Read nande Ezekĩelĩ 11 Bible Online

Ezekĩelĩ 11 - nande bible

Ezekĩelĩ 11

¹Kandi Omũlĩmũ mwanyisumba erinyireta oko lũkyo lwʼoluhande lwʼendata lwʼenyũmba yʼOmwami Mukulu, olũlolĩre oko luhande lwʼendata. Neryo lebaya, oko bwingiro bwʼolũkyo, habya abandu makũmĩ abiri nʼabatanu. Nʼomo katĩkatĩ kabo monalangira Yazanĩa mugala wa Azũrĩ na Pelatĩa mugala wa Benaya, abasondolĩ bʼabandu.

²Neryo mwambwira ati, Mugala wʼomundu, aba bo bandu abakalengekanaya ebibi, bakahana nabi omo mũyĩ oyũ.

³Aba bo bakabũga bati, Omugulu wʼerĩhĩmba amanyũmba siali hakũhĩ kwehĩ? Omũyĩ oyũ ni nyungu, netu tuli ĩswĩ.

⁴Neryo uminyerere obũyĩgũ-yĩgũ kubo, uwe mugala wʼomundu, uminyerere!

⁵Neryo Omũlĩmũ wʼOmwami Mukulu mwanyiwirako, neryo mwambwira ati, Ũbũge uti, Omwami Mukulu ati, Uwe kihanda kya Ĩsraelĩ, Ũkaganĩraya utya, kusangwa nyĩnasĩ amalengekanĩa wenyũ.

⁶Mwabĩtĩkanyĩrĩrya abo mwĩta omo mũyĩ oyũ, mwabĩrĩũsũlya esyonzira syago nʼabandu abĩtawa.

⁷Neryo Omukama, Iye Omwami Mukulu akabũga ati, Abandu abĩtawa benyũ abo mwabĩrĩhĩra omo katĩkatĩ kʼomũyĩ, abo nĩ ĩswĩ, nʼomũyĩ oyũ ni nyungu.

⁸Nĩkwa nasyabalũsya mugo. Mwabiriubaha omũyalĩ. Litya nage nasyabaletera omũyalĩ, Omukama iye Omwami Mukulu atya.

⁹Nasyabahũlũkĩrya eyĩhya erĩlũa omo katĩkatĩ kʼomũyĩ, nʼerĩbahĩra omo byala byʼabandu bʼehandi, kandi nasyabatswera esyombanza.

¹⁰Mwasyawa omo mũyalĩ. Nasyabatswera erĩhĩka omo mutano wa Ĩsraelĩ. Litya mwasyaminya ko ndi Mwami Mukulu.

¹¹Omũyĩ oyũ siendisyabya nyungu busana nenyũ, kutse simwendisyabya ĩswĩ omo katĩkatĩ kago, nĩkwa nasyabatswera erĩhĩka oko mutano wa Ĩsraelĩ.

¹²Nenyũ mwasyaminya ko ndi Mwami Mukulu. Kusangwa simwetalendera omo migambo yage, kandi simwetakola amahano wage, nĩkwa mwabirikola amahano wʼebihanda ebĩbatĩmbĩreko.

¹³Neryo, omugulu naminyerera, Pelatĩa mugala wa Benaya mwahola. Neryo monawa kibiri-biri, monabirikira nʼomulenge munene, nyiti, ĩyo-o-o, Omukama Iye Omwami Mukulu! Wasyabugĩra abasĩgalira ba Ĩsraelĩ kwehĩ?

¹⁴Neryo ekĩnywa kyʼOmwami Mukulu mokyambĩkako kiti,

¹⁵Mugala wʼomundu, abagala benyũ, ibo bagala benyũ, nʼabanyegwa haguma nawe, nʼekihanda kyosĩ kya Ĩsraelĩ, abosĩ, ni bandu abo esyondũlanĩ syʼeYerũsalema syabiribwirwa siti, Muye hali oko Mwami Mukulu. Ekihugo ekĩ twabirihabwakyo erĩsĩgalyakyo.

¹⁶Neryo mũbũge muti, Omukama Iye Omwami Mukulu ati, Kusangwa nomo nanabya ĩnabĩrĩhũmĩryabo hali omo katĩkatĩ kʼebihanda, nomo nanabiripanza-panzabo omo bihugo, nĩkwa nabya busana nabo ahabũyĩrĩre busana nʼakatambĩ kake omo bihugo eyo bahĩkĩra.

¹⁷Neryo ũbũge uti, Omukama Iye Omwami Mukulu ati, Nasyabakuma-kuma erĩlũa omo bihanda, nʼerĩbahĩndanĩa erĩlũa omo bihugo eyo mwapanzirawa, nasyabaha ekihugo kya Ĩsraelĩ.

¹⁸Nabo omugulu basyahĩkaho, basyalũsyaho ebindu byosĩ bibi nʼesyonye syosĩ syako.

¹⁹Nage nasyahabo omutima muguma, nasyahĩra ekĩrĩmũ kihya-kihya omwisi wabo. Kandi nasyalũsya omo mubiri wabo omutima wʼerĩbwe, nasyahabo omutima wʼomubiri,

²⁰batoke erirendera nʼemigambo yage, nʼeribika ebihano byage, nʼerikolabyo. Neryo basyabya bandu bage, nage nasyabya Nyamuhanga wabo.

²¹Omukama Iye Omwami Mukulu ati, Nĩkwa abandu abʼomutima owakakwama emyatsi mibi nʼesyonye, nasyasũbya emigendere yabo yʼoko mitwe yabo.

²²Neryo amakerũbĩ mobasumba ebĩpũpa byabo, nʼebĩrĩngo aho mũsĩke kugo, nʼolukengerwa lwa Nyamuhanga wa Ĩsraelĩ lwabya lũkangĩre endata kubo.

²³Nʼolukengerwa lwʼOmwami Mukulu molwahetuka erĩlũa omo katĩkatĩ kʼomũyĩ molwahangana oko kitwa ekiri eluhande lwʼendata lʼomũyĩ.

²⁴NʼOmũlĩmũ mwanyisumba, mwanyireta omo nzolĩ busana nʼOmũlĩmũ wa Nyamuhanga erĩhĩka eKaldea ukwʼabo banyegawa. Neryo esyonzolĩ nalangira mosyanyĩlũako.

²⁵Neryo monabũga nʼabo abanyegawa emyatsi yosĩ eyo Mwami Mukulu angangaya.