Read nande Ezekĩelĩ 43 Bible Online

Ezekĩelĩ 43 - nande bible

Ezekĩelĩ 43

¹Enyũma wʼaho mwanyireta oko lũkyo, olũkyo olukalola oko luhande lwʼendata.

²Neryo lebaya, olukengerwa lwa Nyamuhanga wa Ĩsraelĩ molwahuluka omo nzira yʼoluhande lwʼendata. Omulenge wuwe abya ngʼerihuha lyʼamagetsi mangi, nʼekihugo mokyakangabasanĩa omo lukengerwa luwe.

³Nalo lwabya ngʼerisosa lyʼesyonzolĩ esyo nalangira, ngʼerilota eryo nalangira omugulu asa erĩherya omũyĩ. Nʼesyonzolĩ esyo syabya ngʼesyonzolĩ nalangira hakũhĩ nʼolũsĩ lwʼeKebarĩ, neryo monawa kibiribiri.

⁴Nʼolukengerwa lwʼOmwami Mukulu molwingira omo nyũmba omo nzira yʼolũkyo olũlolĩrye ebwanga bwʼendata.

⁵NʼOmũlĩmũ mwanyisumba nʼerinyireta omo kibuga kyʼomwisi. Neryo lebaya, olukengerwa lwʼOmwami Mukulu molũsũlya enyũmba.

⁶Neryo monowa omundu omo nyũmba akabũga nage. Omugulu omundu ahangana hakũhĩ nage.

⁷Naye mwambwira ati, Omugala wʼomundu, hano ni mwanya wʼekĩtũmbĩ kyage kyʼobwami, nʼomwanya wʼebisando byage, aho nasyĩkala omo katĩkatĩ kʼabana ba Ĩsraelĩ kera na kera. Nʼekihanda kya Ĩsraelĩ sĩkyendĩsyaswatsandya erĩna lyage lĩbũyĩrĩre, kutse ibo, kutse abami babo, omo bũsĩngĩrĩ bwabo, nʼomo bĩnda byʼabami babo omugulu bakahola,

⁸bakahĩra enzeguliro yabo hakũhĩ nʼenzeguliro yage, nʼengologo yabo hakũhĩ nʼengologo yage, ihali olũhĩmbo lusa omo katĩkatĩ kage nabo. Kandi babĩrĩtsandya erĩna lyage omo nye syabo esyo babirikola. Busana nʼekyo nabiribugabo omwʼihitana lyage.

⁹Na lino bũmbaye oko bũsĩngĩrĩ bwabo, nʼebĩnda byʼabami babo hali ũkwʼĩngye, nage nasyĩkala omo katĩkatĩ kabo kera na kera.

¹⁰Nawe, omugala wʼomundu, ũkangaye eHekalũ oko kihanda kya Ĩsraelĩ ibatoka erihemuka busana nʼebibi byabo, kandi balenge olulengo lwayo.

¹¹Nabo bamahemuka busana nʼebyosĩ babirikola, ũmĩnyĩsayebo erisosa lyʼenyũmba, nʼomuhanda wayo, nʼesyombuluko syamo, nʼamingiriro wayo, nʼemihanda yosĩ yayo, nʼebilayiro byosĩ byayo, nʼemigambo yosĩ yayo. Usakebyo omo meso wabo, ibatoka erĩteya omuhanda gosĩ wayo, nʼemigambo yayo yosĩ, bakolebyo.

¹²Ekĩ kyo kihano kyʼenyũmba. Omwanya gosĩ wayo, oko singi yʼekitwa erĩtĩmba ehosĩ asyabya habũyĩrĩre kutsibu. Ũlebaye, ekĩ kyo kihano kyʼenyũmba.

¹³Olũ ni lulengo lwʼekiherero omo metere, endĩna yakyo yasyabya sentĩmetere 52, nʼobugali nĩ sentĩmetere 52, nʼomũsĩke wʼomũnywa wʼaho oko mbande syosĩ nĩ sentĩmetere 26; ekĩ kyasyabya obuli bwʼendata bwʼendĩna yʼekiherero.

¹⁴Nʼerĩtsũka oko ndĩna oko kitaka erĩhĩka oko mũnywa wʼeyĩkwa hasyabya metere 2, nʼobugali nĩ sentĩmetere 52; kandi erĩtsũka oko mũnywa muke erĩhĩka oko mũnywa munene hasyabya metere 3, nʼobugali nĩ sentĩmetere 52.

¹⁵Nʼerĩko lyʼekiherero lyasyabya metere 3 endata, nʼerĩtsũka oko lĩko lyʼekiherero erĩhĩka endata hasyabya amahembe ani.

¹⁶Nʼerĩko lyʼekiherero obuli bwalyo bwasyabya metere 7, nʼobugali ni metere 7; esyombande syosĩ isyalingirirana.

¹⁷Nʼobuli bwʼomũnywa bwasyabya metere 8, nʼobugali metere 8 omo syombande ĩnĩ syaho. Nʼomũsĩke wago asyabya sentĩmetere 26, nʼendĩna yago eyĩtĩmbĩreho yasyabya sentĩmetere 52. Ebisambiro byaho byasyalola ebwanga bwʼendata.

¹⁸Neryo mwambwira ati, Omugala wʼomundu, Omukama Iye Omwami Mukulu ati, Ebĩ byo bilayiro byʼekiherero oko kiro kyasyahĩmbwa, erihererako amahere wʼerĩokererya, nʼeritsatsanga kukyo kʼomusasi.

¹⁹Mwasyaha abahererĩ Abalawĩ abali oko bana ba Zadokĩ, abakayĩtũnda hakũhĩ nage, erinyikolera, enume ndere yʼende busana nʼobuhere bwʼebibi, Omukama Iye Omwami Mukulu atya.

²⁰Neryo wasyĩmya oko musasi wayo nʼerĩhĩrago oko mahembe ani waho, nʼoko syonũnga ĩnĩ syʼomũnywa, nʼoko mũsĩke owatĩmbĩreho. Ko wasyakola utya erĩeryakyo nʼeririhirakyo.

²¹Nʼakandi wasyĩmya enume yʼende yʼobuhere bwʼebibi, yasyokererĩbwa ahahamulawa hʼenyũmba, eyĩhya wʼahabũyĩrĩre.

²²Nʼoko kiro kyʼakabiri wasyahera embaya eyite ko katĩngũ busana nʼobuhere bwʼebibi. Nabo basyerya ekiherero, ngoko berayaho omo nume.

²³Omugulu wamabĩeryakyo, wasyahera enume ndere yʼende eyite ko katĩngũ nʼembangale yʼekihangulo eyite ko kĩtĩngũ.

²⁴Nawe wasyaletasyo hakũhĩ embere syʼOmwami Mukulu, nʼabahererĩ basyũta kusyo kʼomũnyũ, basyaherasyo eribya buhere bwʼerĩokererya busana nʼOmwami Mukulu.

²⁵Oko biro birinda obuli kiro wasyategekanĩa embene eribya buhere bwʼebibi. Kandi basyategekanĩa enume ndere yʼende, nʼembangale yʼekihangulo, esite ko kĩtĩngũ syasyategekanĩbwa.

²⁶Oko biro birinda basyalihira ekiherero embanulo nʼerĩeryakyo. Ko basyahigulakyo batya.

²⁷Neryo omugulu bamabĩberererya ebiro, kyasyabya oko kiro kyʼomunani nʼenyũma wʼaho, abahererĩ basyahera amahere wenyũ wʼerĩokererya oko kiherero, nʼamahere wenyũ wʼobuholo. Nage nasyabalĩga, Omukama Iye Omwami Mukulu atya.