Read nande Ezekĩelĩ 30 Bible Online

Ezekĩelĩ 30 - nande bible

Ezekĩelĩ 30

¹Ekĩnywa kyʼOmwami Mukulu mokyambĩkako kiti,

²Omugala wʼomundu, uminyerere ũbũge uti, Omukama Iye Omwami Mukulu ati, Umoleke omulenge uti, Obũlĩge busana nʼekiro ekyo!

³Kusangwa ekiro ekyo kiri hakũhĩ, ekiro kyʼOmwami Mukulu kiri hakũhĩ. Kyasyabya ekiro kyʼebĩtũ, omugulu wʼerĩkwa busana nʼebihanda.

⁴Nʼomũyalĩ asyahĩka oko Mĩsĩrĩ, nʼobuligo bwasyabya omo Etĩopĩa, omugulu abakĩtawa basyawa eMĩsĩrĩ. Bakatwala obũsokĩ bwako, nʼebibanza biwe ibyasambulwa.

⁵Etĩopĩa, nʼePũtĩ, nʼeLũdĩ, nʼeArabĩa hosĩ, nʼeLĩbĩa, nʼabana bʼekihugo abakahanana nabo, basyawa omo mũyalĩ haguma nabo.

⁶Omwami Mukulu ati, Kwenene abakimira eMĩsĩrĩ basyawa. Nʼeriyiheka lyʼamaka wuwe lyasyakĩmĩra ahisi. Erĩtsũka eMĩgdolĩ erĩhĩka eSewene basyawa mukyo omo mũyalĩ, Omukama Iye Omwami Mukulu atya.

⁷Nabo basyanogokala omo katĩkatĩ kʼebihugo ebyʼebĩma. Nʼemĩyĩ yayo yasyabya omo katĩkatĩ kʼemĩyĩ ĩtsandĩre.

⁸Nabo basyaminya ko ndi Mwami Mukulu, omugulu namabĩhĩra omuliro eMĩsĩrĩ, nʼabawatĩkya buwe bosĩ ĩbamabĩbũnĩka.

⁹Oko kiro ekyo abakwenda basyahongoka erĩlũa embere syage omo mato erĩũbahya Abanya Etĩopĩa abatatsomene. Neryo hasyabya obuligo kubo, ngʼekiro kyʼeMĩsĩrĩ, kusangwa, lebaya, kyamasa!

¹⁰Omukama Iye Omwami Mukulu ati, Nasyaleka endeko yʼeMĩsĩrĩ ĩyũmbya busana nʼebyala bya Nebũkadeneza omwami wʼeBabelĩ.

¹¹Iye nʼabandu buwe haguma naye, owʼomwaga wʼebihanda, asyaletwamo erĩherya ekihugo. Nabo basyakula emĩyalĩ yabo erilwa nʼeMĩsĩrĩ, nʼerĩũsũlya ekihugo nʼabandu abĩtawa.

¹²Kandi nasyũmya emigende yʼeNĩlĩ, nʼerĩgũlya ekitaka omo byala byʼabandu babi. Kandi nasyayira ekihugo mo kĩma, nʼabosĩ balimo, omo byala byʼabʼehandi. Ingye, Mwami Mukulu, nabĩrĩbũgakyo.

¹³Omukama Iye Omwami Mukulu ati, Nasyaherya esyosanamu, nasyaleka esyosanamu ĩsyũmbya omo Nofũ. Sihendisyaswabya munya-mwami omo kihugo kyʼeMĩsĩrĩ. Nasyahĩra obuba omo kihugo kyʼeMĩsĩrĩ.

¹⁴Nasyayira Patro mo kĩma, nʼerĩhĩra omuliro eSoanĩ, nʼerĩhĩra eritswera oko No.

¹⁵Kandi nasyũtũlĩra erihitana lyage oko Sĩnĩ ahakongotere hʼeMĩsĩrĩ. Nage nasyĩta endeko yʼeNo.

¹⁶Kandi nasyahĩra omuliro omo Mĩsĩrĩ. ESĩnĩ yasyayinyola omo magalĩ, nʼeNo yasyatulangwa, nʼeNofũ yasyabya nʼesyonzĩgũ ebiro byosĩ.

¹⁷Nʼabalwana ba Awenĩ nʼabʼePĩbesetĩ basyawa omo mũyalĩ, nʼabakalĩ basyaya omo bunyegwa.

¹⁸Neryo omo Tehafũnesĩ omusibo asyabya kiro omugulu nasyabũna esyongomo syʼeMĩsĩrĩ eyo. Eriyiheka lyʼamaka wako lyasyamuhwako, ekĩtũ kyasyamuswika, nʼabali bako basyaya omo bunyegwa.

¹⁹Ko nasyahĩra eritswera lyage nyitya oko Mĩsĩrĩ, nabo basyaminya ko ndi Mwami Mukulu.

²⁰Neryo omo mwaka wʼerĩkũmĩ nʼomuguma oko mukera wʼerĩtsũka nʼoko kiro kyʼebirinda kyʼomukera, ekĩnywa kyʼOmwami Mukulu mokyambĩkako kiti,

²¹Omugala wʼomundu, nabĩrĩbũna okuboko kwa Farao, omwami wʼeMĩsĩrĩ, neryo, lebaya, mokutabohwa busana nʼerĩlamyako, kutse erisengwa omo pande ikwatoka eribana amaka wʼerihamba omũyalĩ.

²²Neryo Omukama Iye Omwami Mukulu ati, Lebaya, ngalwa na Farao, omwami wʼeMĩsĩrĩ, nasyabũna amaboko wuwe, okuboko okuli nʼamaka, nʼokuboko okwabũnĩka, kandi nasyaleka omũyalĩ eritoga erĩlũa omo byala biwe.

²³Kandi nasyapanza-panza Abanya Mĩsĩrĩ omo katĩkatĩ kʼebihanda, nʼeritsatsangabo omo katĩkatĩ kʼebihugo.

²⁴Kandi nasyasĩkya amaboko wʼOmwami wʼeBabelĩ, nʼerĩhĩra omũyalĩ wage omo byala biwe. Nĩkwa nasyabũna amaboko wa Farao naye asyasĩmba embere siwe nʼemĩsĩmbo yʼomundu uhutere.

²⁵Litya nasyasĩkya amaboko wʼOmwami wʼeBabelĩ, nĩkwa amaboko wa Farao asyatoga. Neryo basyaminya ko ndi Mwami Mukulu, omugulu nasyahĩra omũyalĩ wage omo byala byʼOmwami wʼeBabelĩ, naye asyakakĩryago erilwa nʼekihugo kyʼeMĩsĩrĩ.

²⁶Omugulu nasyapanza-panza Abanya Mĩsĩrĩ omo katĩkatĩ kʼebihanda, nʼeritsatsangabo omo katĩkatĩ kʼebihugo, neryo basyaminya ko ndi Mwami Mukulu.