Read nande Ezekĩelĩ 23 Bible Online

Ezekĩelĩ 23 - nande bible

Ezekĩelĩ 23

¹Ekĩnywa kyʼOmwami Mukulu mokyambĩkako kandi, kiti,

²Omugala wʼomundu, mohabya abakalĩ babiri, ababũtĩrwe nʼomũkalĩ muguma.

³Nabo mobabya bamalaya eMĩsĩrĩ. Mobakola obũsĩngĩrĩ omo bumbesa bwabo. Eyo amabere wabo mwatũtĩbwa, nʼebĩkũba byabo byʼobumbesa mobyahĩrwa kwʼebyala.

⁴Nʼamena wabo abya Ahola iyo mukulu, na Aholĩba mwali wabo. Nabo mobabya bage, mobabuta abagala nʼabali. Neryo amena wabo waya, Samarĩa ni Ahola, nʼeYerũsalema nĩ Aholĩba.

⁵Neryo Ahola mwayasĩngĩra omugulu abya wage. Mwayanza abaragane buwe Abanya Asũrĩa, abalĩkyabo,

⁶ababya bambite omunyama, abo ba batabalĩ, nʼabakama, abosĩ ba kubo babya balwana abʼerianzwa, abagendya bʼesyosabayĩrĩ.

⁷Neryo mwakola oluteto haguma nabo, abalume babuya bʼeAsũrĩa abosĩ. Mwakwa engumbu yabo abosĩ, mwayĩtsandya omo syosanamu syabo syosĩ.

⁸Kandi mwataleka oluteto luwe erĩtsũka oko biro byʼeMĩsĩrĩ. Kusangwa mobagotsera naye oko mugulu wʼobumbesa buwe, Kandi mobahĩra ebyala oko kĩkũba kyʼobumbesa buwe. Kandi mobamũkwa engumbu yabo.

⁹Busana nʼekyo, monamũhĩra omo byala byʼabaragane buwe, omo byala byʼAbanya Asũrĩa, abo akwa engumbu.

¹⁰Mobaswikula endũmbũ yiwe. Mobahũnga abagala nʼabali buwe, nĩkwa mobamwĩta omo mũyalĩ. Litya mwabya erĩna lyʼomũsyo omo katĩkatĩ kʼabakalĩ, kandi mobamutswera olubanza.

¹¹Na mwali wabo Aholĩba mwalangira ebĩ, nĩkwa mwatsanda kwilaba Ahola omo syongumbu siwe, nʼoluteto luwe lwabya lungi kwilaba oluteto lwa mwali wabo.

¹²Mwakwa Abasũrĩa bʼengumbu, abatabalĩ nʼabakama, abali hakũhĩ, ibambite esyowene-wene, abakagenda oko syosabayĩrĩ, abosĩ abalwana ababirianzwa.

¹³Nage monalangira kwʼabiritsanda; abosĩ babiri mobaya omo nzira nguma.

¹⁴Naye mwakanyĩrĩrya oluteto luwe. Kandi mwalangira erisosa lyʼabalume oko lũhĩmbo, ebĩsosekanĩo byʼAbakaldea ebĩsakĩre omo muhanda wʼeriambala omunyama,

¹⁵ĩbabohĩre emikoba omo mbindi syabo, haguma nʼehitambara ehikaleremba oko mitwe yabo, abosĩ ĩbasosĩre abakama, ngʼAbanya Babelĩ eKaldea, ekihugo babutawamo.

¹⁶Nʼomugulu Aholĩba alola kubo mwakwabo engumbu, mwatuma abakwenda kubo eKaldea.

¹⁷Abanya Babelĩ mobamũhĩkako omo ngyingo yʼolwanzo, mobamũtsandya nʼoluteto lwabo. Nʼomugulu bamabĩmũtsandya, omutima wuwe mwataswanzabo.

¹⁸Litya mwaswikula oluteto luwe, nʼeriswikula endũmbũ yiwe. Neryo omutima wage mwamũlũako ngoko mutima wage alũa uku mwali wabo.

¹⁹Neryo mwakanyĩrĩrya oluteto luwe, eryibuka ebiro byʼobumbesa buwe, omugulu akola oluteto omo kihugo kyʼeMĩsĩrĩ.

²⁰Kandi mwakwa engumbu yʼabaragane buwe, abawite omubiri ngʼomubiri wʼesyopunda, nʼolubuto lwasyo luli ngʼolubuto lwʼesyosabayĩrĩ.

²¹Litya wabĩrĩkwa engumbu yʼoluteto lʼobumbesa bwawe omugulu Abanya Mĩsĩrĩ bahĩra ebyala oko kĩkũba kyawe busana nʼamabere wʼobumbesa bwawe.

²²Neryo Omukama Iye Omwami Mukulu ati, Uwe Aholĩba, lebaya, nasyahanganĩa abaragane bawe erilwa nawe, abo mutima wawe abiripona, nage nasyaletabo oko mbande syosĩ erilwa nawe.

²³Abanya Babelĩ, nʼAbanya Kaldea bosĩ, Pekodĩ na Shoa, na Koa, nʼAbanya Asũrĩa bosĩ haguma nabo. Abalwana bʼerĩyĩtsũtswa, abatabalĩ nʼabakama, abosĩ ba kubo, abakulu, nʼabandu bakengĩrwe, abosĩ abakagenda oko syosabayĩrĩ.

²⁴Neryo basyalwa nawe omo bindu byʼamalwa, nʼesyogalĩ, nʼebĩrĩnge, endeko yʼabandu. Basyayihanda ukʼuwe haguma nʼamakombo nʼesyongabo, nʼengofia oko mbande syosĩ, kandi nasyahabo erĩtwa omwatsi, nabo basyakutswera ngʼemibere yabo.

²⁵Nage nasyahĩra obũha bwage ukʼuwe, nabo basyakukalako omwʼihitana. Basyalũsya enĩndo yawe nʼamatwĩ wawe. Nʼabakabala bawe basyawa omo mũyalĩ. Basyĩmya abagala bawe nʼabali bawe. Nʼabandu bawe abakabala basyahĩsĩbwa nʼomuliro.

²⁶Basyakũlũsya kwʼesyongimba syawe, basyaheka nʼamabwe wawe wʼobũgũlĩ bungi.

²⁷Litya nasyalĩkya oluteto lwawe, nʼobũsĩngĩrĩ bwawe ebyo walũsaya omo kihugo kyʼeMĩsĩrĩ ibyakuhwako, isiwangaswasumba ameso wawe kubyo kutse eriswibuka eMĩsĩrĩ.

²⁸Kusangwa Omukama Iye Omwami Mukulu ati, Lebaya, nasyakũhĩra omo byala byʼabo abakũkwĩre obusu, nʼomo byala byʼabandu abo mutima wawe abirigana.

²⁹Nabo basyakukolera ebyʼekĩnĩga, kandi basyahũnga obũsokĩ bwawe bosĩ, nʼerĩkũsĩga mo ndũmbũ nʼomubiri musa. Nʼendũmbũ yʼoluteto lwawe yasyaswikulwa, oluteto lwawe nʼobũsĩngĩrĩ bwawe ebibiri byosĩ.

³⁰Wasyakolwa ebĩ, kusangwa wabirikola oluteto nʼebihanda, kandi kusangwa wabĩrĩyĩtsandya omo syosanamu syabo.

³¹Wabirikwama enzira ya mwali wenyũ. Neryo nasyakũhererya omo byala byawe olũtehĩ luwe.

³²Omukama Iye Omwami Mukulu ati, Wasyapũlya olũtehĩ lwa mwali wenyũ, oluli-luli nʼolunene. Wasyasekererĩbwa nʼerihemulwa. Loswĩre mo bingi.

³³Wasyũsũla nʼerĩkũnda nʼobũlĩge, haguma nʼOlũtehĩ lwʼesyonye nʼomulala, lo lũtehĩ lwa mwali wenyũ Samarĩa.

³⁴Wasyapũlyalo nʼeribuyiriralo. Kandi wasyahala-hala wasyapopongolya oluyo lwalo, kandi wasyatulanga amabere wawe, kusangwa ĩngye Omukama Iye Omwami Mukulu nabĩrĩbũgakyo.

³⁵Neryo Omukama, Iye Omwami Mukulu ati, Kusangwa wabirinyibirirwa, kandi wabirinyigusa enyũma wʼomugongo wawe, neryo nawe uheke erisuyira lyʼoluteto lwawe nʼobũsĩngĩrĩ bwawe.

³⁶Kandi, Omwami Mukulu mwambwira ati, Omugala wʼomundu, wasyatswera Ahola na Aholĩba kwehĩ? Neryo ũtũlĩrebo esyonye syabo.

³⁷Kusangwa babiriteta, nʼomusasi ali omo byala byabo. Litya babiriteta esyosanamu syabo, kandi babĩrĩlabya abana babo omo muliro ngʼakalyo kʼesyosanamu, abo banyibutira.

³⁸Kandi babirinyikola ekĩ. Babĩrĩtsandya ahabũyĩrĩre hage omo kiro kiguma, nʼerĩhalya oko syoSabato syage.

³⁹Kusangwa omugulu bĩta abana babo busana nʼesyosanamu syabo, oko kiro ekyo mobahĩka ahabũyĩrĩre hage erĩhalyaho, neryo lebaya, babirikola batya omo nyũmba yage.

⁴⁰Kandi babiritumira abandu abakalũa ehali, omukwenda atumawa kubo, neryo lebaya, mobasa, mowayikosa busana nabo, mowahĩra engula oko meso wawe, nʼerĩyĩsũga omo butega.

⁴¹Mowĩkala oko ngyingo yowene, nʼemesa ĩnĩnasesĩre embere syayo, kandi mowahĩra obukwa nʼamagũta wage kuyo.

⁴²Nʼomulenge wʼendeko yʼabandu abya haguma naye. Nʼabalume abatamĩrĩ mobaletwa bakalũa omo mbwarara haguma nʼabalume batya-batya. Neryo mobahĩra emisege oko byala byabo, nʼesyombĩta esyowene oko mitwe yabo.

⁴³Neryo monabũga busana nʼoyo waluha omo luteto nyiti, Lino basyamuteta iniane atya kwehĩ?

⁴⁴Nabo mobingira aho ali, nga bakaya ahali omũsĩngĩrĩ. Ko bingira batya ahali Ahola na Aholĩba, abakalĩ batetĩ.

⁴⁵Nĩkwa ibo, abandu batunganene, basyatsweraabo nʼeritswera lyʼabatetĩ, nʼeritswera lyʼabakalĩ abakũta omusasi, kusangwa nĩ batetĩ nʼomusasi ali omo byala byabo.

⁴⁶Kusangwa Omukama Iye Omwami Mukulu ati, Mulete endeko erilwa nabo nʼerihabo eriubaha nʼerĩhũngwa.

⁴⁷Nʼendeko yasyĩtabo omo mabwe, nʼerĩtwĩrabo ahisi omo mĩyalĩ yabo. Basyĩta abagala babo nʼabali babo, nʼerĩhĩsya amanyũmba wabo gʼomo muliro.

⁴⁸Litya nasyaleka oluteto ĩlũmbya omo kihugo, abakalĩ bosĩ abakangĩrĩrĩbawa Sibakole oluteto ngoko wabirikola.

⁴⁹Neryo wasyaliha oluteto lwenyũ, nenyũ mwasyaheka erisuyira lyʼerĩramya esyosanamu syenyũ. Litya mwasyaminya ko ndi Mukama Iye Omwami Mukulu.