Read nande Ezekĩelĩ 18 Bible Online

Ezekĩelĩ 18 - nande bible

Ezekĩelĩ 18

¹Neryo ekĩnywa kyʼOmwami Mukulu mokyambĩkako kiti,

²Ũtĩkĩ kwehĩ? Uti ũkatũa omũsyo oyũ busana nʼekihugo kya Ĩsraelĩ, uti, Abotata bakalya ebĩnyũ ebĩgagĩre, nʼameno wʼabana akakĩre.

³Omukama Iye Omwami Mukulu ati, Ngoko indiho, simwendisyaswabana omwanya wʼerĩtwa omũsyo oyũ omo Ĩsraelĩ.

⁴Lebaya, ebĩrĩmũ byosĩ ni byage, ekĩrĩmũ kyʼĩse nʼekĩrĩmũ kyʼomugala ni byage. Ekĩrĩmũ ekikakola ekibi kikandisyahola.

⁵Nĩkwa omundu amabya atunganene, iniakola erĩbanza lyʼekwenene nʼebitunganane,

⁶isialitalira oko hʼendata hʼebitwa, kutse sialitasumba ameso wuwe oko syosanamu syʼekihanda kya Ĩsraelĩ, kutse sĩalĩtatsandya omũkalĩ wʼomũlĩkyabo, kutse sĩalĩtahĩka hakũhĩ nʼomũkalĩ oyuli oko mugesera,

⁷kandi omundu sĩalĩtanũbya mundu, nĩkwa abĩrĩsũbũlya oko mũbwekĩ omuwato wuwe, ĩsĩalĩtĩba, abiriha ebyalya biwe oko bawĩrĩ, kandi abiriswika abʼendũmbũ bʼesyongimba,

⁸isialitabweka omundu busana nʼendũndĩ, kutse sialitaheka erikanyirira, iniabirihigula ebyala biwe oko bibi, iniabiriyira erĩbanza lyʼekwenene omo katĩkatĩ kʼomundu na mũlĩkyabo,

⁹amakwama ebihano byage, nʼerĩteya eritswera lyage, eritendiregula. Iye atunganene, asyabyaho kũndũ, Omukama Iye Omwami Mukulu atya.

¹⁰Amabuta omugala oyũkalĩre, oyũkũta omusasi, nʼoyukakola oko myatsi eyĩ oko mũlĩkyabo,

¹¹(nomo atalitakola ekiguma oko myatsi eyĩ), ati akalya oko hʼendata hʼebitwa, nʼerĩtsandya omũkalĩ wa mũlĩkyabo,

¹²akanũbaya abera nʼabʼobwaga, ĩnĩakĩba omo bũrahĩ, ĩsĩalĩsũbaya omuwato, kandi iniakasumba ameso wuwe oko syosanamu, iniakakola esyonye,

¹³iniakabweka esyofranka busana nʼendũndĩ, iniakaheka erikanyirira. Asyabyaho kwehĩ? Siendisyabyaho! Abirikola esyonye esĩ syosĩ, kwenene asyĩtwa. Omusasi wuwe asyamubyako, oko mutwe wuwe.

¹⁴Na lino lebaya, oyũ amabuta omugala, oyukasamalira ebibi byosĩ byʼĩse ebyo abirikola, nʼerilangira litya sialikola atya.

¹⁵Isialirira oko hʼendata hʼebitwa, kutse sialisumba ameso wuwe oko syosanamu syʼekihanda kya Ĩsraelĩ, kutse ĩsĩatsandaya omũkalĩ wʼomũlĩkyabo,

¹⁶kutse sĩalĩnũbaya mundu, isialiheka ekindu kyʼomuwato, kutse sĩalĩba omo bũrahĩ, nĩkwa akaha ebyalya oko bawĩrĩ, nʼeriswika olukimba oko bandu bʼendũmbũ,

¹⁷kandi sĩalĩba oko bera, ĩsĩalĩmaya endũndĩ kutse erikanyirira, nĩkwa akakola ebilayiro byage iniakakwama emigambo yage. Siendisyahola busana nʼebibi bya tata wuwe, asyabyaho kwenene.

¹⁸Nĩkwa busana nʼĩse wuwe, kusangwa anũbaya nʼobutaganyira, nʼerĩhũnga ebya mugala wabo, nʼerikola ebĩtowene omo katĩkatĩ kʼabandu buwe, lebaya, asyahola busana nʼebibi biwe.

¹⁹Nĩkwa mũkabũga muti, Busana nakĩ omugala sialiheka ebibi byʼĩse wuwe kwehĩ? Omugulu mugala abirikola erĩbanza lyʼekwenene nʼebitunganene, nʼerĩteya emigambo yage yosĩ, nʼerikolayo, asyabyaho kwenene.

²⁰Omundu oyukakola ebibi asyahola. Omugala siendisyaheka erisuyira lyʼebibi byʼĩse, kutse ĩse siendisyaheka erisuyira lyʼebibi byʼomugala. Ebitunganene byʼoyutunganene byasyamubyako, nʼebibi byʼomubi byasyamubyako.

²¹Nĩkwa omubi amabinduka nʼerireka ebibi biwe byosĩ ebyo abirikola, iniakakwama ebihano byage byosĩ, nʼerikola erĩbanza nʼebitunganene, kwenene asyabyaho, isiendisyahola.

²²Erĩhalya liwe lyosĩ eryo abirikola siryendisyibukwa ukwʼiye. Busana nʼeritunganana liwe eryo abirikola asyabyaho.

²³Omukama Iye Omwami Mukulu ati, Ngatsema busana nʼoluholo lwʼababi kwehĩ? Nĩkwa kumbe angabũnũkala akalũa omo syonzira siwe, iniabyaho.

²⁴Nĩkwa omugulu omundu utunganene akabinduka akaleka eritunganene riwe, nʼerikola ebibi, nʼerikola esyonye syosĩ ngʼomundu mubi kwʼakakola, asyabyaho kwehĩ? Emĩbĩrĩ yiwe yosĩ itunganene eyo abirikola siyendisyibukwa busana nʼeriteba liwe eryo abirikola, nʼomo bibi biwe ebyo abirikola. Asyahola busana nabyo.

²⁵Nĩkwa mũkabũga muti, Enzira yʼomukama siyitunganene. Uwe kihanda kya Ĩsraelĩ, uhulikirire! Enzira yage siyitunganene kwehĩ? Esyonzira syenyũ si syo sitatunganene kwehĩ?

²⁶Omugulu omundu utunganene akabũnũkala oko litunganene riwe, akakola ebibi, akahola busana nabyo, busana nʼebibi biwe ebyo abirikola asyahola.

²⁷Kandi, omugulu omundu mubi akabũnũkala oko bibi biwe ebyo abirikola, akakola erĩbanza lyʼekwenene nʼebitunganene, asyalamya engebe yiwe.

²⁸Kusangwa abĩrĩganĩrya eribinduka nʼerireka amalolo wuwe gosĩ ago akola, asyabyaho kwenene, Siendisyahola.

²⁹Nĩkwa ekihanda kya Ĩsraelĩ kĩkabũga kiti, Enzira yʼomukama sĩyĩhĩkene. Uwe kihanda kya Ĩsraelĩ, esyonzira syage sisitunganene kwehĩ? Esyonzira syenyũ si syo sitatunganene kwehĩ?

³⁰Busana nʼekyo Omukama Iye Omwami Mukulu ati, Uwe kihanda kya Ĩsraelĩ, nasyakutswera, obuli mundu ngʼemigendere yiwe. Musubule, mubinduke nʼerireka amalolo wenyũ gosĩ, neryo ebibi ibitabya ndwĩkale ũkwʼĩnywe.

³¹Muguse amalolo wenyũ gosĩ go hali, ago mwabĩrĩhalyamo, muyiyirire omutima muhya-muhya nʼekĩrĩmũ kihya-kihya! Kusangwa busana nakĩ, uwe kihanda kya Ĩsraelĩ, mwanzĩre erihola kwehi?

³²Omukama Iye Omwami Mukulu ati, Sindi nʼobutseme omo luholo lwʼomundu oyukahola. Neryo mubinduke, erireka ebibi, mubyeho.