Read nande Ezekĩelĩ 1 Bible Online

Ezekĩelĩ 1 - nande bible

Ezekĩelĩ 1

¹Neryo mokyabya omo mwaka wʼamakũmĩ asatu, oko mukera wʼakani nʼoko kiro kyʼebitanu kyʼomukera, omugulu nabya omo bunyegwa hakũhĩ nʼolũsĩ lwʼeKebarĩ, olubula molwakingukala, monalangira esyonzolĩ sya Nyamuhanga.

²Oko kiro kyʼebitanu kyʼomukera, nago abya mwaka wʼakatanu wʼerinyegwa lyʼOmwami Yoyakĩnĩ,

³ekĩnywa kyʼOmwami Mukulu mokyahĩka ndeke oko mũhererĩ Ezekĩelĩ, mugala wa Bũzĩ, omo kihugo kyʼAbakaldea, hakũhĩ nʼolũsĩ lwʼeKebarĩ, nʼebyala byʼOmwami Mukulu mobyamubyako.

⁴Neryo monalangira, lebaya, ekihunga ekĩkalĩre mokyalũa elutambi lwʼendata, ekĩtũ kinene kutsibu haguma nʼomuliro owakapalaya, nʼerĩhenĩa erĩtĩmbĩre kugo, nʼomo katĩkatĩ kago ihali ekyuma ekĩkahenaya, erĩlũa omo katĩkatĩ kʼomuliro.

⁵Omo katĩkatĩ kabyo ekĩsosekanĩo kyʼebihangikwa bini ebiriho. Nʼerisosa lyabyo ko lyabya litya. Byabya bĩsosĩre ngʼomundu.

⁶Obuli kiguma kya kubyo kyabya nʼamũsũ ani, nʼobuli kiguma kya kubyo kyabya nʼebĩpũpa bini.

⁷Nʼebisando byabyo byabya bisando bitunganene. Nʼobulyatiro bwʼebisando byabyo bwabya ngʼobulyatiro bwʼekisando kyʼekyana kyʼende. Mobyakangabasanĩa ngʼomulinga owahalĩre ndeke.

⁸Nabyo byabya nʼebyala byʼomundu omwisi wʼebĩpũpa byabyo oko mbande syabyo ĩnĩ. Nʼebini byosĩ byabya nʼamũsũ wabyo nʼebĩpũpa byabyo bitya.

⁹Ebĩpũpa byabyo byabya bĩkatũlanako, ekindi oko kindi. Omugulu byagenda mobitabinduka. Mobyagenda obuli kiguma erĩlolya embere.

¹⁰Nĩkwa busana nʼekĩsosekanĩo kyʼamũsũ wabyo, mobyabya nʼobũsũ bwʼomundu, nʼebini ebyo byabya nʼobũsũ bwʼendale oko luhande lwʼamali, nʼebini ebyo byabya nʼobũsũ bwʼende oko luhande lwʼamalembe, nʼebini ebyo byabya nʼobũsũ bwʼerĩsamba nibya.

¹¹Nʼamũsũ wabyo nʼebĩpũpa byabyo byabya ibigabene endata. Ebĩpũpa bibiri byʼobuli kiguma byabya bĩkatũlanako, ekindi oko kindi, nʼebibiri ibyaswika emibiri yabyo.

¹²Nʼebyosĩ mobyagenda obuli kiguma erĩlolya embere, eyo ekĩrĩmũ kyalola ye nʼeyo byagenda, mobitabinduka omwʼigenda lyabyo.

¹³Nĩkwa busana nʼerĩsosekanĩa lyʼebihangikwa ebiriho, erĩsosekanĩa lyabyo lyabya ngʼamakala wʼomuliro awakaka, ngʼemisuku eyikalaba eyĩ nʼeyĩ omo katĩkatĩ kʼebihangikwa ebiriho. Nʼomuliro abya nʼerĩkangabasanĩa, nʼerĩpalya molyahuluka omo muliro.

¹⁴Nʼebihangikwa ebiriho mobyatibita eyĩ nʼeyĩ ngʼerĩpalya eryʼakarabyo.

¹⁵Nĩkwa omugulu nalebaya ebihangikwa ebiriho, lebaya, habya ekĩrĩngo kiguma oko kitaka emũsĩke wʼebihangikwa ebiriho, oko mũsũ wakyo ani.

¹⁶Ekĩsosekanĩo kyʼebĩrĩngo nʼemibiri yabyo byabya ngʼeberũlĩ, nʼebini byosĩ byabya nʼomubiri muguma. Nʼekĩsosekanĩo nʼemĩbĩrĩ yabyo byabya ngʼekĩrĩngo omwisi wʼekindi kĩrĩngo.

¹⁷Omugulu byagenda, byagenda oko mbande ĩnĩ syosĩ, mobitabinduka omugulu byagenda.

¹⁸Nĩkwa emilambu yʼebĩrĩngo yabyo, yabya miri nʼeyʼeriswekera, nʼemilambu yʼebyosĩ bini yabya ĩyoswĩre nʼameso oko mbande syosĩ.

¹⁹Nʼomugulu ebihangikwa ebiriho byagenda, ebĩrĩngo mobyagendaho haguma nabyo. Nʼomugulu ebihangikwa ebiriho byasumbawa erĩlũa oko kitaka, ebĩrĩngo nabyo mobyasumbwa.

²⁰Ehosĩ ekĩrĩmũ kyalolaya, mobyalolya eyo. Nʼebĩrĩngo mobyasumbwa aho mũsĩke hakũhĩ nabyo, kusangwa ekĩrĩmũ kyʼebihangikwa ebiriho kyabya omwisi wʼebĩrĩngo.

²¹Omugulu ebyo byagenda, ebĩ nabyo mobyagenda. Nʼomugulu ebyo byahangana, ebĩ nabyo mobyahangana. Nʼomugulu ebyo byasumbawa erĩlũa oko kitaka, ebĩrĩngo mobyasumbwa aho mũsĩke wabyo, kusangwa ekĩrĩmũ kyʼebihangikwa ebiriho kyabya omwisi wʼebĩrĩngo.

²²Neryo endata oko mitwe yʼebihangikwa ebiriho mohabya ekĩsosekanĩo kyʼekyanya, ngʼerĩhema lyʼekĩragũlĩ ryʼeriswekera, ekĩsanzĩre endata oko mitwe yabyo.

²³Nʼeyĩkwa oko kyanya ekyo ebĩpũpa byabyo byabya bĩyĩsanzĩre ndeke, ekiguma ĩkĩlolĩrye oko kindi. Obuli kihangikwa ikiwite ebĩpũpa bibiri ebikaswika emibiri yabyo oko luhande luguma olũ, nʼoko lundi luhande.

²⁴Nage monowa erihuha lyʼebĩpũpa byabyo ngʼerihuha lyʼamagetsi mangi omugulu byagenda, ngʼomulenge wʼOmũtokĩ wʼEbyosĩ, omulenge wʼoluhi ngʼerihuha lyʼomulondo wʼabasĩrĩkanĩ. Omugulu byahangana, mobyakĩmya ebĩpũpa byabyo.

²⁵Kandi omulenge mwahuluka endata oko kyanya ekyabya endata oko mitwe yabyo. Omugulu byahangana mobyakĩmya ebĩpũpa byabyo.

²⁶Nʼendata oko kyanya ekyabya endata oko mitwe yabyo mohabya ekĩsosekanĩo kyʼekĩtũmbĩ kyʼobwami, ngʼekĩsosekanĩo kyʼerĩbwe lyʼesafiro. Nʼoko kĩsosekanĩo ekyo kyʼekĩtũmbĩ kyʼobwami endata kutsibu, mohabya ekĩsosekanĩo kĩsosĩre omundu.

²⁷Neryo monalangira erĩtsũka oko kĩsosekanĩo kyʼembindi yiwe nʼendata, ekindu ngʼekyuma ekikaka ekyasosa omuliro omo katĩkatĩ kakyo oko mbande syosĩ, nʼomwisi wakyo, nʼerĩtsũka oko kĩsosekanĩo kyʼembindi yiwe erĩlolya eyĩkwa monalangira ekindu kĩsosĩre omuliro. Kandi habya ekĩkakangabasanaya oko syombande syosĩ siwe.

²⁸Ngʼekĩsosekanĩo kyʼekima ekiri omo kĩtũ oko kiro kyʼembũla, ko kyabya kitya ekĩsosekanĩo kyʼerĩkangabasanĩa oko mbande syosĩ. Ekĩ kyo kyabya ekĩsosekanĩo ekiri ngʼolukengerwa lwʼOmwami Mukulu. Nage omugulu nalangirakyo, monatũlama kibiri-biri, monowa omulenge akabũga.