Read nande Ezekĩelĩ 14 Bible Online

Ezekĩelĩ 14 - nande bible

Ezekĩelĩ 14

¹Neryo abandi bʼabakulu ba Ĩsraelĩ mobambĩkako, mobĩkala embere syage.

²Nʼekĩnywa kyʼOmwami Mukulu mokyambĩkako kiti,

³Omugala wʼomundu, abandu aba babirisingika esyosanamu syabo omo mitima yabo, babĩrĩhĩra ekyʼerĩtwĩkalya kyʼebibi byabo embere syʼobũsũ bwabo. Linatolere ĩbanyĩbũlya omwatsi kwehĩ?

⁴Neryo ũbũge nabo ubwirebo uti, Omukama Iye Omwami Mukulu ati, Obuli mundu wʼekihanda kya Ĩsraelĩ oyukasingika, esyosanamu siwe omo mutima wuwe, nʼerĩhĩra ekĩkatwĩkalaya kyʼebibi biwe embere syʼobũsũ buwe, neryo akahĩka oko mũmĩnyererĩ, ĩngye Mwami Mukulu nasyaletwa erĩmũsũbĩrya omo mwatsi wʼesyosanamu siwe nyingi,

⁵inatoka erihamba emitima yʼekihanda kya Ĩsraelĩ, ababiriyigaba ũkwʼĩngye busana nʼesyosanamu syabo syosĩ.

⁶Neryo Ubwire ekihanda kya Ĩsraelĩ uti, Omukama Iye Omwami Mukulu ati, Mubinduke erireka ebibi, mũbũnũkale oko syosanamu syenyũ. Mubindule amũsũ wenyũ oko nye syenyũ syosĩ.

⁷Kusangwa obuli mundu wʼekihanda kya Ĩsraelĩ, kutse abʼehandi abakabungira omo Ĩsraelĩ oyukayigaba ũkwʼĩngye, nʼerisingika esyosanamu siwe omo mutima wuwe, nʼerĩhĩra ekyʼerĩtwĩkalya kyʼebibi biwe embere syʼobũsũ buwe, neryo akahĩka oko mũmĩnyererĩ akanyĩbũlaya omwatsi wuwe, ĩngye Mwami Mukulu nasyaletwa erĩmũsũbĩrya ĩngyowene-wene.

⁸Kandi ngandikala oko mundu oyo, nʼerimuyira eribya kiminyikalo nʼomũsyo, kandi ngandisyamuhiga erĩlũa omo katĩkatĩ kʼabandu bage. Litya mwasyaminya ko ndi Mwami Mukulu.

⁹Nĩkwa omũmĩnyererĩ oyo amakũnwa akabũga ekĩnywa, nĩ ngye Mwami Mukulu, oyo wabĩrĩkũna omũmĩnyererĩ oyo, kandi nasyasumba ebyala byage ukwʼiye, nasyamũherya erĩlũa omo katĩkatĩ kʼabandu bage Ĩsraelĩ.

¹⁰Nabo basyaheka erisuyira lyʼebibi byabo. Ngʼebibi byʼoyũkabũlaya ko bine, ebibi byʼomũmĩnyererĩ byasyabya bitya.

¹¹Ekihanda kya Ĩsraelĩ sikiswetalira hali kwĩngye, kutse erĩyĩtsandya kandi omo malolo wabo gosĩ. Litya basyabya bandu bage, nage inabya Nyamuhanga wabo, Omukama Iye Omwami Mukulu atya.

¹²Neryo ekĩnywa kyʼOmwami Mukulu mokyambĩkako kiti,

¹³Omugala wʼomundu, ekihugo kyamanyĩhalyako kikalegula, nage ngasumba ebyala byage byo kukyo, nʼerĩlũsya ebyalya byakyo, nʼeritumirakyo enzala, nʼerĩĩta mukyo abandu nʼesyonyama.

¹⁴Omukama Iye Omwami Mukulu ati, Nomo abandu basatu aba, Noa, Danĩelĩ, na Yobũ, babya mukyo, mobayĩlamya ĩbobene omo litunganene ryabo.

¹⁵Namalabya esyonyama nyibi omo kihugo, nasyo ĩsyĩta abandu bosĩ, nakyo ikyabya kĩma, isihali mundu wangalaba mukyo busana nʼesyonyama,

¹⁶nomo abandu basatu aba banabya mukyo, Ngoko nyiriho, Omukama, Iye Omwami Mukulu ati, Sĩbangalamya abagala, kutse abali. Ĩbobene bangalamĩbwa, nĩkwa ekihugo kyasyabya mulala.

¹⁷Kutse namaleta omũyalĩ oko kihugo ekyo, nyiti, Omũyalĩ alabe omo kihugo nʼerĩĩta abandu bo mukyo nʼesyonyama,

¹⁸nomo abandu basatu aba babya mukyo, Ngoko nyiriho, Omukama Iye Omwami Mukulu ati, Sibangatoka erĩlamya kutse mugala, kutse mwali, ĩbobene bangalamĩbwa.

¹⁹Kutse kumbe namatuma endwala yʼakasũsũ omo kihugo ekyo, nʼerĩũtũlĩra mukyo erihitana lyage omo musasi, erĩĩta mukyo abandu nʼesyonyama,

²⁰nomo Noa, Danĩelĩ, na Yobũ, banabya omo kihugo ekyo, Ngoko nyiriho, Omukama Iye Omwami Mukulu ati, Sibangatoka erĩlamya omugala kutse mwali, bangayĩlamya ĩbobene busana nʼeritunganene ryabo.

²¹Kusangwa Omukama Iye Omwami Mukulu ati, Kwilaba aho kangahi omugulu ngatumira eYerũsalema eritswera lyage lĩkalĩre kani: omũyalĩ, nʼenzala, nʼesyonyama syʼomolĩ, nʼendwala yʼakasũsũ, erĩĩta mukyo abandu nʼenyama!

²²Nĩkwa, lebaya, abakabala basyasĩgala mukyo abakandisyahekerwa eyĩhya, abagala nʼabali. Lebaya, basyabahulukira, nenyũ mwasyalangira emikolere yabo nʼemĩbĩrĩ yabo. Nenyũ mwasyakĩranĩbwa busana nʼobubi nabiriretera eYerũsalema, busana nʼebyosĩ ebyo nabirireta kugo.

²³Nabo basyabakĩranĩa omugulu mukalangira emikolere yabo nʼemĩbĩrĩ yabo, nenyũ mwasyaminya ko ndakola butsira nzumwa ebyosĩ ebyo nabirikola mugo, Omukama Iye Omwami Mukulu atya.