Read nande Ezekĩelĩ 3 Bible Online

Ezekĩelĩ 3 - nande bible

Ezekĩelĩ 3

¹Kandi mwambwira ati, Omugala wʼomundu, ulye ekyo wamabana. Ulye ekĩrĩngo kyʼekitabu ekĩ, neryo ugende, ũbũge nʼekihanda kya Ĩsraelĩ.

²Neryo monatanda obuno bwage naye mwanyĩrĩsya ekĩrĩngo ekyo.

³Neryo mwambwira ati, Mugala wʼomundu, ũlĩsaye enda yawe, gũsũlaye omubiri wawe mwʼekĩrĩngo ekĩ ekyo ngakuha. Neryo monalyakyo, mokyasihirira ngʼobuki omo buno bwage.

⁴Neryo mwambwira ati, Mugala wʼomundu, ugende uye oko kihanda kya Ĩsraelĩ, ubwirebo ebĩnywa byage.

⁵Kusangwa sulitumawa oko bandu bʼomũbũge owatasĩbwe kutse omũbũge akalĩre, nĩkwa oko kihanda kya Ĩsraelĩ,

⁶si ko ko bihanda bingi byʼemĩbũge ĩtasĩbwe, nʼomũbũge akalĩre, nʼebĩnywa utetoka eriminya. Kwenene namakutuma kubo, bangakowa.

⁷Nĩkwa ekihanda kya Ĩsraelĩ sĩbendĩsyalĩga erĩkowa, kusangwa sĩberĩga erĩnyowa. Kwenene ekihanda kyosĩ kya Ĩsraelĩ nĩ kyʼembũmo ĩkalĩre nʼobutsibu.

⁸Lebaya, nabiriyira obũsũ bwawe erikala oko mũsũ wabo, nʼembũmo yawe erikala oko syombũmo syabo.

⁹Nga almasĩ erikala kwilaba omutero, ko nabiriyira embũmo yawe. Sigubahebo, kutse erĩhahũkya omutima embere syabo kusangwa ni kihanda kyʼerihona.

¹⁰Nʼakandi mwambwira ati, Mugala wʼomundu, ebĩnywa byage byosĩ ebyo ngandikubwira, wangirirebyo omo mutima wawe, uhulikirire ndeke.

¹¹Ugende ukwʼabo banyegawa, oko bana bʼekihanda kyawe, ũbũge nabo ubwirebo uti, bamowa kutse bamatĩndĩowa, Omukama Omwami Mukulu atya.

¹²Neryo Omũlĩmũ mwanyisumba, nage monowa enyũma wage omulenge wʼerihuha ĩnene ati, Mupipe olukengerwa lwʼOmwami Mukulu ewuwe.

¹³Neryo monowa erihuha lyʼebĩpũpa byʼebihangikwa ebiriho omugulu byatũlanako, nʼerihuha lyʼebĩrĩngo aho mũsĩke wabyo, go mulenge wʼerihuha ĩnene.

¹⁴Neryo Omũlĩmũ mwanyisumba nʼerinyitwala ehandi. Nage monagenda omo bukali, nʼerĩhũka-hũka lyʼekĩrĩmũ kyage, nʼebyala byʼOmwami Mukulu mobyanyikalako nʼamaka.

¹⁵Neryo monahĩka ukwʼabo abanyegawa abĩkere hakũhĩ nʼolũsĩ lwʼeKebarĩ eTelĩ-Abĩbũ, neryo monĩkalaho ebiro birinda, aho babya bĩkere, monaswekerabyo.

¹⁶Neryo enyũma wʼebiro birinda, ekĩnywa kyʼOmwami Mukulu mokyambĩkako, kiti,

¹⁷Mugala wʼomundu, nabirikuyira mo mũteya busana nʼekihanda kya Ĩsraelĩ. Neryo omugulu ũkowa ekĩnywa kyʼomo buno bwage, ukangirirebo, ehee! busana nage.

¹⁸Omugulu ngabwira omundu mubi nyiti, Kwenene wasyahola, nawe sulimukangirira, ehee! kutse sulimubwira erikangirira omubi ehee! busana nʼenzira yiwe nyibi, iniatoka eribyaho, omundu mubi oyo asyahola omo bibi biwe, nĩkwa omusasi wuwe nasyabũlyago oko byala byawe.

¹⁹Nĩkwa wamabya wabirikangirira omubi ehee! naye Sialireka ebibi biwe kutse eribinduka oko nzira yiwe nyibi, asyahola omo bibi biwe; nĩkwa uwe wabĩrĩyĩlamya.

²⁰Kandi, omugulu omundu utunganene akalũa oko litunganene riwe, akakola ebibi, nage ngahĩra ekyʼerĩtwĩkalya embere siwe, asyahola; kusangwa sulitamukangirira ehee! asyahola omo bibi biwe, nʼemĩbĩrĩ yiwe itunganene eyo abirikola siyendisyibukwa; nĩkwa omusasi wuwe nasyabũlyago omo byala byawe.

²¹Nĩkwa wamakangirira omundu utunganene, ehee! uti oyutunganene siakole ebibi, naye isialikola ebibi, asyabyaho kwenene kusangwa mwalĩga erikangirirwa ehee! nawe wabĩrĩyĩlamya.

²²Nʼebyala byʼOmwami Mukulu mobyanyibyako aho, neryo mwambwira ati, Hangana, uye omo bwerere, nʼeyo nasyakanĩa nawe.

²³Neryo monahangana, monaya omo bwerere. Neryo, lebaya, olukengerwa lwʼOmwami Mukulu lwabya luhangene aho, ngʼolukengerwa olo nalangira hakũhĩ nʼolũsĩ lwʼeKebarĩ, neryo monawa kibiri-biri.

²⁴Neryo Omũlĩmũ mwanyingiramo, mwanyĩhanganĩa omo bisando byage. Mwabũga nage nʼerinyibwira ati, Ugende, uyikingire omo nyũmba yawe.

²⁵Nĩkwa uwe mugala wʼomundu, lebaya, basyakuboha omo mĩrĩkĩ, nʼerĩkũkũndĩka muyo, nawe siwendisyatoka erihuluka omo katĩkatĩ kabo.

²⁶Kandi nasyagobya olulimi lwawe erimatana nʼebĩtĩnĩnĩ byawe, wasyabya ĩkĩrũ, isiwendisyabya oyukakungabo, kusangwa ni kihanda kyʼerihona.

²⁷Nĩkwa omugulu nasyabũga nawe nasyakũmbũla obuno bwawe, nawe wasyabwirabo uti, Omukama Omwami Mukulu ati, Oyũkowa owe, nʼoyukagana erĩowa, agane, kusangwa ni kihanda kyʼerihona.