Read nande Ezekĩelĩ 27 Bible Online

Ezekĩelĩ 27 - nande bible

Ezekĩelĩ 27

¹Kandi ekĩnywa kyʼOmwami Mukulu mokyambĩkako kandi kiti,

²Nawe, mugala wʼomundu, Usumbe omulenge wʼekiriro busana na Tĩro.

³Ubwire Tĩro uti, Uwe wĩkere omo bwingiriro bwʼengetsi uli mũtũndĩ wʼebihanda oko bihugo bingi hakũhĩ nʼengetsi, Omukama Iye Omwami Mukulu ati, Uwe Tĩro, wabĩrĩbũga uti, Nyĩhĩkene omo bubuya.

⁴Emitano yawe iri omo katĩkatĩ kʼesyongetsi. Abahĩmbĩ bawe bamahĩkanĩa obubuya bwawe.

⁵Babĩrĩhĩmba ebisayi byawe byosĩ omo miti yʼebĩlagũ bĩkalũa eSenĩrĩ. Babĩrĩmya omũerezĩ eLebanonĩ eribatsa omũlĩngote busana nawe.

⁶Omo mĩelo yʼeBasanĩ babiribatsa esyongahya syawe. Babiriyira ebĩtũmbĩ byawe omo meno wʼenzogũ, atũlũngene omo bisayi byʼemihugu ĩkalũa omo bihugo hakũhĩ nʼengetsi yʼeKĩtĩmũ.

⁷Etanga yawe yabya yʼekĩtanĩ kyowene omo mũbĩrĩ wʼeritsotsa ĩkalũa eMĩsĩrĩ, iyatoka eribya busana nawe ngʼebendera. Nʼolukimba olwakuswika lwabya lwʼakanĩkĩ nʼomuhanda wʼekinyenze bĩkalũa omo bihugo hakũhĩ nʼengetsi yʼeElĩsa.

⁸Esyondũlanĩ syʼeSĩdonĩ nʼeArwadĩ babya bagoyĩ bawe. Uwe Tĩro abandu banyima-nyima babya omwisi wawe. Bo babya basondolĩ bawe.

⁹Abakulu bʼeGebalĩ nʼabandu banyima-nyima bako babya haguma nawe bakalanda ahatũlĩkĩre hawe. Amato gosĩ wʼengetsi haguma nʼabakangwe babo babya haguma nawe bakatũndya ebindu byawe.

¹⁰Peresĩa na Lũdĩ na Pũtĩ babya omo mulondo wawe wʼabasĩrĩkanĩ, bo bandu bawe bʼamalwa. Mobahanika engabo nʼengofĩa yʼamalwa omwisi wawe. Mobakangya obubuya bwawe.

¹¹Abandu bʼeArwadĩ haguma nʼomulondo wawe wʼamalwa babya oko mbĩmbo syawe oko mbande syosĩ, nʼesyombangĩ syabya ababya omo manyũmba wawe mali-mali. Mobahanika esyongabo syabo oko mbĩmbo syawe oko mbande syosĩ. Babĩrĩhĩkanĩa obubuya bwawe.

¹²Tarsisi abya omũtũndĩ wawe busana nʼobungi bwʼobũsokĩ bwʼemihanda yosĩ. Haguma nʼebĩtsĩpa, nʼebyuma, nʼebatĩ, nʼerĩsasĩ, mobaliha busana nʼebindu byawe.

¹³Yawanĩ, na Tũbalĩ, na Mesekĩ, babya batũndĩ bawe. Omo ngebe syʼabandu nʼesyonyungu syʼomulinga mobaliha busana nʼebindu byawe.

¹⁴Abandu bʼeBetĩ-Togarma mobahĩnganĩa ebindu byawe omo syosabayĩrĩ, nʼesyosabayĩrĩ syʼamalwa nʼesyonyumbu.

¹⁵Abagala bʼeDedanĩ babya batũndĩ bawe. Emĩsĩke yʼengetsi mingi yabya katale kawe. Mobakuletera ameno wʼenzogũ nʼeebene erikuliha.

¹⁶Sũrĩa abya omũtũndĩ wawe busana nʼobungi bwʼobũsokĩ bwawe. Mobaliha busana nʼebindu byawe omo zũmarĩdĩ, nʼolukimba lwʼekinyenze, nʼomũbĩrĩ wʼeritsotsa, nʼekĩtanĩ kibuya, nʼamarĩzanĩ, na akĩkĩ.

¹⁷Yũda nʼekihugo kya Ĩsraelĩ, babya batũndĩ bawe. Mobaliha busana nʼobũsokĩ bwawe engano ya Mĩnĩtĩ, nʼehitole, nʼobuki, nʼamagũta, nʼeZerĩ.

¹⁸Damasekĩ abya mũtũndĩ wawe busana nʼobungi bwʼobũsokĩ bwawe, kandi busana nʼobungi bwʼemĩsĩndo yosĩ yʼebindu busana nʼebĩnyũ byʼeHelbonĩ, nʼobweya bwʼembũlĩ bweru-bweru.

¹⁹Wedenĩ na Yawanĩ mobaliha busana nʼebindu byawe bĩkalũa eŨzalĩ. Ebyuma bĩhenĩrye, nʼekĩda, nʼakane, ebyabya omo katĩkatĩ kʼebindu byawe byʼerĩhĩnganĩa.

²⁰Dedanĩ mwatunda ewawe omo syongimba esyʼerisesa oko sabayĩrĩ.

²¹Arabĩa nʼabanya-mwami bosĩ bʼeKedarĩ, babya batũndĩ bawe omo hyana hyʼembũlĩ, nʼesyombangale, nʼesyombene-hene, ũmwʼebĩ babya batũndĩ bawe.

²²Abatũndĩ bʼeSeba nʼeRama, babya batũndĩ bawe. Mobaliha busana nʼebindu byawe omo manũkato owene gosĩ, haguma nʼamabwe wʼobũgũlĩ, nʼesyamagetsi.

²³Haranĩ na Kane, na Edenĩ, abatũndĩ bʼeSeba, na Asũrĩ, na Kĩlamadĩ, mobatunda haguma nawe.

²⁴Babya bakatunda nawe omo syongimba syʼeriyisogwa, omo syongimba syʼakanĩkĩ nʼomũbĩrĩ wʼeritsotsa, omo mikeka yʼesyorangĩ nyingi nʼesyongohe esĩrĩngĩre ndeke, ebyabya omo katĩkatĩ kʼebindu byawe.

²⁵Amato wʼeTarsisi abya akaheka ebindu byawe. Nawe mowakamaha, mowasĩkĩbwa omo katĩkatĩ kʼesyongetsi.

²⁶Abagoyĩ bawe mobakuleta omo magetsi mangi. Erihunga lyʼendata molyakũbũnĩra omo katĩkatĩ kʼesyongetsi.

²⁷Obũsokĩ bwawe, nʼebindu byawe, nʼebindu byʼerĩgũlya byawe, abakangwe bawe, nʼabasondolĩ bawe bʼobwato, nʼabahakĩ bawe bʼenĩmba, nʼabahĩnganĩa bʼebindu byawe, nʼabandu bawe bosĩ bʼamalwa abali omwawe, haguma nʼabandu bosĩ bawe abali omo katĩkatĩ kawe, basyawa omo mirindi yʼengetsi omo kiro kyʼerihera lyawe.

²⁸Oko mulenge wʼerilaka lyʼabasondolĩ bawe bʼamato, amalĩsĩryo asyatitimana.

²⁹Nʼabosĩ abakahamba emĩhandyo, nʼabakangwe, nʼabasondolĩ bosĩ bʼamato wʼengetsi basyakĩma oko mato wabo. Basyahangana oko kitaka,

³⁰basyowĩsya omulenge wabo ukʼuwe, basyalira nʼobũlĩge. Basyagusa olũtũtũ oko mitwe yabo, basyayĩgalagalya omwʼĩbũ.

³¹Kandi basyayiyira mo bandu bʼoluhala busana nawe, basyayambalya emisarandwe, basyakulirira nʼobũlĩge bwʼomutima nʼekiriro kĩkalĩre.

³²Kandi omwʼimoleka omulenge wabo basyakuyira ekiriro, nʼeririra busana nawe bati, Nindi ali nga Tĩro, oyuli bũkũtũ omo katĩkatĩ kʼengetsi kwehĩ?

³³Omugulu ebindu byawe byʼerigula byahuluka omo ngetsi, mowũgũtya ebihanda bingi. Omo bungi bwʼobũsokĩ bwawe, nʼebindu byawe byʼerigula mowakamahya abami bʼekihugo.

³⁴Omugulu wabĩrĩbũnwa nʼesyongetsi omo mirindi yʼamagetsi, ebindu byawe nʼendeko yawe yosĩ byabiriwa omo katĩkatĩ kawe.

³⁵Esyondũlanĩ syosĩ syʼebihugo hakũhĩ nʼengetsi syamakuswekera, nʼabami babo bakubaha kutsibu. Bakasweka omo bũlĩge bwʼobũsũ bwabo.

³⁶Abatũndĩ omo katĩkatĩ kʼabandu bakakusitula. Wabiribya nʼeriubaha, neryo siwendisyaswabyaho kandi.