Read nande Ezekĩelĩ 20 Bible Online

Ezekĩelĩ 20 - nande bible

Ezekĩelĩ 20

¹Neryo mokyabya oko mwaka wʼakalinda, oko mukera wʼeyĩtanu, oko kiro kyʼerĩkũmĩ kyʼomukera, abandi bʼoko bakulu ba Ĩsraelĩ mobasa erĩbũlya oko Mwami Mukulu, neryo mobĩkala embere syage.

²Nʼekĩnywa kyʼOmwami Mukulu mokyambĩkako kiti,

³Mugala wʼomundu, ũbũge nʼabakulu ba Ĩsraelĩ, ubwirebo uti, Omukama Iye Omwami Mukulu ati, Mwamasa nʼerĩnyĩbũlya omwatsi kwehĩ? Omukama Iye Omwami Mukulu ati, Ngoko nyiriho, sĩndĩendĩbũlĩbwa nenyũ.

⁴Wasyatswerabo, uwe mugala wʼomundu, wasyatswerabo kwehĩ? Ũmĩnyĩsayebo esyonye syʼabotata wabo.

⁵Ubwirebo uti, Omukama Iye Omwami Mukulu ati, Oko kiro ekyo nayisoga Ĩsraelĩ, nʼerĩlahĩrĩrya oko bana bʼekihanda kya Yakobo, nʼerĩyĩmĩnyĩsya kubo omo kihugo kyʼeMĩsĩrĩ, omugulu nalahĩrĩraya kubo nyiti, Ĩngye indi Mwami Mukulu Nyamuhanga wenyũ.

⁶Oko kiro ekyo nalahĩrĩrayabo, erĩlũsyabo omo kihugo kyʼeMĩsĩrĩ eriretabo omo kihugo ekyo nayisoga busana nabo, ekikasononoka mwʼamasabũ nʼobuki, ekikakanga oko bihugo byosĩ.

⁷Monabwirabo nyiti, Obuli mundu aguse esyonye syʼameso wuwe syo hali, Sĩmũyĩtsandaye omo syosanamu syʼeMĩsĩrĩ. Ingye indi Mwami Mukulu Nyamuhanga wenyũ.

⁸Nĩkwa mobahona ũkwʼĩngye, mobatalĩga erĩnyowa. Mobatagusa obuli mundu esyonye syʼameso wabo syo hali, kutse mobataleka esyosanamu syʼeMĩsĩrĩ. Neryo monabũga nyiti ngandĩũtũlĩra erihitana lyage lyo kubo, erĩberererya erihitana lyage kubo omo kihugo kyʼeMĩsĩrĩ.

⁹Nĩkwa monakola busana nʼerĩna lyage, isirvangatsumwa embere syʼameso wʼebihanda, eyo babya bĩkere, omo meso wabo monayĩmĩnyĩsya kubo erĩlũsyabo omo kihugo kyʼeMĩsĩrĩ.

¹⁰Ko nalũsayabo nyitya omo kihugo kyʼeMĩsĩrĩ, nʼeriretabo omo mbwarara.

¹¹Kandi monahabo ebihano byage, nʼerĩkangyabo eritswera lyage, eryo mundu amakolalyo, iniabyaho.

¹²Kandi monahabo esyo Sabato syage nibya eribya kiminyikalo omo katĩkatĩ kabo nage, ibatoka eriminya ko ndi Mwami Mukulu oyukahigulabo.

¹³Nĩkwa ekihanda kya Ĩsraelĩ mokyanyihonako omo mbwarara. Mobatalendera omo bihano byage, kandi mobagana eritswera lyage, ebyo mundu amakolabyo iniabyaho busana nabyo, nʼesyo Sabato syage mobatsumasyo kutsibu. Neryo monabũga nyiti ngandĩũtũlĩra kubo kwʼerihitana lyage omo mbwarara, eribugabo.

¹⁴Nĩkwa monakola busana nʼerĩna lyage, nyiti siritsumawe omo meso wʼebihanda, abo nalũsaya embere syʼameso wabo.

¹⁵Kandi monalahĩrĩryabo omo mbwarara nyiti sindiendiretabo omo kihugo ekyo nahabo, ekikasononoka mwʼamasabũ nʼobuki, nakyo ni ʼpipa lyʼebihugo byosĩ,

¹⁶kusangwa mobagana eritswera lyage, nʼeritindalendera omo migambo yage. Mobatsuma esyo Sabato syage, kusangwa emitima yabo moyakwama esyosanamu syabo.

¹⁷Nĩkwa erĩso lyage molyabalyabo, mondaheryabo, kandi mondaheryabo omo mbwarara.

¹⁸Monabwira abana babo omo mbwarara nyiti, Simukwame ebihano byʼabotata wenyũ, kutse simukwamirire eritswera lyabo, kutse erĩyĩtsandya omo syosanamu syabo.

¹⁹Ĩngye indi Mwami Mukulu Nyamuhanga wenyũ. Mukwame emigambo yage, mubike ebilayiro byage, nʼerikolabyo.

²⁰Mukenge esyo Sabato syage. Nasyo syasyabya kiminyikalo omo katĩkatĩ kenyũ nage, imwatoka eriminya ko ndi Mwami Mukulu Nyamuhanga wenyũ.

²¹Nĩkwa abana mobanyihonako. Mobatalendera omo bihano byage, kutse mobatabika eritswera lyage, erikolabyo, omundu amakolabyo iniabyaho. Mobatsuma esyo Sabato syage. Neryo monabũga nyiti ngandĩũtũlĩra kubo erihitana lyage, erĩberererya erihitana lyage lyo kubo omo mbwarara.

²²Nĩkwa monayĩkakĩrya, monakola busana nʼerĩna lyage nyiti siritsumawe embere wʼameso wʼebihanda, omo meso wʼabo nalũsayayo.

²³Kandi monalahĩrĩryabo omo mbwarara nyiti ngandisyapanza-panzirabo omo bihanda, nʼerĩpanzalĩkanĩabo omo katĩkatĩ kʼebihugo,

²⁴kusangwa mobatakola eritswera lyage, nĩkwa mobagana ebihano byage, nʼeritsuma esyo Sabato syage, nʼameso wabo mwakwamirira esyosanamu syʼabotata wabo.

²⁵Kandi monahabo ebihano ebĩtowene, nʼeritswera eryo bate bangatoka eribyaho mulyo.

²⁶Kandi monahulabo mo bandu batũnda-tũndĩre busana nʼesyonzũnzo syabo, kusangwa balabaya ehimbere hyabo hyosĩ omo muliro, inatoka eriyirabo mo kĩma, ibatoka eriminya ko ndi Mwami Mukulu.

²⁷Busana nʼekyo, mugala wʼomundu, ũbũge nʼekihanda kya Ĩsraelĩ, ubwirebo uti, Omukama Iye Omwami Mukulu ati, Abotata wenyũ babirinyitsuma batya Ũmwʼekĩ ibakakola erinyiteba.

²⁸Omugulu namabiretabo omo kihugo ekyo nalahĩraya eriha kyobo, neryo mobasamalira obuli kitwa kiri, nʼobuli muti wʼebikoma, nʼaho mobahonga esyohongo syabo, nʼeyo mobahererya ehongo yabo yʼerĩagalĩranĩa. Nʼaho mobakola ekikakumba ndeke, nʼaho mobũta amahere wabo wʼerĩpũlya.

²⁹Neryo monabũlyabo nyiti, Ahendata eyo mukaya ni ha nzumwakĩ kwehĩ? Neryo erĩna lyaho ni Bama erĩhĩka na mũnabwĩre.

³⁰Neryo Ubwire ekihanda kya Israelĩ uti, Omukama Iye Omwami Mukulu ati, Mũkayĩtsandaya omo mũsĩndo wʼabotata wenyũ kwehĩ? Kandi mukakola omwatsi wʼobũsĩngĩrĩ ngʼesyonye syabo kwehĩ?

³¹Nʼomugulu mukaha esyonzũnzo syenyũ, omugulu mũkalabaya abagala benyũ omo muliro, mũkĩnayĩtsandaya nʼesyosanamu syenyũ syosĩ erĩhĩka na mũnabwĩre kwehĩ? Nenyũ ĩnywe kihanda kya Ĩsraelĩ, mwasyanyĩbũlya kwehĩ? Omukama Iye Omwami Mukulu ati, Ngoko nyiriho, sindiendĩsyabũlĩbwa nenyũ.

³²Nʼebĩkahĩka omo bũlengekanĩa bwenyũ sibyendĩsyahĩka nʼahake, omugulu mũkabũga muti, Twasyabya ngʼebihanda, ngʼebihanda byʼebihugo, erikolera omuti nʼamabwe.

³³Omukama, Iye Omwami Mukulu ati, Ngoko nyiriho, kwenene oko byala byʼamaka, nʼomo kuboko kũyĩsũmbĩre, nʼomwʼihitana lyũtawa, nasyabya mwami ũkwʼĩnywe.

³⁴Nage nasyabalũsya oko bihanda, nʼeribakuma-kuma erĩlũa omo bihugo eyo mwapanzirawa, omo byala byʼamaka, nʼokuboko kũyĩsũmbĩre, nʼomwʼihitana eryũtawa.

³⁵Kandi nasyabaleta omo bwerere bwʼebihanda, nʼeyo nasyabatswera obũsũ nʼobũsũ.

³⁶Omukama Iye Omwami Mukulu ati, Ngoko nahĩka eritswera abotata wenyũ omo mbwarara yʼekihugo kyʼeMĩsĩrĩ, ko nasyahĩka nyitya eribatswera.

³⁷Kandi nasyabalabya omwisi wʼomũtso, nʼeribaleta omo mũlĩkĩ wʼendagano.

³⁸Nage nasyungula omo katĩkatĩ kenyũ abakahona, nʼabakanyĩhalayako. Nasyalũsyabo omo kihugo ekyo bakabungiramo, nĩkwa sibendisyingira omo kihugo kya Ĩsraelĩ. Litya nenyũ mwasyaminya ko ndi Mwami Mukulu.

³⁹Omukama Iye Omwami Mukulu ati, Nĩkwa ĩnywe ekihanda kya Ĩsraelĩ, mugende, mukolere obuli mundu esyosanamu siwe, nĩkwa enyũma, mwasyanyihulikirira kwenene, nʼerĩna lyage lĩbũyĩrĩre simwendisyaswatsumalyo omo syonzũnzo syenyũ nʼomo syosanamu syenyũ.

⁴⁰Kusangwa Omukama Iye Omwami Mukulu ati, Omo kitwa kyage kĩbũyĩrĩre, nʼomo kitwa kyʼendata kya Ĩsraelĩ, aho ekihanda kyosĩ kya Ĩsraelĩ, abosĩ ba kubo, basyanyikolera omo kihugo. Nʼeyo nasyalĩgabo; nʼeyo nasyasonda erĩhĩtya lyenyũ, nʼesyonzũnzo syenyũ syʼeriyisogwa, haguma nʼebindu byosĩ byenyũ bĩbũyĩrĩre.

⁴¹Nasyabalĩga ngʼerikumba lĩsĩhĩre ndeke, omugulu nasyabalũsya omo bihanda, nʼeribakuma-kuma omo bihugo ebyo mwapanzirawamo. Nage nasyakangya ko ndi mũbũyĩrĩre omo katĩkatĩ kenyũ omo meso wʼebihanda.

⁴²Nenyũ mwasyaminya ko ndi Mwami Mukulu, omugulu nasyabaleta omo kihugo kya Ĩsraelĩ, omo kihugo ekyo nalaga erihakyo abotata wenyũ.

⁴³Nʼeyo mwasyibuka esyonzira syenyũ nʼemĩbĩrĩ yenyũ yosĩ eyo mwayĩtsandayamo. Kandi mwasyayĩkwa nye omo meso wenyũ busana nʼebibi byosĩ ebyo mwabirikola.

⁴⁴Neryo mwasyaminya kwʼindi Mwami Mukulu omugulu namabikola nenyũ busana nʼerĩna lyage, butsira ngʼesyonzira syenyũ nyibi kutse ngʼemĩbĩrĩ yenyũ mibi, uwe kihanda kya Ĩsraelĩ, Omukama Iye Omwami Mukulu atya.

⁴⁵Neryo ekĩnywa kyʼOmwami Mukulu mokyambĩkako kiti,

⁴⁶Omugala wʼomundu, ũlolaye obũsũ bwawe ebwanga bwʼelutambi lwʼeyĩkwa, ũbũge obũyĩgũ-yĩgũ oko lutambi lwʼeyĩkwa, uminyerere obũyĩgũ-yĩgũ busana nʼomũsĩtũ wʼomolĩ owʼeluhande lwʼelutambi,

⁴⁷ubwire omũsĩtũ wʼelutambi lwʼeyĩkwa uti, Uhulikirire ekĩnywa kyʼOmwami Mukulu. Omukama Iye Omwami Mukulu akabũga ati, Lebaya, nasyakya omuliro omwisi wawe; nago asyahĩsya obuli muti mubisi omwisi wawe, nʼobuli muti ũmĩre. Ekirimi kyʼomuliro ekikagulumira Sĩkyendĩsyalĩmĩbwa, nʼehosĩ erĩtsũka elutambi lwʼeyĩkwa erĩhĩka oko lundi lutambi lwʼendata hasyahĩsĩrĩrĩbwa mugo.

⁴⁸Nʼabandu bosĩ basyalangira kwʼindi nĩ ngye Mwami Mukulu nabĩrĩakyago. Sĩendĩsyalĩmĩbwa.

⁴⁹Neryo monabũga nyiti, Ĩlolo, Omukama Iye Omwami Mukulu! Bakanyahula bati, Oyũ sĩalĩbũga omo mĩsyo kwehĩ?