Read nande Ezekĩelĩ 19 Bible Online

Ezekĩelĩ 19 - nande bible

Ezekĩelĩ 19

¹Nĩkwa uwe uyire ekiriro busana nʼesyongũla sya Ĩsraelĩ,

²ũbũge uti, Koyo wawe abyakĩ kwehĩ? Ebuguma yʼendale omo katĩkatĩ kʼesyondale! Mwagotsera omo katĩkatĩ kʼebyana byʼesyondale, moyakũlya ebyana byayo.

³Omugulu yakũlaya ekiguma omo byana byayo, mokyabya musuko wʼendale, kandi mokyiga erihiga enyama, moyalya abandu.

⁴Neryo ebihanda mobyowa engulu yayo. Moyahambwa omo buhya bwabo. Mobaletayo omo syombaniko erĩhĩka omo kihugo kyʼeMĩsĩrĩ.

⁵Neryo omugulu yalangira omugulu yalinda, ngoko amaha wayo siakiri, neryo mwĩmya ekindi kyʼoko byana byayo mwayirakyo mo musuko wʼendale.

⁶Nayo moyalendera eyĩ nʼeyĩ omo katĩkatĩ kʼesyondale. Mokyabya musuko wʼendale, mokyiga erihiga enyama. Mokyalya abandu.

⁷Nakyo mokyaherya amanyũmba wabo wʼerisungulika mokyayira emĩyĩ yabo mo bĩma. Nʼekihugo mokyabya mulala nʼabandu ababya mukyo, busana nʼomulenge wʼeriruruma lyayo.

⁸Neryo ebihanda mobyabambirayo oko mbande syosĩ bakalũa omo bihugo byabo. Neryo mobasesa obutaha-taha bwabo bo kuyo, nayo moyahambwa omo buhya bwabo.

⁹Neryo mobahĩrayo omo kasandũko, omo syombaniko mobaletayo oko mwami wʼeBabelĩ. Mobaletayo omo kitaha-taha kyʼerihiga, omulenge wayo siaswogũbawa oko bitwa bya Ĩsraelĩ.

¹⁰Koyo wawe abya ngʼomũlĩkĩ wʼebĩnyũ, omwʼirima lyawe lyʼebĩnyũ, ĩnĩaherĩre hakũhĩ nʼamagetsi. Omũlĩkĩ oyo mwaheta kandi mũsũla nʼemitahi busana nʼamagetsi mangi.

¹¹Nago abya nʼemitahi ĩkalĩre eyitolere omo myũtso yʼabatabalĩ, nʼobuli bwago mobwasumbwa endata oko bĩtũ, kyaleka inialolwako omo buli bwago haguma nʼobungi bwʼemitahi yago.

¹²Nĩkwa mwakulwa omwʼihitana, neryo mwaguswa ahisi oko kitaka, nʼerihunga lyʼendata molyũmya ebigũma byago. Omutahi wago owakalĩre mwabũnwa kyaleka iniuma. Nʼomuliro mwahĩsyago.

¹³Na lino aherĩre omo mbwarara, omo kihugo kyũmĩre nʼekihugo kikakere.

¹⁴Nʼomuliro abĩrĩlũa omo mutahi wago. Abĩrĩhĩsya emigera nʼebĩgũma byago, kyalekĩre ihatabya Omutahi owakalĩre, eribya mũtso wʼeritabala. Ekĩ ni kiriro, kandi kyabiribya kiriro.