Read nande Ezekĩelĩ 17 Bible Online

Ezekĩelĩ 17 - nande bible

Ezekĩelĩ 17

¹Neryo ekĩnywa kyʼOmwami Mukulu mokyambĩkako kiti,

²Omugala wʼomundu, Uguse endekerano, ũbũge omũsyo oko kihanda kya Ĩsraelĩ,

³uti, Omukama Iye, Omwami Mukulu ati, Erĩsamba ĩnene eryʼebĩpũpa binenebinene nʼebyeya biri-biri, ĩryoswĩre nʼebyeya ebiri kwʼemirera-mirera, molyahĩka eLebanonĩ molyaheka esingi yʼomuti wʼomũerezĩ.

⁴Kandi molyatũa otutahi twaho endata-ndata, molyahekahyo erĩhĩka oko kihugo kyʼabatsũrũsya. Mwahĩrabyo omo mũyĩ wʼabatũndĩ.

⁵Mwĩmya nibya oko mbuto yʼekihugo ekyo, mwaherayo omo kitaka kĩbogĩre. Mwahĩrayo hakũhĩ nʼamagetsi mangi. Mwahandayo ngʼomuti wʼomukimba.

⁶Nago mwalasa, mwabya mũlĩkĩ wʼebĩnyũ owakalanda, nʼemitahi yago moyalolya eyo ali. Nʼemĩrĩhĩ yago moyabya omwisi wago. Litya molyabya mũlĩkĩ, molyalasya emitahi, moyalasya ebikoma.

⁷Nĩkwa habya erindi rĩsamba lĩnene nʼebĩpũpa binene binene nʼebyeya bingi. Neryo, lebaya, omũlĩkĩ oyũ mwakondomerya emĩrĩhĩ yago erĩlolya eyo ali, nʼerĩlasya emitahi yago erĩlolya eyo ali, erĩlũa oko mahya wʼeririma lyago iniatoka erĩheheryago.

⁸Aherawa omo kitaka kyowene hakũhĩ nʼamagetsi mangi, iniatoka erĩlasya emitahi, nʼeributa ebĩgũma, iniabya mũlĩkĩ owene.

⁹Ũbũge uti, Omukama Iye Omwami Mukulu ati, Asyalasa kwehĩ? Siendisyakula emĩrĩhĩ yago nʼerĩtwa ebĩgũma byago, iniuma, nʼebikoma byosĩ byago ebikalasa ibyuma kwehĩ? Kandi si busana nʼamaka manene kutse abandu bangi bangatoka erĩhanganĩago kandi.

¹⁰Lebaya, nomo mũlĩkĩ oyo anamaherwa, asyalasa kwehĩ? Siendisyuma kũndũ omugulu erihunga lyʼendata lĩkatũla kugo, nʼeriuma omo mahya mwʼaho alasa kwehĩ?

¹¹Akandi, ekĩnywa kyʼOmwami Mukulu mokyambĩkako, kiti,

¹²Lino Ubwire ekihanda kyʼerihona uti, Sĩwasĩ enzumwa yʼemyatsi eyĩ kwehĩ? Ubwirebo uti, Lebaya, omwami wʼeBabelĩ mwahĩka eYerũsalema, mwahũnga omwami wako nʼabanya-mwami bako, mwaletabo eyo ali eBabelĩ.

¹³Neryo mwĩmya omuguma wʼekihanda kyʼOmwami, neryo mwalagana naye, mwamũlahĩrĩrya. Kandi mwaheka esyombangĩ syʼekihugo,

¹⁴obwami butoke erĩmowa, butsira erĩyĩhamya, nĩkwa bukwame endagano yiwe, butoke eribyaho.

¹⁵Nĩkwa iye mwahona ukwʼiye nʼerituma abakwenda buwe eMĩsĩrĩ, ati bamuhe esyosabayĩrĩ nʼabasĩrĩkanĩ bangi. Asyatoka kwehĩ? Oyukakola emyatsi yingaha asyabala kwehĩ? Asyatoka erĩtwa endagano iniatibita kwehĩ?

¹⁶Omukama Iye Omwami Mukulu ati, Ngoko nyiriho, kwenene ekihugo kyʼOmwami oyo wamuyira mo mwami, nʼeripona erĩlahĩrya liwe, nʼerĩtwa endagano yiwe ha nʼaho asyaholera eBabelĩ.

¹⁷Kandi Farao nʼomulondo wuwe wʼamaka nʼendeko nene sibendisyamũwatĩkya omo malwa, omugulu bakahĩra ebilundo byʼekitaka nʼerĩhĩmba esyombĩmbo syʼeribambiraho, erĩĩta abandu bangi.

¹⁸Kusangwa abiripona endahiro ĩnĩakatwa endagano, neryo lebaya, mwalaga erimukenga, nĩkwa mwakola emyatsi eyĩ yosĩ. Siendisyabala.

¹⁹Busana nʼekyo Omukama Iye Omwami Mukulu ati, Ngoko nyiriho, kwenene erĩlahĩrya lyage eryo apona, nʼendagano yage eyo atũa, nasyasũbyabyo oko mutwe wuwe.

²⁰Kandi nasyasesa obutahataha bwage ukwʼiye, naye asyakwa omo kitego kyage. Neryo nasyamuleta eBabelĩ, kandi nasyamutswera aho busana nʼeriregula liwe eryo anyĩhalayako.

²¹Nʼabandu buwe bosĩ ababuya omo milondo yiwe yosĩ basyawa omo mũyalĩ, nʼabakabala basyapanzirwa oko buli ihunga. Nenyũ mwasyaminya kwʼindi nĩ ngye, Mwami Mukulu, nabĩrĩbũgakyo.

²²Omukama Iye Omwami Mukulu ati, Nasyĩmya Omutahi oko mutwe wʼendata wʼomuti wʼomũerezĩ nasyaherago. Nasyatũa akatahi kalere kolo-kolo akali oko mutwe-mutwe, nasyaherako oko kitwa kiri-kiri endata.

²³Oko kitwa kirikiri kya Ĩsraelĩ, nasyaherako. Nako ikatoka erĩlasya emitahi, nʼeriheta, nako kasyabya mũerezĩ ogowene. Nʼesyonyonyũ syosĩ syʼemihanda yosĩ syasyĩkala mugo. Syasyĩkala omo kyũtũtũ kyʼemitahi yago.

²⁴Nʼemiti yosĩ yʼomolĩ yasyaminya ko ndi Mwami Mukulu. Ngakĩmaya omuti muli nʼerisumba omuti mũkũhĩ, nabĩrĩũmya omuti mubisi, nʼerĩboya omuti ogũmĩre. Ĩngye indi Mwami Mukulu. Nabĩrĩbũga, kandi nasyakolakyo.