Read nande Yeremĩa 6 Bible Online

Yeremĩa 6 - nande bible

Yeremĩa 6

¹Mutibite ahayĩbombekĩre, ĩnywe bana ba Benyamĩna, erĩlũa omo Yerũsalema, mubuhire engubi eTekoa, kandi musumbe ekiminyikalo endata wʼeBete-Hakeremũ, kusangwa ebibi bĩlolĩre eyĩkwa erihuluka elutambi lwʼendata, nʼerĩherya lĩnene.

²Mwali wa Sĩonĩ oyuli mubuya nʼerihehera, nasyamũherya.

³Abalĩsya haguma nʼebĩhyo byabo basyamũhĩkako. Basyahanda amahema wabo nʼerĩmũtĩmbako. Basyalĩsĩrya obuli mundu aho wuwe.

⁴Mũyĩtegekanaye erilwa naye. Muhangane, tuhetukireho tulwe omwʼitungi. Obũlĩge ũkwʼĩtwe! kusangwa bũkĩra, kusangwa esyonganda syʼerĩgolo-golo sirimugaramuka!

⁵Muhangane, tubambireho omo kiro, tũheraye ebikali byago.

⁶Kusangwa Omwami Mukulu wʼemilondo abĩrĩbũga ati, Mukondere emiti yʼahisi, musumbireho ekilundo kyʼekitaka oko Yerũsalema. Oyũ nĩ mũyĩ wʼerisuyirwa. Erinuba lisa liri mugo.

⁷Ngoko ekyũna kyʼamagetsi kĩkahũlũkaya amagetsi wakyo mabuya, litya nago akahũlũkaya ebibi byago bihya-bihya. Omwaga nʼerĩherya bĩkogũbawa mugo. Endwala nʼebironda biri embere syage emigulu yosĩ.

⁸Uwe Yerũsalema ukungawe, omutima wage akasyakũlũako. Ngasyakuyira mo kĩhũma, ekihugo ekite mo bandu.

⁹Omwami Mukulu wʼemilondo ati, Basyagesa abasĩgalira bʼeĨsraelĩ bo kutsibu ngʼomũlĩkĩ wʼebĩnyũ. Ũlabaye ebyala byawe oko mitahi ngʼoyukoha ebĩnyũ.

¹⁰Nyibwirendi, nyikungendi, batoke erĩowa kwehĩ? Lebaya, babĩrĩrĩba amatwĩ wabo, neryo sibetoka erĩowa. Lebaya, ekĩnywa kyʼOmwami Mukulu bakagana erĩowakyo, bakatenyera kukyo.

¹¹Kikaleka mũsũla nʼerihitana lyʼOmwami Mukulu. Namaluha busana nʼerĩyĩyĩnĩa. Gũteryo oko bana abali omo nzira, nʼoko ndeko yʼabalwana eyĩhĩndene, kusangwa omulume asyahambwa na mũkalĩwe haguma, nʼomukulu haguma nʼomukulu kutsibu.

¹²Nʼamanyũmba wabo asyahabwa abandi, nʼamalima wabo nʼabakalĩ babo haguma. Kusangwa nasyasumba ebyala byage erilwa nʼesyondũlanĩ syʼekihugo, Omwami Mukulu atya.

¹³Kusangwa erĩtsũka oko muke wa kubo erĩhĩka oko mukulu wa kubo obuli muguma akwĩre obururu bwʼendũndĩ. Nʼerĩtsũka oko mũmĩnyererĩ nʼerĩhĩka oko mũhererĩ obuli muguma akateba.

¹⁴Babĩrĩlamya hake ekironda kyʼabandu bage bati, Obuholo, Obuholo; nĩkwa sihali Obuholo.

¹⁵Mobanakwa esĩsonĩ omugulu bamabikola ebyʼesyonye kwehĩ? Iyihi, mobatakwa esĩsonĩ nʼahake, kutse obũsũ bwabo mobutaminya erĩtũmba. Busana nʼekyo, basyawa haguma nʼabakawa. Oko mugulu nasyasuyirabo, basyaguswa ahisi, Omwami Mukulu atya.

¹⁶Omwami Mukulu ati, Muhangane omo syonzira mulangire, mũbũlaye busana nʼesyonzira sya kera, ahali enzira yowene. Kandi mulendere muyo, mwasyabana eriluhuka busana nʼemitima yenyũ. Nĩkwa mobabũga bati, Sitwendilaba muyo.

¹⁷Nage monabahĩra kʼomũteya, nyiti, Mowe omulenge wʼengubi, Nĩkwa mobabũga bati, Sitwendihulikirira.

¹⁸Busana nʼekyo, muhulikirire ĩnywe bihanda, kandi muminye ĩnywe ndeko, ni mwatsi wahi owali omo katĩkatĩ kabo.

¹⁹Uwe kihugo, uhulikirire. Ũlebaye, nasyaleta erĩkwa oko bandu aba, bye bĩgũma byʼerĩyĩtsũtsa lyabo, kusangwa sibetahulikirira ebĩnywa byage, nʼemigambo yage babiriganayo.

²⁰Obukwa obũkalũa eSeba bũkanyĩhĩkako busana nakĩ kwehĩ? Nʼekiseke kĩsĩhĩre ekĩkalũa omo bihugo byʼehali kwehĩ? Amahere wenyũ wʼerĩokererya sĩalĩgĩrwe, kutse amahere wenyũ sĩalĩnyĩtsemesaya.

²¹Busana nʼekyo, Omwami Mukulu ati, Lebaya, ngahĩra esyondwĩkale embere syʼabandu aba. Nʼabotata nʼabagala basyahola kusyo haguma; mũlĩkyabo nʼomwĩra wuwe basyahera.

²²Omwami Mukulu ati, Lebaya, abandu bakasira ekihugo kyʼelutambi lwʼendata, nʼekihanda kinene kyasyahanganĩbwa erĩlũa oko ndũlĩ-ndũlĩ syʼekihugo.

²³Bakahamba obuta nʼerĩtũmo, ni batsibu, sibeganyira, omulenge wabo akahuha ngʼengetsi, kandi bakagenda oko syosabayĩrĩ, ibambite, ngʼomundu wʼamalwa erilwa nawe, uwe mwali wʼeSĩonĩ!

²⁴Twabĩrĩowa engulu yago. Ebyala byetu bikogoka. Obũlĩge bwabirituhamba, amagalĩ ngʼawʼomũkalĩ oyukakunda.

²⁵Simuye omolĩ, kutse erirendera omo nzira, kusangwa enzĩgũ iwite omũyalĩ, erĩũbahya liri omo syombande syosĩ.

²⁶Uwe mwali wʼabandu bage, wambale emisarandwe, ũyĩkũmbagalaye omwʼĩbũ. Ulire ngʼeririra busana nʼomugala kyusa, ekiriro kĩkalĩre kutsibu. Kusangwa omũherya akanditwasira lũba-lũba.

²⁷Yeremĩa, nabirikuyira mo mundu wʼerirenga nʼeriminya omo bandu bage. Iwatoka eriminya nʼerirenga enzira yabo.

²⁸Abosĩ bakalĩre bakahona, bakatĩmbatĩmba ĩbanemũlegereranĩa; ni miringa nʼekyuma; abosĩ batsandĩre.

²⁹Emĩgũba ikabuhirira kutsibu. Omuliro akabuga erĩsasĩ. Eritukura likakolawa busa, nĩkwa ababi sibegelulawa.

³⁰Bakahulabo mo kĩtsĩpa ekikaganawa, kusangwa Omwami Mukulu abiriganabo.