Read nande Ezekĩelĩ 10 Bible Online

Ezekĩelĩ 10 - nande bible

Ezekĩelĩ 10

¹Neryo monasamalira, neryo lebaya, omo mwanya owabya endata oko mitwe yʼamakerũbĩ mohahuluka endata kugo eryabya ngʼerĩbwe lya safĩro, eriri ngʼerisosa lyʼekĩtũmbĩ kyʼobwami molyahuluka endata kubo.

²Neryo mwabwira omundu oyo wambite ekĩtanĩ ati, Wingire omo katĩkatĩ kʼebĩrĩngo ebĩkatĩmba-tĩmba, hʼomwisi wʼamakerũbĩ, Ũsũlaye ebyala byawe bibiri mwʼamakala wʼomuliro awakalũa omo katĩkatĩ kʼamakerũbĩ, upanza-panzego omo mũyĩ. Neryo mwayamo ĩnyĩnalolĩre.

³Neryo amakerũbĩ babya bahangene oko luhande lwʼamali lwʼeHekalũ, omugulu omundu oyo ingiramo, nʼekĩtũ mokyũsũlya ekibuga kyʼomwisi.

⁴Nʼolukengerwa lwʼOmwami Mukulu molwahetuka erĩlũa oko makerũbĩ molwahangana oko bũsekũ bwʼeHekalũ. NʼeHekalũ, moyũsũla mwʼekĩtũ, nʼekibuga mokyũsũla nʼerĩkangabasanĩa lyʼolukengerwa lwʼOmwami Mukulu.

⁵Nʼerihuha lyʼebĩpũpa byʼamakerũbĩ molyogũbwa erĩhĩka omo kibuga kyʼeyĩhya, ngʼomulenge wa Nyamuhanga Omũtokĩ Wʼebyosĩ omugulu akabũga.

⁶Neryo omugulu ahana omundu oyo wambite ekĩtanĩ ati, Wĩmaye omuliro omo katĩkatĩ kʼebĩrĩngo ebikatĩmba-tĩmba, aho omo katĩkatĩ kʼamakerũbĩ, neryo mwayamo mwimana hakũhĩ nʼekĩrĩngo kiguma.

⁷Nʼekerũbĩ moyasumba ebyala byayo omo katĩkatĩ kʼamakerũbĩ erĩhĩka oko muliro owabya omo katĩkatĩ kʼamakerũbĩ, neryo mwĩmya kugo, neryo mwahĩrago omo byala byʼoyo wambite ekĩtanĩ, naye mwĩmyago, neryo mwahuluka.

⁸Neryo amakerũbĩ babya bawite ebiri ngʼebyala byʼomundu omwisi wʼebĩpũpa byago.

⁹Nage monalangira, neryo lebaya, ebĩrĩngo bini aho mũsĩke wʼamakerũbĩ, ekĩrĩngo kiguma oko mũsĩke wʼobuli kerũbĩ kiguma. Nʼerisosa lyʼebĩrĩngo lyabya ngʼerĩbwe lya berĩlĩ.

¹⁰Nĩkwa erisosa lyabyo, ebini ebyo, byabya nʼerisosa liguma, ngʼekĩrĩngo kiguma ekyabya omwisi wʼekindi kĩrĩngo.

¹¹Omugulu byagenda, mobyagendera oko mbande ĩnĩ syabyo; mobitabinduka omugulu bikagenda, nĩkwa mobyagenda eyo byabya bĩlolĩrye ha nʼaho byakwama; butsira erikeba omugulu bikagenda.

¹²Nʼemibiri yago yosĩ, nʼemigongo yago, nʼebyala byago nʼebĩpũpa byago, nʼebĩrĩngo, ĩbyoswĩre nʼameso oko mbande syosĩ, byo bĩrĩngo byago agosĩ ani abya awite.

¹³Nĩkwa ebĩrĩngo mobyahulwa ĩnyĩnowĩre ebĩrĩngo ebĩkatĩmba-tĩmba.

¹⁴Nʼobuli kiguma kyabya nʼamũsũ ani. Obũsũ bwʼerĩmbere bwabya obũsũ bwʼekerũbĩ, nʼobũsũ bwʼakabiri bwabya obũsũ bwʼomundu, nʼobwʼakasatu bwabya obũsũ bwʼendale, nʼobwʼakani, obũsũ bwʼerĩsamba.

¹⁵Neryo amakerũbĩ mwahetukira endata. Aya abya bihangikwa ebiriho ebyo nalangira hakũhĩ nʼolũsĩ lwʼeKebarĩ.

¹⁶Neryo omugulu amakerũbĩ agenda, ebĩrĩngo mobyagenda aho mũsĩke wago. Neryo omugulu amakerũbĩ asumba ebĩpũpa byago nʼerihetuka erĩlũa oko kitaka, ebĩrĩngo mobitabinduka erĩlũa aho mũsĩke wago.

¹⁷Omugulu amakerũbĩ imana, ebĩrĩngo nabyo mobyimana. Nʼomugulu ahetuka, ebĩrĩngo nabyo mobyahetuka haguma nago, kusangwa ekĩrĩmũ kyʼebihangikwa ebiriho kyabya omwisi wabyo.

¹⁸Neryo olukengerwa lwʼOmwami Mukulu molwalũa oko bũsekũ bwʼeHekalũ, molwahangana endata oko makerũbĩ.

¹⁹Omugulu amakerũbĩ alũaho, mwasumba ebĩpũpa byago mwahetuka erĩlũa oko kihugo ĩnyĩnalolĩre, nʼebĩrĩngo aho mũsĩke wago. Nago mwahangana oko bwingiro kukyo bwʼoluhande lwʼendata lwʼenyũmba yʼOmwami Mukulu. Nʼolukengerwa lwa Nyamuhanga wa Ĩsraelĩ molwasiba kugo kwʼendata.

²⁰Aya ni bihangikwa ebiriho ebyo nalangira eyĩkwa uku Nyamuhanga wa Ĩsraelĩ hakũhĩ nʼolũsĩ Kebarĩ. Nage monaminya ayo kwʼali makerũbĩ.

²¹Obuli kiguma kyabya nʼamũsũ ani, nʼobuli kiguma ebĩpũpa bini, nʼomubiri wʼebyala bĩsosĩre ebyala byʼomundu byabya omwisi wʼebĩpũpa byago.

²²Neryo erisosa lyʼamũsũ wago, nĩ mũsũ ago nalangira ekĩsosekanĩo kyago hakũhĩ nʼolũsĩ lwʼeKebarĩ. Obuli muguma mwagenda ĩnĩalolĩrye embere.