Read nande Ezekĩelĩ 26 Bible Online

Ezekĩelĩ 26 - nande bible

Ezekĩelĩ 26

¹Neryo mokyabya oko mwaka wʼerĩ kũmĩ nʼomuguma, oko kiro kyʼerĩtsũka omukera, ekĩnywa kyʼOmwami Mukulu mokyambĩkako kiti,

²Omugala wʼomundu, kusangwa Tĩro abĩrĩbũga busana nʼeYerũsalema ati, Ngaseka kusangwa olũkyo lwabirikingukala busana nage. Nasyũgũta kusangwa eYerũsalema yabiriyirwa mo kĩma.

³Neryo busana nʼekyo Omukama Iye Omwami Mukulu ati, Lebaya, ngalwa nawe uwe Tĩro, nasyaleta ebihanda bingi erilwa nawe, ngoko engetsi ikaleta ebisunda byayo.

⁴Nabo basyaherya esyombĩmbo syʼeTĩro, nʼerisambula amanyũmba mali-mali wako. Nibya nasyahalula olũtũtũ lwako, nʼeriyirako mwʼĩbwe risa.

⁵Naye asyabya ahʼerisanza amataha-taha omo katĩkatĩ kʼengetsi, kusangwa nabĩrĩbũgakyo, Omukama Iye Omwami Mukulu atya; naye asyabya munyegwa busana nʼebihanda.

⁶Nʼabali buwe abali oko mũsĩke wʼengetsi basyĩtwa omo mũyalĩ. Nabo basyaminya ko ndi Mwami Mukulu.

⁷Kusangwa Omukama Iye Omwami Mukulu ati, Lebaya, nasyaleta uku Tĩro ye Nebũkadeneza omwami wʼeBabelĩ, omwami wʼabami, erĩlũa elutambi lwʼendata haguma nʼesyosabayĩrĩ, nʼesyogalĩ, nʼabali oko syosabayĩrĩ, nʼendeko, nʼabasĩrĩkanĩ bangi.

⁸Asyĩta abali bawe oko mũsĩke wʼengetsi omo mũyalĩ, kandi asyabahĩmbĩra esyombĩmbo erikubambira nʼerĩhĩra ebilundo byʼekitaka erikubambira, nʼerĩhanganĩa ukʼuwe engabo nene.

⁹Kandi asyahĩra emipundo oko syombĩmbo syawe, kandi asyaterya amanyũmba mali-mali wawe omo mbasa.

¹⁰Busana nʼobungi bwʼesyosabayĩrĩ siwe olũtũtũ lwasyo lwasyakuswika. Esyombĩmbo syawe svasyatitimana busana nʼolukanda lwʼabali oko syosabayĩrĩ, nʼolwʼemiringo yʼesyogalĩ nʼolwʼesyogalĩ, omugulu akingira omo syongyo syawe, ngoko bandu bakingira omo mũyĩ asambukere.

¹¹Omo bigere byʼesyosabayĩrĩ siwe asyalyatanga esyonzira syawe syosĩ. Asyĩta abandu bawe omo mũyalĩ. Nʼesyondũyĩ syawe syʼamaka syasyandagala erĩhĩka oko kitaka.

¹²Kandi basyahũnga obũsokĩ bwawe, nʼerinyega ebindu byawe, basyasambula esyombĩmbo syawe nʼerĩherya amanyũmba mabuya wawe, basyagusa amabwe wawe nʼebisayi byawe nʼolũtũtũ lwawe omo katĩkatĩ kʼamagetsi.

¹³Litya nasyahũnerya emirenge yʼesyonyimbo syawe, nʼemirenge yʼesyonanga syawe siyendĩsyasyogũbwa kandi.

¹⁴Nasyakuyira mwʼĩbwe risa. Wasyabya busanzo bwʼamataha-taha. Siwendisyaswahĩmbwa kandi, kusangwa ingye Mwami Mukulu nabĩrĩbũgakyo, Omukama, Iye Omwami Mukulu atya.

¹⁵Omukama Iye Omwami Mukulu akabwira Tĩro ati, Ebihugo byʼoko mũsĩke wʼengetsi sibyendisyatitimana oko mulenge wʼeritera lyawe kwehĩ, omugulu abahutere bakasĩmba, nʼomugulu erĩkwa likakolawa omo katĩkatĩ kawe?

¹⁶Neryo abanya-mwami bʼengetsi basyakĩma bakalũa oko bĩtũmbĩ byabo byʼobwami, nʼeriambula esyoropo syabo, nʼeriambula esyongimba syabo esĩtsotsĩre. Basyambala erititimana. Basyĩkala ahisi oko kitaka, basyatitimana obuli ndambĩ, nʼerikuswekera.

¹⁷Kandi basyakuyira ekiriro, nʼerikubwira bati, Wabĩrĩherĩbwa uti, uwe wabya ahʼerĩĩkala hʼabʼoko ngetsi, uwe mũyĩ wʼengulu, owabya nʼamaka omo ngetsi, iye nʼesyondũlanĩ siwe, oyo wahĩra eriubaha oko syondũlanĩ syako syosĩ!

¹⁸Lino ebihugo ebiri oko mũsĩke wʼengetsi byasyatitimana oko kiro kyʼeritera lyawe. Ega, ebihugo ebiri oko mũsĩke wʼengetsi byasyubaha busana nʼerilaba lyawe.

¹⁹Kusangwa Omukama Iye Omwami Mukulu ati, Omugulu nasyakuyira mo kĩma kyʼomũyĩ, ngʼemĩyĩ eyite ko bandu, omugulu nasyakuleta kwʼemirindi, nʼamagetsi manene asyakũkũnĩngĩra,

²⁰oko mugulu oyo nasyakwandagalya haguma nʼabakandagalira omo buhya, oko bandu bʼomugulu wa kera, nasyakwĩkalya oko bihande byʼeyĩkwa byʼekihugo, ngʼemyanya ya kera yʼekĩma, haguma nʼabakandagalira omo buhya, ĩsĩwendĩsyĩkalwamo nʼabandu. Nĩkwa nasyahĩra olukengerwa omo kihugo kyʼabandu baliho.

²¹Nasyakuletera erĩũbahya, kandi siwendisyaswabyaho. Nomo wangasondĩbwa, nĩkwa siwendisyaswabanika na kera, Omukama Iye Omwami Mukulu atya.