Read nande Yeremĩa 8 Bible Online

Yeremĩa 8 - nande bible

Yeremĩa 8

¹Omwami Mukulu ati, Oko mugulu oyo basyahũlũkya omo masinda wabo amakũha wʼabami ba Yũda, nʼamakũha wʼabanya-mwami buwe, nʼamakũha wʼabahererĩ, nʼamakũha wʼabamĩnyererĩ, nʼamakũha wʼesyondũlanĩ syʼeYerũsalema.

²Basyasanzago oko lyuba, nʼomukera, nʼemilondo yosĩ yʼelubula, eyo banza nʼeyo bakolera, nʼeyo bakwama, nʼeyo basondaya, nʼeyo baramaya. Siendisyakumirwa haguma, kutse eritabwa, asyabya ngʼamabĩ oko kitaka.

³Kandi Omwami Mukulu wʼemilondo ati, Oluholo lwasyayisogwa kwilaba engebe nʼabasĩgalira bosĩ abasaka omo kĩtũnga kibi ekĩ, abasaka ehosĩ eyo nahigirabo.

⁴Kandi wasyabwirabo uti, Omwami Mukulu ati, Abandu bakawa nʼeritindaswahangana kwehĩ? Omundu akatswa, ĩnĩatabũnũkala kwehĩ?

⁵Neryo busana nakĩ abandu aba bakatswa, busana nakĩ mukanyitswako? Mukahambana nʼeriteba, mukagana erinyisubako.

⁶Monahulikirira monowa, nĩkwa mobatabũga kwenene. Sihali mundu oyukabinduka oko bibi biwe, ati, Nabirikolakĩ kwehĩ? Obuli mundu akasubira emitsye yiwe ngʼesabayĩrĩ kwʼikatibita kutsibu oko malwa.

⁷Ega, ekĩrobĩ kyʼomo kyanya kĩnasĩ ebirimo byakyo. Nʼakatungula nʼendambira nʼemongo sikakwama emigulu yʼerĩhũma lyasyo, nĩkwa abandu bage sĩbasĩ ebihano byʼOmwami Mukulu.

⁸Mũkabũga muti kwehĩ? Muti tuli bʼamenge, nʼemigambo yʼOmwami Mukulu tune nayo. Nĩkwa lebaya, akalamu kʼeribiha kʼabahandĩkĩ kabiriyirayo mo mabehĩ.

⁹Abandu bʼamenge babirihemulwa, babirisweka nʼerihambwa. Lebaya, babirigana ekĩnywa kyʼOmwami Mukulu; kandi bawite amenge mũsĩndokĩ kwehĩ?

¹⁰Busana nʼekyo nasyaha abakalĩ babo oko bandi, nʼamalima wabo oko bandi bandu. Kusangwa obuli muguma erĩtsũka oko muke erĩhĩka oko mukulu bakwĩre obururu bwʼendũndĩ. Erĩtsũka oko mũmĩnyererĩ erĩhĩka oko mũhererĩ, obuli muguma akakola nʼobũgobya.

¹¹Kandi babĩrĩlamya amakũbũke wʼabandu bage go hake, bati, ni buholo, ni buholo; nĩkwa sihali Obuholo.

¹²Mobakwa esĩsonĩ omugulu bamabikola esyonye kwehĩ? Iyihi, mobatakwa esĩsonĩ nʼahake, kutse obũsũ bwabo mobutaminya erĩtũmba. Busana nʼekyo, basyawa omo katĩkatĩ kʼabakawa. Oko mugulu wʼerisuyira lyabo, basyaguswa ahisi, Omwami Mukulu atya.

¹³Omwami Mukulu ati, Nasyapũrabo iguma sihendisyabya ebĩgũma byʼebĩnyũ oko mĩrĩkĩ yʼebĩnyũ, kutse ebĩgũma oko muti wʼemĩtĩnĩ, nʼekikoma kyabo kyasyuma, nʼemyatsi eyo nabirihabo yasyalaba kubo.

¹⁴Busana nakĩ tũkĩkala bũkũtũ kwehĩ? Mũyĩhĩndanaye, twingire omo mĩyĩ eyikongotere, tuholere muyo. Kusangwa Omwami Mukulu Nyamuhanga wetu abiritutswera lubi, abirituha erĩnywa amagetsi wʼobuti, kusangwa twabĩrĩhalya oko Mwami Mukulu.

¹⁵Motwalinda Obuholo, nĩkwa mohatasa ekibuya nʼekiguma, na busana nʼomugulu wʼerĩlamya, nĩkwa lebaya, obũlĩge!

¹⁶Eriama lyʼesyosabayĩrĩ siwe lĩkowĩrawa eDanĩ. Oko mulenge wʼeriama lyʼesyosabayĩrĩ siwe sĩkala-kalĩre, ekihugo kyosĩ kikatitimana, Kusangwa bakasa, kandi bakalya ekihugo nʼebyosĩ ebirimo; nʼomũyĩ nʼabosĩ abĩkeremo.

¹⁷Kusangwa lebaya, ngabatumira esyonzoka, nʼesyofĩra omo katĩkatĩ kenyũ, esitesyangatoka eritebwa; nasyo syasyabaluma, Omwami Mukulu atya.

¹⁸Obũlĩge bwage sĩbwangalamĩbwa! Omutima wage akalekula omwisi syage!

¹⁹Lebaya, omulenge wʼekiriro kya mwali wʼabandu bage akalũa omo kihugo kyʼehali kutsibu: Omwami Mukulu siali eSĩonĩ kwehĩ? Omwami wuwe siali mugo kwehĩ? Busana nakĩ babĩrĩnyĩhĩtanĩa omo syosanamu syabo esĩhesĩre, nʼomo syosanamu syʼehandi kwehĩ?

²⁰Amagese abirilaba, omugulu wʼomwisi abirihwa, netu sitwetalama.

²¹Namabũnĩka busana nʼerĩbũnĩka lyʼabandu bage. Ngalira, erĩhahũka lyabirimbamba.

²²Sihali bũbalya eGĩleadĩ kwehĩ? Sihali omusaki eyo kwehĩ? Neryo busana nakĩ erilama lyʼabandu bage siryetatokekana kwehĩ?