Read nande Ekiriro 2 Bible Online

Ekiriro 2 - nande bible

Ekiriro 2

¹Omukama abiriswika mwali wʼeSĩonĩ, Omo kĩtũ omwʼihitana liwe ati! Abirigusa Olukengerwa lwa Ĩsraelĩ erĩlũa elubula, Sialitibuka ekĩtũmbĩ kyʼebisando biwe Omo kiro kyʼerihitana liwe.

²Omukama amamera, sĩalĩtabalya, Esyondũlanĩ syosĩ sya Yakobo. Abirisigusa ahisi Ahakongotere ha mwali wa Yũda omwʼihitana liwe. Abĩrĩteryabo erĩhĩka ahisi oko kitaka, Abiritakira obwami nʼabanya-mwami.

³Abĩrĩtwa amaka gosĩ wa Ĩsraelĩ Omwʼihitana liwe lĩkalĩre. Abĩrĩsũbũlya ebyala biwe byʼamali Embere syʼenzĩgũ. Abĩrĩhĩsya Yakobo ngʼomuliro owakagulumira, Owakahĩsaya oko mbande syosĩ.

⁴Abirikanda obuta buwe ngʼenzĩgũ, Abirihanda ebyala biwe byʼamali ngʼenzĩgũ, Abĩrĩta abosĩ abatsemesaya ameso. Omo hema yʼomwali wʼeSĩonĩ Abĩrĩũtũlĩra erihitana liwe ngʼomuliro.

⁵Omukama abiribya ngʼenzĩgũ, Abirimera Ĩsraelĩ; Abirimera ebikali byako byosĩ; Abĩrĩherya ahakongotere hago, Abĩrĩkanyĩrĩrya erĩsũsũmana nʼeririra Uku mwali wa Yũda.

⁶Abĩrĩlũsya ehema yiwe nʼamaka, nga yabya irima; Abĩrĩherya ahʼerĩhĩndana liwe eryahamulawa. Omwami Mukulu abirireka Erĩhĩndana lĩbũyĩrĩre nʼeSabato eribiriranwa eSĩonĩ, Abiripona omwami nʼomũhererĩ Omwʼigalirwa lyʼerihitana liwe:

⁷Omukama abirigana ekiherero kiwe, Abĩrĩkwa ahabũyĩrĩre huwe ho nye. Abĩrĩhĩra esyombĩmbo syʼebikali byago Omo byala byʼenzĩgũ. Babiriyira olukanda omo nyũmba yʼOmwami Mukulu, Ngʼomo kiro kikulu kyahĩrawa.

⁸Omwami Mukulu abĩrĩganĩrya erĩherya Olũhĩmbo lwa mwali wʼeSĩonĩ. Abĩrĩkakya olukoba, Sĩalĩtakakĩrya ebyala biwe okwʼĩherya. Abiriyira ahakongotere nʼolũhĩmbo ibyalira, Byabiriluha haguma.

⁹Esyongyo syamatsikira omo kitaka, Abĩrĩherya nʼeritulanga emĩkangyĩ yako. Omwami wako nʼabanya-mwami bako bali omo katĩkatĩ kʼebihanda. Emigambo siyikiri. Kandi abamĩnyererĩ bako sibebana erilota lĩkalũa oko Mwami Mukulu.

¹⁰Abakulu bʼomwali wʼeSĩonĩ Bĩkere oko kitaka bakĩkala bũkũtũ. Bakagusa olũtũtũ oko mitwe yabo. Bakayihanga emiremba omo mbindi. Abambesa bʼeYerũsalema Bakahanda emitwe yabo oko kitaka.

¹¹Ameso wage akalĩbana omo mĩsonĩa, Ekĩrĩmũ kyage kĩkapapũka, Omutima wage akũtawa oko kitaka, Busana nʼerihera lyʼamwali wʼabandu bage, Kusangwa abana balere nʼabakonga bakalembera Omo syonzira syʼomũyĩ.

¹²Bakabũlaya nyĩnya wabo bati, Engano nʼebĩnyũ biri hahi kwehĩ? Omugulu bakalembera ngʼomundu oyuhutere Omo syonzira syʼomũyĩ, Omugulu omutima wabo akũtĩka Oko kĩkũba kya nyĩnya wabo.

¹³Nasyakukunga nyiti kwehĩ? Nasyakũlĩngĩrĩranĩa nandi Uwe mwali wʼeYerũsalema kwehĩ? Nasyakũsosekanĩa nakĩ, inabana erĩkũkĩranĩa, Uwe mumbesa mwali wʼeSĩonĩ kwehĩ? Kusangwa eritsanda lyawe nĩ rĩnene ngʼengetsi. Nindi wangatoka erĩkũlamya kwehĩ?

¹⁴Abamĩnyererĩ bawe babirilangira busana nawe Erilota eryʼamabehĩ nʼesyonzolĩ ngyĩrũ. Mobatakũnũngũla obubi bwawe, Busana nʼerĩsũbũlya obunyegwa bwawe, Nĩkwa babirilangira busana nawe Emyatsi yʼamabehĩ nʼemyatsi yʼerĩkũtalya.

¹⁵Abosĩ ko bakalaba omo nzira Bakabanda oko byala, Bakasyolaya nʼerĩtsĩngya emitwe yabo Busana nʼomwali wʼeYerũsalema bati, Oyũ go nʼomũyĩ abandu bahula bati, Eriyisitika lĩhĩkene, Nʼobutseme bwʼekihugo kyosĩ kwehĩ?

¹⁶Esyonzĩgũ syawe syosĩ Syabiritanda amuno wasyo erilwa nawe. Bakasyolaya nʼerikeregeta ameno wabo. Bakabũga bati, Twabirimerago! Kwenene ekĩ kyo kiro twayilaga. Twabiribanakyo, twabirilola kukyo.

¹⁷Omwami Mukulu abirikola ekyo aganĩraya. Abĩrĩberererya ekĩnywa kiwe, Ekyo ahana oko biro bya kera. Abirigusa ahisi, isialitaganyira. Abirireka esyonzĩgũ isyakutsemera. Abĩrĩhamya amaka wʼesyonzĩgũ syawe.

¹⁸Emitima yabo yabirilakira Omukama. Uwe lũhĩmbo lwa mwali wʼeSĩonĩ, Emĩsonĩa yandagale ngʼolũsĩ omo musibo nʼomo kiro. Susyeyibanira eriluhuka, Suleke erĩso lyawe rikaluhuka.

¹⁹Uhangane, ulake omo kiro, Okwʼĩtsũka lyʼebĩsĩsĩmũko. Gũtũle omutima wawe ngʼamagetsi Embere syʼameso wʼomukama. Usumbire Omukama ebyala byawe. Busana nʼengebe yʼabana balere bawe, Abakalembera busana nʼenzala Omo nzũko yʼobuli nzira.

²⁰Uwe Mwami Mukulu ũlebaye, ulangire! Wamatakolandi yʼutya kwehĩ? Kwʼabakalĩ bangalya bana babo, Abana balere abanabutawa ndeke kwehĩ? Omũhererĩ nʼomũmĩnyererĩ bangĩtĩrwa Ahabũyĩrĩre hʼOmukama kwehĩ?

²¹Omũlwana nʼomũsyakulu bagotsere Oko kitaka omo syonzira. Abambesa bage nʼabalwana bage Babiriwa omo mũyalĩ. Wabĩrĩtabo omo kiro kyʼerihitana lyawe. Wabirikerabo, sulitaganyirabo.

²²Wabiribirikira obuba bwage oko mbande syosĩ, Omo kiro kyʼekyũsĩ ekyahamulawa, Sihabya nʼomuguma oyo wabala kutse erĩsĩgalira Oko kiro kyʼerihitana lyʼOmwami Mukulu. Abo nabuta nʼerĩkũlya, Enzĩgũ yage yabiribugabo.