Read nande Ezekĩelĩ 38 Bible Online

Ezekĩelĩ 38 - nande bible

Ezekĩelĩ 38

¹Nʼekĩnywa kyʼOmwami Mukulu mokyambĩkako kiti,

²Mugala wʼomundu ũlolaye obũsũ bwawe ebwanga bwa Gogĩ bwʼekihugo kya Magogĩ, omunya-mwami wʼeRosĩ, eMesekĩ, nʼeTũbalĩ, uminyerere amalwa busana naye,

³ũbũge uti, Omukama Iye Omwami Mukulu ati, Lebaya, ngalwa nawe, uwe Gogĩ, omunya-mwami wʼeRosĩ, eMesekĩ, nʼeTũbalĩ.

⁴Nasyakubindula, nasyahĩra esyombaniko omo mikese yawe, nasyakũhũlũkĩrya eyĩhya, nʼomulondo wawe gosĩ wʼabasĩrĩkanĩ, esyosabayĩrĩ nʼabali kusyo, abosĩ ibambite amupa owene mangi, endeko nene omo ngabo enge nʼengabo nene, abosĩ ĩbahekĩre emĩyalĩ;

⁵Persĩa, na Kũsĩ, na Pũtĩ, haguma nabo, abosĩ ĩbahekĩre engabo nʼakakĩra kʼamalwa;

⁶Gomerĩ, nʼemilondo yiwe yosĩ; ekihanda kya Togarma omo bihande byʼendũlĩ byʼelutambi lwʼendata, nʼemilondo yiwe yosĩ yʼabasĩrĩkanĩ, abandu bangi haguma nawe.

⁷Ubye oyũyĩtegekenĩe, kandi ũyĩtegekanaye, uwe nʼemilondo yawe yosĩ eyabĩrĩyĩhĩndanĩa erĩkũtĩmbako, nawe ubye mũteya wabo.

⁸Enyũma wʼebiro bingi wasyabirikirwa. Oko myaka yʼenyũma wasyahĩka omo kihugo ekyabĩrĩsũbĩbwa oko mũyalĩ, esyondũlanĩ syako syabirikuma-kumwa omo bihanda bingi erĩhĩka oko bitwa bya Ĩsraelĩ, ebyabya kĩma ebiro byosĩ. Nĩkwa abandu bako balũsĩbawa omo bihanda, nabo bĩkere buholo, abosĩ ba kubo.

⁹Nawe wasyahetuka, wasyasa ngʼekihunga. Wasyabya ngʼekĩtũ eriswika ekihugo, uwe, nʼemilondo yawe yosĩ yʼabasĩrĩkanĩ, nʼebihanda bingi haguma nawe.

¹⁰Omukama Iye Omwami Mukulu ati, Oko kiro ekyo, emyatsi mingi yasyahĩka omo bũlengekanĩa bwawe, wasyategekerera omwatsi mubi.

¹¹Kandi wasyabũga uti, Nasyahetuka oko kihugo kyʼemĩyĩ ite ko mbĩmbo. Nasyabambira abandu abakaluhuka, abĩkere buholo, abosĩ ĩbĩkere butsira mbĩmbo, isibawite emĩkĩngĩryo kutse esyongyo,

¹²erĩyahũnga nʼerihamba obunyegwa, eribindula ebĩma ebĩkerwemo, lino erilwa nʼabandu babĩrĩyĩhĩndanĩa omo bihanda, ababiritunda esyonde nʼebindu, abĩkere omo katĩkatĩ kʼekihugo.

¹³Seba, na Dedanĩ, nʼabatũndĩ bʼeTarsisi, haguma nʼehĩyĩ hyayo hyosĩ, basyakũbũlya bati, Wamasa eriheka abanyegwa kwehĩ? Wamahĩndanĩa emilondo yawe erihamba obunyegwa, eriheka ebĩtsĩpa nʼesyamagetsi, eritwala esyonde nʼebindu, erĩhũnga obunyegwa bungi kwehĩ?

¹⁴Neryo, mugala wʼomundu, uminyerere, Ubwire Gogĩ uti, Omukama Iye Omwami Mukulu ati, Oko kiro ekyo abandu bage Ĩsraelĩ basyĩkala buholo siwendisyaminyakyo kwehĩ?

¹⁵Nawe wasyalũa aho wawe omo bihande byʼendũlĩ yʼelutambi lwʼendata, uwe nʼebihanda bingi haguma nawe, abosĩ ibali oko syosabayĩrĩ, endeko nene nʼomulondo wʼamaka wʼabasĩrĩkanĩ,

¹⁶nawe wasyahetukira abandu bage erilwa na Ĩsraelĩ ngʼekĩtũ kyʼeriswika ekihugo. Kyasyahĩka oko biro byʼenyũma, nasyakuleta erilwa nʼekihugo kyage, ebihanda ibyatoka erinyiminya omugulu nasyahigulwa busana nawe uwe Gogĩ, embere syʼameso wabo.

¹⁷Omukama Iye Omwami Mukulu ati, Uli oyo nahula oko mugulu wa kera busana nʼabagombe bage abamĩnyererĩ ba Ĩsraelĩ, abaminyerera oko biro ebyo busana nʼemyaka mingi ngoko nasyakuleta erilwa nabo kwehĩ?

¹⁸Neryo oko kiro ekyo, omugulu Gogĩ akasa erilwa nʼekihugo kya Ĩsraelĩ, Omukama Iye Omwami Mukulu ati, Erihitana lyage lyasyakanyirira omwʼigalirwa lyage.

¹⁹Neryo omo mũhwa wage nʼomo muliro wʼerihitana lyage nyiti, Oko kiro ekyo hasyabya kwenene omũsĩkĩ munene omo kihugo kya Ĩsraelĩ.

²⁰Nʼamahere wʼomo ngetsi, nʼesyonyonyũ syʼekyanya, nʼesyonyama syʼomolĩ, nʼebindu byosĩ ebikakululuka oko kitaka, nʼabandu bosĩ abali oko kihugo basyatitimanira embere syage. Nʼebitwa byasyaguswa ahisi, nʼenzira yʼesyongwangwa yasyatwĩka, nʼobuli lũhĩmbo lwasyaterera oko kitaka.

²¹Nage nasyabirikira omũyalĩ erilwa naye, Gogĩ, oko bitwa byage byosĩ, Omukama Iye Omwami Mukulu atya. Nʼomũyalĩ wʼobuli mundu asyalwa nʼomũlĩkyabo.

²²Nasyamutswera omo ndwala yʼakasũsũ nʼoko musasi. Nasyamũwĩsya kwʼembũla yʼekĩto, nʼamatwa manene manene, nʼomuliro, nʼomuliro wʼesekeseke, nʼoko milondo yiwe yʼabasĩrĩkanĩ, nʼoko bihanda bingi ebiri haguma naye.

²³Nasyayĩhamya, nʼeriyihigula, nʼerĩyĩmĩnyĩsya omo meso wʼebihanda bingi. Nabo basyaminya ko ndi Mwami Mukulu.