Read nande Ezekĩelĩ 37 Bible Online

Ezekĩelĩ 37 - nande bible

Ezekĩelĩ 37

¹Ebyala byʼOmwami Mukulu mobyanyibyako, kandi mwanyĩhũlũkya omo Mũlĩmũ wʼOmwami Mukulu, mwanyĩkĩrya omo katĩkatĩ kʼomusya. Nago ĩnĩoswĩre mwʼamakũha.

²Naye mwanyĩlabya omo katĩkatĩ kago ehosĩ, neryo lebaya, habya mangi omo musya. Neryo lebaya, abya ũmĩre kutsibu.

³Neryo mwambwira ati, Mugala wʼomundu, amakũha aya anganatoka eribyaho kwehĩ? Nage monamũsũbĩrya nyiti, Uwe Omukama Iye Omwami Mukulu ũnasĩ.

⁴Kandi mwabũga nage ati, Uminyerere busana nʼamakũha aya, ubwirego uti, Ĩnywe makũha ũmĩre, muhulikirire ekĩnywa kyʼOmwami Mukulu.

⁵Omukama Iye Omwami Mukulu akabwira amakũha aya ati, Lebaya, nasyaleka omuka iningira omwisi wenyũ imwatoka eribyaho.

⁶Kandi nasyabahĩra kwʼemĩsĩsa nʼerĩbasũbya kwʼemĩnyokũ, nʼeribaswika kwʼesyongoba, nʼerĩhĩra omuka omwisi wenyũ, nenyũ imwatoka erisuba. Kandi mwasyaminya ko ndi Mwami Mukulu.

⁷Neryo monaminyerera ngoko nahanawa. Neryo omugulu nabya ngaminyerera mohabya olukanda, neryo lebaya, habya olukanda lwʼegasa-gasa. Nʼamakũ ha mwahĩndana haguma, erĩkũha oko lindi.

⁸Neryo monasamalira, neryo lebaya, emĩsĩsa moyabya kugo, nʼemĩnyokũ moyalasa. Nʼesyongoba mosyayibamba kugo. Nĩkwa Simwabya muka.

⁹Neryo mwambwira ati, Uminyerere busana nʼomuka, uminyerere, mugala wʼomundu, Ubwire omuka uti, Omukama Iye Omwami Mukulu ati, Uwe muka, wase ũkalũa oko mahunga ani, uhumulire oko bĩtawa aba, babane eribyaho.

¹⁰Neryo ko naminyerera nyitya ngoko anyihana, nʼomuka mwahĩka mugo, nago mwabyaho, mwahangana omo bisando byago, omulondo munene kutsibu wʼabasĩrĩkanĩ.

¹¹Neryo mwambwira ati, Mugala wʼomundu, amakũha aya ni kihanda kyosĩ kya Ĩsraelĩ. Lebaya, bakabũga bati, Amakũha wetu abiriuma, nʼamaha wetu abiritutalako. Twabirihwa.

¹²Neryo uminyerere, ubwirebo uti, Omukama Iye Omwami Mukulu ati, Lebaya, ĩnywe bandu bage, nasyalĩbũla amasinda wenyũ, nasyabahũlũkya omo masinda wenyũ. Kandi nasyabaleta omo kihugo kya Ĩsraelĩ.

¹³Neryo mwasyaminya ko ndi Mwami Mukulu, omugulu namabikingula amasinda wenyũ, nʼerĩbahũlũkya omo mahero wenyũ, ĩnywe bandu bage.

¹⁴Nasyahĩra Omũlĩmũ wage omwisi wenyũ, nenyũ mwasyasuba nʼeribyaho, nasyabahĩra omo kihugo kyenyũ. Neryo mwasyaminya kwʼindi nĩ ngye Mwami Mukulu, nabĩrĩbũgakyo nʼerikolakyo, Omwami Mukulu atya.

¹⁵Ekĩnywa kyʼOmwami Mukulu mokyambĩkako kandi kiti,

¹⁶Nawe, mugala wʼomundu, wĩmaye omuti muguma, Usake kugo, uti Busana na Yũda, na busana nʼabalĩkyabo abana ba Ĩsraelĩ. Neryo wĩmaye ogundi muti, Usake kugo uti, Busana na Yosefũ, omuti wa Efũraĩmũ, nʼabalĩkyabo, ekihanda kyosĩ kya Ĩsraelĩ.

¹⁷Ũmatĩkanayeyo mo muguma busana nawe, iyabana eribya muguma omo byala byawe.

¹⁸Nʼomugulu abana bʼabandu bawe basyabũga nawe bati, Sĩwendĩtũkangya enzumwa yawe busana nʼekĩ kwehĩ?

¹⁹ubwirebo uti, Omukama Iye Omwami Mukulu akabũga ati, Lebaya, nasyĩmya omuti wa Yosefũ, owali omo byala bya Efũraĩmũ nʼebihanda bya Ĩsraelĩ abalĩkyabo. Kandi nasyahĩrabo haguma nago, haguma nʼomuti wa Yũda, nʼeriyirabo mo muti muguma, nabo basyabya muguma omo byala byage.

²⁰Nʼemiti eyo wasakako yasyabya omo byala byawe omo meso wabo.

²¹Ubwirebo uti, Omukama Iye Omwami Mukulu akabũga ati, Lebaya, nasyahamba abana ba Ĩsraelĩ erĩlũa omo bihanda, eyo baya, nasyakuma-kumabo oko mbande syosĩ, nʼeriretabo omo kihugo kyabo.

²²Nage nasyayirabo mo kihanda kiguma omo kihugo, oko bitwa bya Ĩsraelĩ. Nʼomwami muguma asyabya mwami wabo abosĩ; neryo ibataswabya bihanda bibiri, kutse sibendisyaswagabwa mo mami abiri nʼahake.

²³Kandi sĩbendĩsyaswayĩtsandya omo syosanamu syabo, kutse omo bindu bibi byabo, kutse omo kiguma kyʼamalolo wabo; nĩkwa nasyalamyabo omo myanya yabo eyo bakola ebibi, nasyeryabo. Ko basyabya bandu bage batya, nage nasyabya Nyamuhanga wabo.

²⁴Nʼomugombe wage Dawĩdĩ asyabya mwami kubo nabo basyabya nʼomũlĩsya muguma. Basyalendera omo bilayiro byage, nʼeribika ebihano byage, nʼerikolabyo.

²⁵Nabo basyĩkala omo kihugo ekyo naha omugombe wage Yakobo, eyo abotata wenyũ bĩkala. Umwʼekyo basyĩkala, ibo nʼabana babo, nʼabitsikulu babo, kera na kera. Na Dawĩdĩ omugombe wage asyabya munya-mwami wabo kera na kera.

²⁶Kandi nasyahĩra endagano eyʼobuholo haguma nabo. Nayo yasyabya endagano ya kera na kera haguma nabo; nage nasyahĩrabo, nʼerĩkanyĩrĩryabo, nʼerĩhĩra ahabũyĩrĩre hage omo katĩkatĩ kabo erĩhĩka kera na kera.

²⁷Ahʼerĩĩkala hage hasyabya haguma nabo. Nage nasyabya Nyamuhanga wabo, nabo basyabya bandu bage.

²⁸Nʼebihanda byasyaminya ko ndi Mwami Mukulu oyukahigula Ĩsraelĩ, omugulu ahabũyĩrĩre hage hasyabya omo katĩkatĩ kabo kera na kera.