Read nande Ezekĩelĩ 28 Bible Online

Ezekĩelĩ 28 - nande bible

Ezekĩelĩ 28

¹Ekĩnywa kyʼOmwami Mukulu mokyambĩkako kiti,

²Mugala wʼomundu, Ubwire omũsondolĩ wʼeTĩro uti, Omukama Iye Omwami Mukulu ati, Kusangwa omutima wawe amayĩhamya, kandi wabĩrĩbũga uti, Ĩngye nyiri nyamuhanga, nyĩkere omo kĩtũmbĩ kyʼesyonyamuhanga, omo katĩkatĩ kʼesyongetsi. Nĩkwa uli mundu, suli Nyamuhanga, nomo wangahĩra omutima wawe eribya nga Nyamuhanga.

³Lebaya, uwite amenge kwilaba Danĩelĩ. Sihali erĩkũmbo lĩbĩsĩre ukʼuwe.

⁴Busana nʼamenge wawe na busana nʼeriminya lyawe wabiriyibanira ebindu, wabiriyibanira esyamagetsi nʼebĩtsĩpa busana nʼebindu byawe.

⁵Busana nʼamenge wawe manene, na busana nʼerĩtũndya lyawe wabiritomekera ebindu byawe, nʼomutima wawe amayĩhamya busana nʼebindu byawe.

⁶Busana nʼekyo, Omukama Iye Omwami Mukulu ati, Kusangwa Wabĩrĩhĩra omutima wawe ngʼomutima wa Nyamuhanga,

⁷neryo, lebaya, nasyakuletera abʼehandi, ebihanda ebĩkala-kalĩre. Nabo basyakula emĩyalĩ yabo erilwa nʼobubuya bwʼamenge wawe, kandi basyatsandya erĩkangabasanĩa lyawe.

⁸Basyakũkĩmĩrya omo buhya. Nawe wasyahola oluholo lwʼabandu ngʼabo abakĩtĩrawa omo mirindi yʼengetsi.

⁹Wasyaswabũga embere syʼoyũkakwĩta uti, Ĩngye indi nyamuhanga inuli mundu, isuli Nyamuhanga, omo byala byʼoyũkakũhũtalaya kwehĩ?

¹⁰Wasyahola oluholo lwʼabatabwene omo byala byʼabandu bʼehandi kusangwa nabĩrĩbũgakyo, Omukama Iye Omwami Mukulu atya.

¹¹Kandi ekĩnywa kyʼOmwami Mukulu mokyambĩkako kiti,

¹²Mugala wʼomundu, Uguse omulenge wʼekiriro busana nʼomwami wʼeTĩro, ũbũge naye uti, Omukama Iye Omwami Mukulu ati, Wabya nʼekiminyikalo kyʼerĩhĩkana, goswĩre nʼamenge, nʼerĩhĩkana omo bũsũge.

¹³Wabya omo Edenĩ, eririma lya Nyamuhanga. Obuli rĩbwe lyʼobũgũlĩ bunene lyabya ekyʼeriyiswika kyawe: esadĩyo, nʼetopasĩ, nʼedĩama, nʼeberũlĩ, nʼeonĩkĩ, nʼeyaspĩ, nʼesafĩro, nʼemerodĩ, nʼekabũngũlo, nʼesyamagetsi, omũbĩrĩ wʼengoma yawe nʼesyonyamulera syawe byabya omwisi wawe. Oko kiro wahangikawa mobyakokotĩbwa.

¹⁴Wabya mũkerũbĩ oyo wayisogawa oyukaswika, nage monakũhĩraho. Mowabya oko kitwa kĩbũyĩrĩre kya Nyamuhanga. Mowalendera omo katĩkatĩ kʼamabwe wʼomuliro.

¹⁵Wabya butsira kindu kyʼerikulega omo syonzira syawe erĩtsũka ekiro wahangikawa, erĩhĩka aho ebitatunganene byabanikira omwisi wawe.

¹⁶Busana nʼobungi bwʼeritunda lyawe, wabya woswĩre omwisi wawe nʼomwaga, nawe mowakola ebibi. Busana nʼekyo nabirikugusa nga kindu kĩtsũmĩre erĩlũa oko kitwa kya Nyamuhanga. Nabĩrĩkũherya uwe mũkerũbĩ oyukaswika, erĩlũa omo mabwe wʼomuliro.

¹⁷Omutima wawe ayĩhamaya busana nʼobukange bwawe. Mowatsandya amenge wawe busana nʼerĩkangabasanĩa lyawe. Neryo monakugusa oko kitaka. Monakũhĩra embere syʼabami, bakusamalire.

¹⁸Busana nʼobungi bwʼebibi byawe, nʼomo butatunganene obwʼeritunda lyawe, mowatsandya ahabũyĩrĩre hawe. Busana nʼekyo, nabĩrĩhũlũkya omuliro erĩlũa omo katĩkatĩ kawe. Abirikubuga, kandi nabirikuhindula mwʼĩbũ oko kihugo omo meso wʼabosĩ abakakusamalira.

¹⁹Abosĩ abakwasĩ omo katĩkatĩ kʼebihanda bakakuswekera. Wabiriubaha, nawe siwendisyaswabyaho kandi.

²⁰Ekĩnywa kyʼOmwami Mukulu mokyambĩkako kiti,

²¹Omugala wʼomundu ũlolaye obũsũ bwawe eSĩdonĩ, uminyerere amalwa busana nako,

²²ũbũge uti, Omukama Iye Omwami Mukulu ati, Lebaya, ngalwa nawe, uwe Sĩdonĩ, kandi nasyapipwa omo katĩkatĩ kawe. Neryo basyaminya ko ndi Mwami Mukulu, omugulu namabĩhĩra eritswera lyo mugo, kandi nasyakangya erĩbũyĩrĩre ryage mugo.

²³Kusangwa nasyamutumira obũkonĩ bwʼakasũsũ, nʼomusasi omo nzira syago, nʼabahutere basyawa omo katĩkatĩ kago, busana nʼomũyalĩ kugo oko mbande syosĩ. Neryo basyaminya ko ndi Mwami Mukulu.

²⁴Kandi Sihendisyaswabya erihwa erikatsimitanga busana nʼekihanda kya Ĩsraelĩ, kutse omusakisaki owakaluma ukwʼabo batĩmbĩre kubo abaponabo. Neryo basyaminya ko ndi Omukama Iye Omwami Mukulu.

²⁵Omukama Iye Omwami Mukulu ati, Omugulu namabikuma-kuma ekihanda kya Ĩsraelĩ omo bihanda ebyo bapanzirawamo, nage namabĩkangya omwisi wabo erĩbũyĩrĩre ryage omo meso wʼebihanda, oko mugulu oyo basyĩkala omo kihugo kyabo ekyo naha omukwenda wage Yakobo.

²⁶Nabo basyĩkala mukyo mo buholo. Kandi basyahĩmba amanyũmba, nʼerihera amalima wʼebĩnyũ, nʼerĩĩkala buholo, ekiro nasyatswera abosĩ abakaponabo oko mbande syosĩ. Neryo basyaminya ko ndi Mwami Mukulu Nyamuhanga wabo.