanya.

¹⁰Omwami Mukulu abĩrĩhũlũkya eritunganene lyetu. Mwase tũkanganaye eSĩonĩ omũbĩrĩ wʼOmwami Mukulu Nyamuhanga wetu.

¹¹Mũtalaye emisoha, mũsũlaye esyolubo! Omwami Mukulu abĩrĩhanganĩa emitima yʼabami bʼAbamedĩ, kusangwa erĩganĩrya liwe ni malwa nʼeBabelĩ, erĩheryago, kusangwa nĩ ʼkĩsya lyʼOmwami Mukulu, erĩkĩsya busana nʼeHekalũ yiwe.

¹²Musingike ebendera erilwa nʼesyombĩmbo syʼeBabelĩ, mukale omwʼĩteya, mũhĩre abateya, mũhĩre abandu abakalĩmbaya! Kusangwa Omwami Mukulu abĩrĩganĩrya nʼerikola ebyo ahula busana nʼesyondũlanĩ syʼeBabelĩ.

¹³Ĩnywe mwĩkere oko magetsi mangi-mangi, imuwite obũsokĩ bunene, endũlĩ yenyũ yamahĩka, olulengo lwʼerihwa lyenyũ.

¹⁴Omwami Mukulu wʼemilondo abĩrĩyĩlahĩryako ati, Kwenene nasyakũsũlya nʼabandu ngʼesyongĩke, nabo basyalaka omo mulenge wʼerĩkũkĩnda.

¹⁵Ni ye oyo wahangika ekihugo omo maka wuwe, abĩrĩsĩkya ekihugo omo menge wuwe, nʼomwʼiminya liwe abirisanza olubula.

¹⁶Omugulu akagusa omulenge wuwe, hali erihuha lyʼamagetsi omo bũtũkũ, naye akahetũkaya ebĩtũ bĩkalũa oko ndũlĩ syʼekihugo. Akayira emĩrabyo busana nʼembũla, akahũlũkaya erihunga omo mbĩso siwe.

¹⁷Obuli mundu abiribya mũkĩrũ, butsira menge. Obuli mũhesĩ wʼesyamagetsi akahemulawa nʼesyosanamu siwe, kusangwa esyonyamuhanga siwe syʼerĩnũnĩa ni syʼamatebo, sisiri mo muka.

¹⁸Siri buyira, omũbĩrĩ wʼerĩsĩnũla. Oko mugulu wabo wʼerisuyirwa syasyahera.

¹⁹Erĩgabo lya Yakobo siriri ngʼaya, kusangwa iye nĩ mũhangĩkĩ wʼebindu byosĩ. Na Ĩsraelĩ ni kihanda kyʼabandu buwe ayisoga. Omwami Mukulu lyo lĩna liwe.

²⁰Omukama akabũga ati, Uwe Babelĩ uli nyondo yʼamalwa yage nʼebindu byage byʼamalwa. Haguma nawe nasyabũnanga ebihanda, kandi haguma nawe nasyaherya amami.

²¹Na haguma nawe nasyabũnanga esabayĩrĩ nʼoyuli kuyo,

²²na haguma nawe nasyabũnanga egalĩ yʼamalwa nʼoyuli muyo, mo bitswe-bitswe, na haguma nawe nasyabũnanga omulume nʼomũkalĩ, na haguma nawe nasyabũnanga omũsyakulu nʼomũlwana mo bitswe-bitswe, na haguma nawe nasyabũnanga omũlwana nʼomumbesa mo bitswe-bitswe,

²³na haguma nawe nasyabũnanga omũlĩsya nʼekĩhyo kiwe mo bitswe-bitswe, na haguma nawe nasyabũnanga Omũlĩmĩ nʼesyonde siwe mo bitswe-bitswe, na haguma nawe nasyabũnanga abatabalĩ nʼabakama mo bitswe-bitswe.

²⁴Omwami Mukulu ati, Nage nasyaliha Babelĩ nʼesyondũlanĩ syʼeKaldea syosĩ busana nʼebibi byabo byosĩ ebyo bakola eSĩonĩ omo meso wenyũ.

²⁵Omwami Mukulu ati, Lebaya, iwe kitwa kyʼerĩherya, indi nzĩgũ yawe, uwe ũkaheraya ekihugo kyosĩ. Nage ngandisumba ebyala byage erilwa nawe, nʼerĩkũkũmbagalya Ũlũe oko lukuka lwʼamabwe, nasyakuyira mo kitwa kĩhĩre.

²⁶Omwami Mukulu ati, Sĩbendĩsyakwĩmya kwʼĩbwe iguma busana nʼenũnga, kutse erĩbwe busana nʼebibanza, nĩkwa Wasyabya ekĩma kera na kera.

²⁷Musingike ebendera omo kihugo, mubuhe engubi omo katĩkatĩ kʼebihanda! Muhigule ebihanda erilwa naye. Mubirikire haguma amami wʼeAraratĩ nʼeMĩnĩ, nʼeAskenazĩ erilwa naye. Mũhĩre omũsondolĩ erilwa naye. Mũhetũkaye esyosabayĩrĩ ngʼesyongĩke.

²⁸Muhigule ebihanda erilwa naye, abami bʼAbamedĩ, abatabalĩ bayo, nʼabakama bayo, nʼekihugo kyosĩ kyʼobutabale bwabo.

²⁹Nʼekihugo kikatitimana nʼerĩyĩkũndĩka; kusangwa erĩyĩsũnza lyʼOmwami Mukulu erilwa na Babelĩ lyamasĩka, eriyira ekihugo kyʼeBabelĩ mo kĩma, ekite mo mundu.

³⁰Esyombangĩ syʼeBabelĩ syabĩrĩũmbya oko malwa, bĩkere ahakongotere habo. Amaka wabo abirihwa, bakabya ngʼabakalĩ. Aho bĩkere habiriaka omuliro. Emĩkangĩ yiwe yʼesyongyo yabĩrĩbũnangika.

³¹Oyukatibita asyatibita erĩhĩndana nʼogundi, nʼomukwenda muguma erĩhĩndana nʼogundi, erĩkangya omwami wʼeBabelĩ ko mũyĩ wuwe abĩrĩhũngwa oko mbande syosĩ.

³²Nʼebisokero byabirihambwa, nʼebisesa babĩrĩhĩsyabyo omo muliro, nʼabandu bʼamalwa babiriubaha.

³³Kusangwa Omwami Mukulu wʼemilondo, Nyamuhanga wa Ĩsraelĩ ati, Omwali wʼeBabelĩ ali ngʼekibuga kyʼerĩhũmbĩrako oko mugulu kikalyatangirirawa. Hakĩsĩya mugulu muke, nʼomugulu wʼerigesa ĩnĩamũhĩkako.

³⁴Nebũkadeneza omwami wʼeBabelĩ abirinyirya, abĩrĩnyĩbũnanga, abĩrĩnyĩhĩra ahisi ngʼekikorongo abirinyimera ngʼenziramira, abĩrĩũsũlya enda yiwe mwʼebindu byage ebĩsĩhĩre. Abirinyigusa eyĩhya.

³⁵Endũlanĩ yʼeSĩonĩ yasyabũga yiti, Ebitsibu ebyo nakolawa nʼebyʼomubiri wage akolawa bibye oko Babelĩ. NʼeYerũsalema yasyabũga iti, Omusasi wage abye oko ndũlanĩ syʼeKaldea.

³⁶Neryo Omwami Mukulu ati, Lebaya, nasyabũga omwatsi wawe, nasyakĩsya busana nawe ndeke kandi nasyũmya engetsi yiwe, nasyũmya eyĩsoko yiwe.

³⁷NʼeBabelĩ yasyabya bilundo byʼekĩma nʼahʼerisiba hʼesyoboha, nʼekindu kyʼesyonye, nʼeriahirwa, ahate ndũlanĩ.

³⁸Omwami Mukulu ati, Basyaruruma iguma ngʼebyana byʼendale. Basyaruruma ngʼebyana byʼendale.

³⁹Omugulu bahũhene, nasyakokotya erirya ĩnene lyabo, nage nasyabatamĩrya, babye nʼeritsema, nʼerigotsera otũgotserĩ twʼebiro byosĩ, sibabuke kandi.

⁴⁰Nasyandagalyabo ngʼehyana hyʼembũlĩ okwʼikerwa, ngʼesyombangale haguma nʼesyombaya.

⁴¹Sesakĩ amahũngwa ati! Nʼeripipwa lyʼekihugo kyosĩ lyamahambwa liti! Babelĩ yabiribya kindu kyʼesyonye omo katĩkatĩ kʼebihanda iti!

⁴²Engetsi yamahetukira eBabelĩ. Yamaswikwa nʼerigunga lyʼebisunda byayo.

⁴³Emĩyĩ yayo yabiribya kindu kyʼesyonye, ekitaka kyũmĩre nʼembwarara, ekihugo kite mo mundu wʼerĩĩkalamo, kutse sihali mugala wʼomundu oyukalabayo.

⁴⁴Nage nasyasuyira ye Belĩ eBabelĩ, nasyaleka ebyo amera bĩkalũa omo buno buwe. Nʼebihanda sibyendisyaswamũhĩkako; ega, olũhĩmbo lwʼeBabelĩ lwabiritera.

⁴⁵Abandu bage, mũlũe omo katĩkatĩ kuwe, mũyĩlamaye obuli mundu okwʼihitana lĩkalĩre lyʼOmwami Mukulu.

⁴⁶Simuleke omutima wenyũ akalembera, kutse simubahe esyongulu esĩkogũbawa omo kihugo, kusangwa esyongulu syasyasa oko mwaka muguma, nʼenyũma wʼaho omo gundi mwaka esyongulu syasyasa, eritsatsuha lyasyabya omo kihugo, omũtabalĩ akalwa nʼogundi.

⁴⁷Neryo, mũlebaye, ebiro bikasa, nasyasuyira esyosanamu esĩbatsĩre syʼeBabelĩ. Ekihugo kiwe kyosĩ kyasyahemuka, nʼabakĩtawa bayo bosĩ basyawa omo katĩkatĩ kuwe.

⁴⁸Omwami Mukulu ati, Neryo olubula nʼekihugo, nʼabosĩ abalimo basyũta obogo bʼobutseme busana na Babelĩ, kusangwa abakaheraya basyamũhĩkako bakalũa oko lutambi lwʼendata.

⁴⁹Ngoko Babelĩ aleka abandu bʼekihugo kyosĩ ibahola, neryo Babelĩ asyawa kusangwa aleka Abaĩsraelĩ bangi ibahola.

⁵⁰Abaĩsraelĩ ĩnywe mwabala oko mũyalĩ, mugende! Simulinde! Mwibuke Omwami Mukulu, imukine hali, nʼeYerũsalema ibye omo bũlengekanĩa bwenyũ.

⁵¹Twamahemuka kusangwa twamowa ebĩtsũmĩ. Esĩsonĩ syamaswika obũsũ bwetu, kusangwa abʼehandi babiriingira ahabũyĩrĩre aho omo nyũmba yʼOmwami Mukulu.

⁵²Omwami Mukulu ati, Neryo lebaya, ebiro bikasa, nasyasuyira esyosanamu syʼeBabelĩ esyʼerihesa, nʼomo kihugo kiwe kyosĩ abahũtalĩbawa basyasĩmba.

⁵³Omwami Mukulu ati, Nomo Babelĩ angahetukira omo kyanya, nomo angakongoterera ahʼendata hʼamaka wuwe, nĩkwa nasyatuma abandu erĩmũherya.

⁵⁴Hulikirira omulenge wʼekiriro erĩlũa eBabelĩ, nʼerihera lĩnene omo kihugo kyʼAbakaldea!

⁵⁵Kusangwa Omwami Mukulu asyaherya eBabelĩ, nʼerireka omulenge munene wuwe oyo erĩlũaho, abasĩrĩkanĩ bakahĩkamo ngʼebisunda bikaruruma, bakabambiraho nʼemirenge yʼolukanda.

⁵⁶Kusangwa omũherya amamũhĩkako oko Babelĩ, nʼesyombangĩ siwe syasyahambwa, amata wabo abĩrĩbũnangwa mo bitswe-bitswe kusangwa Omwami Mukulu ni Nyamuhanga wʼerĩkĩsya. Kwenene asyalĩhĩsya ndeke.

⁵⁷Kandi nasyatamĩrya esyongũla siwe, nʼabandu buwe abʼamenge, nʼabatabalĩ buwe, nʼabakama buwe, nʼesyombangĩ siwe. Ibatoka erigotsera otũgotserĩ twa kera na kera, nʼeritindabuka, Omwami atya, erĩna liwe yo Mwami Mukulu wʼemilondo.

⁵⁸Omwami Mukulu wʼemilondo ati, Esyombĩmbo nyigali syʼeBabelĩ syasyaterĩbwa kutsibu, nʼesyongyo siwe nyiri-nyiri syasyahĩsĩbwa omo muliro. Nʼabandu basyaluhira busa, nʼebihanda byasyaluha busana nʼomuliro.

⁵⁹Ekĩnywa ekyo mũmĩnyererĩ Yeremĩa ahana Seraya, mugala wa Nerĩa, mwitsikulu wa Masea, omugulu agenda haguma na Zedekĩa omwami wʼeYũda eBabelĩ oko mwaka wʼakani wʼeritabala liwe. Nĩkwa Seraya abya omugombe mukulu.

⁶⁰Neryo Yeremĩa mwasaka omo kitabu kiguma erĩkwa lyosĩ eryo lyasyahĩka oko Babelĩ, bye bĩnywa ebĩ byosĩ ebyasakawa busana nʼeBabelĩ.

⁶¹Na Yeremĩa mwabwira Seraya ati, Omugulu wasyahĩka eBabelĩ, lero usome ebĩnywa ebĩ byosĩ, nʼomulenge,

⁶²ũbũge, uti, Uwe Mwami Mukulu, wabirilaga busana na hano, erĩtwaho, isihali kindu kyasyĩkalaho, kutse omundu, kutse enyama, nĩkwa hasyabya kĩma erĩhĩka na kera.

⁶³Neryo omugulu wasyabuga erisoma ekitabu ekĩ, wasyakibohera okwʼĩbwe, wasyagusakyo omo katĩkatĩ kʼolũsĩ lwʼeEfũratĩ,

⁶⁴neryo wasyabũga, uti, EBabelĩ ko yasyasenda itya, isiyendisyasabuka kandi busana nʼerĩkwa eryo nasyaleta oko Babelĩ. Nabo basyaluha. Ebĩnywa bya Yeremĩa byamatwĩrya aho.