Read nande Ezekĩelĩ 45 Bible Online

Ezekĩelĩ 45 - nande bible

Ezekĩelĩ 45

¹Kandi omugulu mukagaba esyombibi omwʼigereka busana nʼomwandu, mwasyaha erĩgabo oko Mwami Mukulu, erĩgabo lĩbũyĩrĩre lyʼekitaka. Obuli bwakyo bwasyabya obuli bwʼemetere 12,955, nʼobugali bwalyo bwasyabya metere 5,182. Lyasyabya lĩbũyĩrĩre oko mitano yalyo yosĩ oko mbande syosĩ.

²Umwʼekyo hasyabya busana nʼomwanya wʼahabũyĩrĩre obuli bwʼemetere 259 nʼemetere 259 wʼobugali, ihalingirirene, nʼemetere 26 busana nʼomwanya buyira bwago oko mbande syosĩ.

³Nʼoko lulengo olũ wasyalenga obuli bwʼemetere 12,955, nʼobugali bwʼemetere 5,782. Nʼomwisi wakyo hasyabya ahabũyĩrĩre, ahabũyĩrĩre kutsibu.

⁴Kyasyabya erĩgabo lyʼekitaka erĩbũyĩrĩre. Kyasyabya busana nʼabahererĩ, abakolĩ bʼahabũyĩrĩre, abakahĩka hakũhĩ nʼerikolera Omwami Mukulu. Kandi lyasyabya busana nʼamanyũmba wabo, nʼomwanya abũyĩrĩre busana nʼahabũyĩrĩre.

⁵Nʼomwanya wʼobuli bwʼemetere 12,955, nʼobugali bwʼemetere 5,782 asyabya busana nʼAbalawĩ, abakolĩ bʼomo nyũmba, na busana nʼemĩyĩ yʼenzĩgalya yabo, busana nʼerĩĩkalamo.

⁶Kandi mwasyaha omũyĩ enzĩgalya yʼomwanya obugali bwago metere 2,591, nʼobuli bwago ni metere 12,955, oko mũsĩke wʼengabo lyʼomwanya abũyĩrĩre. Lyasyabya busana nʼekihanda kyosĩ kya Ĩsraelĩ.

⁷Omunya-mwami asyabya nʼekitaka oko luhande luguma nʼoko lundi luhande lwʼerĩgabo lĩbũyĩrĩre nʼobũsokĩ bwʼomũyĩ, hakũhĩ nʼerĩgabo lĩbũyĩrĩre nʼembere syʼekitaka kyʼomũyĩ, oko luhande lwʼeyĩkwa erilola eyĩkwa, nʼoko luhande lwʼendata erĩlolya endata. Nʼobuli bwalo bulingirirene nʼerĩgabo liguma, erĩtsũka oko mutano wʼeyĩkwa erĩhĩka oko mutano wʼendata.

⁸Ekĩ kyasyabya kitaka kiwe, enzĩgalĩ yiwe omo Ĩsraelĩ. Neryo abanya-mwami bage sĩbendĩsyaswanũbya abandu bage. Nĩkwa basyaha ekindi kitaka ekyo oko kihanda kya Ĩsraelĩ, ngʼebihanda byabo ko biri.

⁹Omukama Iye Omwami Mukulu ati, Ĩnywe abanya-mwami ba Ĩsraelĩ, bibye bingaho. Mũlũsaye omwaga nʼerĩherya, mukole erĩbanza lyʼekwenene nʼeritunganene. Muleke erĩhũnga lyenyũ omo bandu bage, Omukama Iye Omwami Mukulu atya.

¹⁰Mwasyabya nʼekĩlo kitunganene, nʼekitiri kitunganene, nʼebatĩ itunganene.

¹¹Nʼekitiri nʼebatĩ bibye lulengo luguma, nʼebatĩ ibye kitswe kiguma kyʼomwʼĩkũmĩ kyʼehomerĩ, nʼekitiri kibye kitswe kiguma kyʼomwʼĩkũmĩ kyʼehomerĩ. Olulengo lwabyo lwasyabya ngʼehomerĩ.

¹²Nʼesekelĩ yasyabya esyogera makũmĩ abiri. Esyosekelĩ makũmĩ abiri, nʼesyosekelĩ makũmĩ abiri nʼĩtanu, nʼesyosekelĩ ĩkũmĩ nʼĩtanu, syasyabya mane nguma.

¹³Ehongo eyo mwasyahera yeyĩ: ekitswe kiguma kyʼendatu kyʼekitiri omo homerĩ nguma yʼengano. Mwasyaha ekitswe kiguma kyʼendatu kyʼekitiri omo homerĩ yʼekisusu.

¹⁴Nʼerĩgabo lyʼamagũta eryahamulawa (ye batĩ yʼamagũta), ekitswe kiguma kyʼomwʼĩkũmĩ kyʼebatĩ omo korĩ nguma (nayo nĩ batĩ ĩkũmĩ, ye homerĩ nguma, kusangwa esyobatĩ ĩkũmĩ nĩ homerĩ nguma);

¹⁵nʼembũlĩ nguma yʼekihangulo omo magana abiri aho sĩkapũlĩraya amagetsi ewa Ĩsraelĩ, busana nʼobuhere bwʼeyĩsyano, na busana nʼobuhere bwʼerĩokererya, na busana nʼamahere wʼobuholo eririhirabo, Omukama Iye Omwami Mukulu atya.

¹⁶Abandu bosĩ bʼekihugo basyaha ehongo eyĩ busana nʼomunya-mwami omo Ĩsraelĩ.

¹⁷Nʼomũbĩrĩ wʼomunya-mwami asyabya owʼeribana amahere wʼerĩokererya, nʼamahere wʼeyĩsyano yʼengano, nʼamahere wʼerĩpũlya, omo biro bikulu, nʼomo mikera mihya-mihya, nʼoko syoSabato, nʼomo biro bikulu byosĩ ebyahamulirawa ekihanda kya Ĩsraelĩ. Asyabana obuhere bwʼebibi, nʼobuhere bwʼeyĩsyano yʼengano, nʼobuhere bwʼerĩokererya, nʼamahere wʼobuholo, erihanulira ekihanda kya Ĩsraelĩ.

¹⁸Omukama Iye Omwami Mukulu ati, Oko mukera wʼerĩtsũka, nʼoko kiro kyʼerĩtsũka omukera, wasyĩmya enume ndere yʼende eyite ko kĩtĩngũ ĩwerya ahabũyĩrĩre.

¹⁹Nʼomũhererĩ asyĩmya oko musasi wʼobuhere bwʼebibi, nʼerĩhĩrago oko syonzeguliro syʼolũkyo lwʼenyũmba, nʼoko syonũnga ĩnĩ syʼomũnywa wʼekiherero, nʼoko syonzeguliro syʼolũkyo lwʼekibuga kyʼomwisi.

²⁰Nawe wasyakola utya oko kiro kyʼebirinda kyʼomukera busana nʼobuli mundu oyukatala, na busana nʼoyuli mũkĩrũ. Ko mwasyahanulira ekihanda mutya.

²¹Oko mukera wʼerĩtsũka, nʼoko kiro kyʼerĩkũmĩ nʼebini kyʼomukera, mwasyabya nʼErikiruka, eryusa lyʼebiro birinda. Obundu obute mo kihamya bwasyalibwa.

²²Nʼoko kiro ekyo, omunya-mwami asyayibanira na busana nʼabandu bosĩ bʼekihugo, enume yʼende eribya buhere bwʼebibi.

²³Nʼoko biro birinda ebyo byʼeryusa asyabana obuhere bwʼerĩokererya oko Mwami Mukulu, esyonume syʼesyonde sirinda, nʼesyombangale sirinda esite ko bĩtĩngũ obuli kiro oko biro birinda, nʼembaya nguma obuli kiro busana nʼobuhere bwʼebibi.

²⁴Kandi asyabana obuhere bwʼeyĩsyano, ekitiri kiguma busana nʼenume yʼende nʼekitiri kiguma busana nʼembangale, nʼetsũpa nguma yʼamagũta oko kitiri kiguma.

²⁵Oko mukera wʼeyirinda, nʼoko kiro kyʼerĩkũmĩ nʼebitanu kyʼomukera, omo biro bikulu, asyabanabyo atya ebiro birinda, ngʼobuhere bwʼebibi ko buli, ngʼobuhere bwʼerĩokererya ko buli, nʼobuhere bwʼeyĩsyano yʼengano ko buli, nʼamagũta ngoko ali.