Read nande Ezekĩelĩ 40 Bible Online

Ezekĩelĩ 40 - nande bible

Ezekĩelĩ 40

¹Oko mwaka wʼamakũmĩ abiri nʼeyĩtanu wʼobunyegwa bwetu, okwʼĩtsũka lyʼomwaka, oko kiro kyʼerĩkũmĩ kyʼomukera, oko mwaka wʼerĩkũmĩ nʼeyĩnĩ enyũma wʼerĩkwa lyʼomũyĩ, oko kiro ekyo kisa-kisa, ebyala byʼOmwami Mukulu mobyanyibyako neryo mwamyireta eyo.

²Omo syonzolĩ sya Nyamuhanga mwanyireta omo kihugo kya Ĩsraelĩ, mwanyĩhĩra oko kitwa kiri-kiri kutsibu. Nʼoko kitwa ekyo ebwanga bwʼeluhande lwʼeyĩkwa habya enyũmba ngʼomũyĩ.

³Naye mwanyireta eyo. Neryo lebaya, habya omundu erisosa liwe lyabya ngʼerisosa lyʼomulinga, iniawite engohe yʼekĩtanĩ omo byala biwe, nʼoluseke lʼolulengo omo byala biwe. Neryo mwimana omo lũkyo.

⁴Nʼomundu oyo mwambwira ati, Mugala wʼomundu, ũyĩreberaye omo meso wawe, uhulikirire nʼamatwĩ wawe, ũhĩre omutima wawe oko byosĩ ngandĩkũkangya, kusangwa wamaletwa hano busana nʼerĩkũkangyabyo. Ũtũlĩre ekihanda kya Ĩsraelĩ ebyosĩ ebyo ukalangira.

⁵Neryo lebaya, habya olũhĩmbo olũtĩmbĩre eyĩhya oko Hekalũ, nʼomo byala byʼomundu oyo imune oluseke lwʼolulengo lwʼemetere 4; obuli mbindi ini lulengo lwʼesentĩmetere 52. Neryo mwalenga obunene bwʼolũhĩmbo ini metere 4; nʼobuli erĩlolya endata ini metere 4.

⁶Neryo mwahĩka oko lũkyo olukalola endata, neryo mwasamba oko bisambiro byayo, mwalenga ekisayi kyʼolũkyo ini metere 4 syʼobugali, nʼekindi kisayi kyʼolũkyo ini metere 4 syʼobugali.

⁷Nʼekyumba kyʼerĩteya ini buli bwa metere 4, nʼobugali bwa metere 4; nʼomwanya omo katĩkatĩ kʼebyumba byʼerĩteya abya wʼemetere 3. Nʼekisayi kyʼolũkyo hakũhĩ nʼobũsekũ bʼolũkyo ekĩlolĩrye oko nyũmba kyabya metere 4.

⁸Neryo mwalenga ekĩsekũ kyʼolũkyo ekĩlolĩre omo nyũmba, ini metere 4.

⁹Neryo mwalenga obũsekũ bwʼolũkyo ini metere 5; nʼesyonzeguliro syalo, ini metere 1; nʼobũsekũ bwʼolũkyo ĩbũlolĩrye omo nyũmba.

¹⁰Nʼebyumba byʼerĩteya byʼolũkyo ebwanga bwʼendata byabya bisatu oko luhande olũ, ebisatu oko luhande lulya. Ebisatu ebyo byabya lulengo luguma. Nʼesyonzeguliro syabya nʼolulengo luguma oko luhande olũ nʼoko luhande lulya.

¹¹Neryo mwalenga obugali bwʼobwingiriro bwʼolũkyo, ini metere 6; nʼobuli bwʼolũkyo ini metere 7.

¹²Kandi habya olũhĩmbo nʼomutano embere wʼebyumba byʼerĩteya lwʼesentĩmetere 52 oko luhande olũ, nʼomutano oko lundi luhande ini sentĩmetere 52; nʼebyumba oko luhande olũ, ini metere 4, nʼoko luhande lulya ini metere 4.

¹³Neryo mwalenga olũkyo erĩtsũka oko lutwe lwʼekyumba kiguma erĩhĩka oko lutwe lwʼekindi, ini bugali bwʼemetere 13; Olũyĩ oko lundi lũyĩ eyisirya.

¹⁴Kandi mwakola esyondũyĩ syʼelutambi metere 32; nʼolũkyo molwahĩka, oko ndũyĩ yʼelutambi lwʼekibuga.

¹⁵Nʼerĩtsũka embere wʼolũkyo lwʼeriingira erĩhĩka aho mbere syʼobũsekũ bwʼomwisi bwʼolũkyo ini metere 26.

¹⁶Kandi habya amadĩrĩsa awakĩngĩre kandi ĩnĩalolĩrye ebwanga bwʼebyumba byʼerĩteya nʼebwanga bwʼesyondũyĩ syʼelutambi omo lũkyo omo mbande syosĩ, nʼomo bũsekũ ehosĩ nibya. Kandi habya amadĩrĩsa ehosĩ omwisi. Nʼoko buli ndũyĩ yʼelutambi habya emyambalo yʼemiti yʼamabondo.

¹⁷Neryo mwanyireta omo kibuga ekyʼeyĩhya, neryo lebaya mohabya ebyumba nʼamabwe awasesĩreho awayirawa busana nʼekibuga ekĩtĩmbĩreho. Ebyumba amakũmĩ asatu byabya bĩlolĩrye oko kibuga kyʼamabwe ayo.

¹⁸Nʼekibuga kyʼamabwe ayo ekibuga kyʼeyĩkwa kyabya oko ndambi yʼesyongyo, nʼobuli bwakyo bwabya ngʼobuli bwʼesyongyo, kye kibuga kyʼeyĩkwa.

¹⁹Neryo mwalenga obugali erĩtsũka aho, embere gʼolũkyo lwʼeyĩkwa erĩhĩka aho mbere hʼekibuga kyʼomwisi eyĩhya wakyo ini metere 52, oko luhande lwʼendata nʼolwʼelutambi lwʼendata.

²⁰Neryo busana nʼolũkyo lwʼekibuga kyʼeyĩhya olũlolĩrye elutambi lwʼendata, mwalenga obuli bwalo nʼobugali bwalo.

²¹Nʼebyumba byʼerĩteya byalo byabya bisatu oko luhande olũ, nʼebisatu oko luhande lulya. Nʼesyondũyĩ syalo syʼelutambi nʼobũsekũ bwalo bwabya omo lulengo lʼolũkyo lwʼerĩmbere. Nʼobuli bwalo bwabya metere 26, nʼobugali bwaho metere 13.

²²Nʼamadĩrĩsa waho nʼobũsekũ bwʼehosĩ, nʼebyambalo byʼemiti yʼamabondo byabya omo lulengo lwʼolũkyo olũlolĩrye endata. Mobahetukiraho oko bisambiro birinda, nʼobũsekũ bwʼaho bwabya embere wabyo.

²³Kandi ekibuga kyʼomwisi kyabya nʼolũkyo eyisirya oko lundi lũkyo lwʼelutambi lwʼendata nʼolũkyo oko luhande lwʼendata nibya. Naye mwalenga erĩtsũka oko lũkyo nʼerĩhĩka oko lundi lũkyo ini metere 52.

²⁴Neryo mwanyisondola mwanyĩlolya oko luhande lwʼelutambi lwʼeyĩkwa, neryo lebaya, habya olũkyo olũlolĩrye elutambi lwʼeyĩkwa. Naye mwalenga esyondũyĩ syʼelutambi nʼobũsekũ bwalo omo lulengo olo.

²⁵Neryo olũkyo nʼobũsekũ bosĩ byabya nʼamadĩrĩsa oko mbande syosĩ, ngʼawandi madĩrĩsa ayo. Nʼobuli bwabya metere

²⁶nʼobugali bwabya metere 13. 26 Kandi habya ebisambiro birinda ebikahetukiraho, nʼobũsekũ bwalo bwabya embere wabyo. Nalo lwabya kwʼebyambalo byʼamabondo oko syondũyĩ syʼelutambi, ekyambalo kiguma oko buli lutambi.

²⁷Kandi habya olũkyo lwʼekibuga kyʼomwisi olũlolĩrye elutambi lwʼeyĩkwa. Neryo mwalengaho erĩtsũka oko lũkyo erĩhĩka oko lundi lũkyo erĩlolya elutambi lwʼeyĩkwa ini metere 52.

²⁸Neryo mwanyireta oko kibuga kyʼomwisi omo lũkyo lwʼelutambi lwʼeyĩkwa. Neryo mwalenga olũkyo lwʼelutambi lwʼeyĩkwa omo lulengo olo.

²⁹Nʼebyumba byalo byʼerĩteya nibya, nʼesyondũyĩ syalo syʼelutambi, nʼobũsekũ bwalo bwabya omo lulengo olo. Nʼolũkyo olo nʼobũsekũ omo lulengo olo. Nʼolũkyo olo nʼobũsekũ bwalo byabya nʼamadĩrĩsa oko mbande syosĩ. Obuli bwalo ini metere 13, nʼobugali bwalo ini metere 13.

³⁰Kandi habya obũsekũ oko mbande syosĩ, obuli bwʼemetere 13, nʼobugali bwʼemetere 3.

³¹Nʼobũsekũ bwalo bwabya bũlolĩrye oko kibuga kyʼeyĩhya. Nʼebyambalo byʼemiti yʼamabondo byabya oko syondũyĩ syʼelutambi syalo. Kandi habya ebisambiro munani byʼerihetukako.

³²Neryo mwanyireta omo kibuga kyʼomwisi erĩlolya eyo eryuba likasira. Neryo mwalenga olũkyo ngʼolulengo olo.

³³Ebyumba byʼerĩteya byalo nʼesyondũyĩ syʼelutambi syalo, nʼobũsekũ bwalo bwabya ngʼolulengo olo. Nʼolũkyo olo nʼobũsekũ bwalo byabya nʼamadĩrĩsa oko mbande syosĩ. Obuli bwabyo ini metere 26 nʼobugali bwabyo ini metere 13.

³⁴Nʼobũsekũ bwaho bwabya bũlolĩrye oko kibuga kyʼeyĩhya. Nʼebyambalo byʼomuti wʼamabondo byabya oko syondũyĩ syalo syʼelutambi, oko luhande olũ nʼoko lundi luhande. Kandi habya ebisambiro munani byʼerihetukiraho.

³⁵Neryo mwanyireta oko lũkyo lwʼelutambi lwʼendata. Neryo mwalengalo ngʼolulengo olo,

³⁶nʼebyumba byʼerĩteya byalo, nʼesyondũyĩ syalo syʼelutambi, nʼobũsekũ bwalo. Nʼolũkyo lwabya nʼamadĩrĩsa omwisi walo oko mbande syosĩ. Obuli bwalo ini metere 26, nʼobugali bwalo ini metere 13.

³⁷Nʼesyondũyĩ syʼelutambi syalo syabya sĩlolĩrye oko kibuga kyʼeyĩhya. Nʼebyambalo byʼamabondo ibiri oko syondũyĩ syalo, oko luhande olũ, nʼoko lundi luhande lulya. Ikuli ebisambiro munani ebyʼerihetukiraho.

³⁸Ekyumba haguma nʼolũkyo lwakyo kyabya hakũhĩ nʼesyondũyĩ syʼelutambi oko syongyo. Naho iho bakereraya obuhere bwʼerĩokererya.

³⁹Nʼomo bũsekũ bʼolũkyo habya esyomesa ĩbĩrĩ oko luhande olũ, nʼesyomesa ĩbĩrĩ oko luhande lulya esyʼerikererako obuhere bwʼerĩokererya nʼobuhere bwʼebibi, nʼobuhere bwʼolubanza.

⁴⁰Kandi oko luhande lwʼeyĩhya ahakahetukawa oko lũkyo erĩlolya elutambi lwʼendata, habya esyomesa ĩbĩrĩ. Nʼeyisirya oko lundi luhande oluli kʼobũsekũ bʼolũkyo habya esyomea ĩbĩrĩ.

⁴¹Esyomesa ĩnĩ syabya oko luhande olũ, nʼesyomesa ĩnĩ oko luhande lulya, hakũhĩ nʼolũkyo, esyosĩ syabya mesa munani, mobakerera kusyo kwʼesyohongo.

⁴²Kandi habya esyomesa ĩnĩ busana nʼobuhere bwʼerĩokererya, esyomesa syʼamabwe awabatsĩre, obuli bwasyo ini sentĩmetere 78, nʼobugali bwasyo ini sentĩmetere 78, nʼobuli bwasyo endata ini sentĩmetere 52, mobahĩra kusyo ebyuma ebyo bakeramo obuhere bwʼerĩokererya nʼehongo.

⁴³Nʼesyombaniko kabiri, obuli bwasyo ini sentĩmetere 8, mosyahĩrwa omo nyũmba oko mbande syosĩ. Nʼoko syomesa mohabya esĩswĩ syʼobuhere.

⁴⁴Nʼerĩtsũka eyĩhya erĩhĩka oko lũkyo lwʼomwisi habya ebyumba busana nʼabĩmbĩ omo kibuga kyʼomwisi ekyumba kiguma kyako kyabya oko luhande lwʼolũkyo lwʼelutambi lwʼendata, nʼembere syakyo iyikalola oko luhande lwʼelutambi lwʼeyĩkwa, nʼenguma iyiri oko lutambi lwʼolũkyo lwʼaho eryuba likasira, nʼerĩlolya oko luhande lwʼelutambi lwʼendata.

⁴⁵Neryo mwambwira ati, Ekyumba ekĩ kĩlolĩrye oko luhande lwʼelutambi lwʼeyĩkwa, kiri busana nʼabahererĩ abakategaya eHekalũ.

⁴⁶Nĩkwa ekyumba ekĩkalolaya elutambi lwʼendata kiri busana nʼabahererĩ abakategaya ekiherero. Abo ni bagala ba Zadokĩ, oyuli oko bagala ba Lawĩ abakasegera hakũhĩ nʼOmwami Mukulu erimukolera.

⁴⁷Neryo mwalenga ekibuga, obuli bwakyo ini metere 52, nʼobugali ini metere 52, ibiringirirene. Nʼekiherero kyabya embere syʼeHekalũ.

⁴⁸Neryo mwanyireta oko bũsekũ bwʼeHekalũ, neryo mwalenga obuli bwʼendũyĩ yʼelutambi yʼobũsekũ metere 3 oko luhande olũ, nʼemetere 3 oko luhande lulya. Nʼobugali bwʼolũkyo bwabya metere 2 oko luhande olũ, nʼemetere 2 oko luhande lulya.

⁴⁹Obuli bwʼobũsekũ bwabya metere 11, nʼobugali bwakyo bwabya metere 6; hakũhĩ nʼebisambiro aho bahetukira habya esyondũyĩ syʼesyondũyĩ syʼelutambi, enguma oko luhande olũ, nʼeyindi oko lundi lulya.