Read nande Ezekĩelĩ 46 Bible Online

Ezekĩelĩ 46 - nande bible

Ezekĩelĩ 46

¹Omukama Iye Omwami Mukulu ati, Olũkyo lwʼekibuga kyʼomwisi olũkalolaya eluhande lwʼendata lwasyakingwa ebiro ndatu byʼomũbĩrĩ. Nĩkwa ekiro kyʼeSabato lwasyakingulwa, nʼoko kiro kyʼomukera muhya-muhya lwasyakingulwa.

²Omunya-mwami asyingira omo nzira yʼobũsekũ bwʼolũkyo lwʼeyĩhya, asyahangana hakũhĩ nʼenzeguliro yʼolũkyo. Neryo abahererĩ basyabana obuhere buwe bwʼerĩokererya nʼamahere wuwe wʼobuholo, naye asyaramya omo lũyĩ lwʼolũkyo neryo asyahuluka, nĩkwa olũkyo silwendisyakingwa erĩhĩka omwʼĩgolo-golo.

³Nʼabandu bʼekihugo basyaramya oko lũyĩ lwʼolũkyo olo embere syʼOmwami Mukulu oko syoSabato nʼoko mikera mihya-mihya.

⁴Nʼobuhere bwʼerĩokererya obo munya-mwami asyaherera Omwami Mukulu oko kiro kyʼeSabato bwasyabya ehyana ndatu hyʼembũlĩ ehite nʼebĩtĩngũ, nʼembangale eyite nʼekĩtĩngũ.

⁵Nʼobuhere bwʼeyĩsyano yʼengano bwasyabya kitiri kiguma haguma nʼembangale, nʼobuhere bwʼeyĩsyano yʼengano haguma nʼehyana hyʼembũlĩ bwasyabya ngoko angatoka eriha, nʼetsũpa nguma yʼamagũta oko kitiri kiguma.

⁶Nʼoko kiro kyʼomukera muhya-muhya asyahera enume ndere yʼende eyite ko katĩngũ, nʼehyana ndatu hyʼembũlĩ, nʼembangale, nasyo syasyabya esite ko bĩtĩngũ.

⁷Naye asyabana obuhere bwʼeyĩsyano yʼengano, ekitiri kiguma haguma nʼenume yʼende, nʼekitiri kiguma haguma nʼembangale, na busana nʼehyana hyʼembũlĩ ngoko angatoka, nʼetsũpa nguma yʼamagũta oko kitiri.

⁸Nʼomugulu omunya-mwami akingira, asyalaba omo nzira yʼobũsekũ bwʼolũkyo kandi iniaswahuluka omo nzira eyo.

⁹Nĩkwa omugulu abandu bʼekihugo basyahĩka embere syʼOmwami Mukulu omo biro bikulu ebyahamulawa, oyukingira omo nzira yʼolũkyo lwʼelutambi lwʼendata nʼerĩramya asyahuluka omo nzira yʼolũkyo lwʼolundi lutambi lwʼeyĩkwa. Nʼoyukingira omo nzira yʼolũkyo lwʼelutambi lwʼeyĩkwa asyahuluka omo nzira yʼolũkyo lwʼolundi lutambi lwʼendata. Sihali mundu oyo wasyasuba omo nzira yʼolũkyo olo ingiramo, nĩkwa asyahuluka nʼerigenda erĩlolya embere siwe.

¹⁰Nʼomugulu bakingira, omunya-mwami asyayamo omo katĩkatĩ kabo, nʼomugulu bakahuluka, asyahuluka.

¹¹Nʼomo biro bikulu nʼomo biro byʼeryusa ebyahanawa, obuhere bwʼeyĩsyano yʼengano bwasyabya kitiri kiguma haguma nʼenume yʼende, nʼekitiri kiguma haguma nʼembangale, na busana nʼehyana hyʼembũlĩ ngoko mundu akatoka eriha, nʼetsũpa yʼamagũta oko kitiri kiguma.

¹²Nʼomugulu omunya-mwami akabana obuhere bwʼerĩhĩtya, nʼobuhere bwʼerĩokererya, kutse amahere wʼobuholo ngʼobuhere bwʼerĩhĩtya oko Mwami Mukulu, omundu asyamukingulira, olũkyo olũkalolaya endata lwasyakingulwa busana naye. Naye asyabana obuhere buwe bwʼerĩokererya nʼamahere wuwe wʼobuholo ngoko akanakola oko kiro kyʼeSabato. Neryo asyahuluka, nʼolũkyo lwasyakingwa enyũma wʼerihuluka liwe.

¹³Nenyũ mwasyabana obuli kiro ekyana kyʼembũlĩ kyʼomwaka muguma ekite ko kĩtĩngũ eribya buhere bwʼerĩokererya oko Mwami Mukulu. Obuli ngyakya mwasyabanakyo.

¹⁴Kandi mwasyabana obuhere bwʼeyĩsyano yʼengano haguma nabo obuli ngyakya, ekitswe kiguma kyʼendatu kyʼekitiri, nʼekitswe kiguma kyʼebisatu kyʼetsũpa nguma yʼamagũta, erĩheherya eyĩsyano eyĩnogĩre. Obuhere bwʼeyĩsyano yʼengano oko Mwami Mukulu ebiro byosĩ omwʼihamula eritendisyahwa.

¹⁵Litya basyabana ekyana kyʼembũlĩ batya, nʼobuhere bwʼeyĩsyano, nʼamagũta, obuli ngyakya, eribya buhere bwʼerĩokererya obutyusa.

¹⁶Omukama Iye Omwami Mukulu akabũga ati, Omunya-mwami amaha olũsũnzo oko muguma wʼoko bagala buwe, omo mwandu wuwe, lwasyabya lwʼabagala buwe. Nĩ nzĩgalya yabo oko mwandu.

¹⁷Nĩkwa amaha olũsũnzo lwʼomwandu wuwe oko muguma wʼabagombe buwe, lwasyabya luwe erĩhĩka oko mwaka wʼobwĩranda. Nʼoko mugulu oyo lwasyasuba oko munyamwami. Omwandu wuwe asyabya busana nʼabagala buwe basa. Asyabya wabo.

¹⁸Kandi omunya-mwami sĩendĩsyasyĩmya oko mwandu wʼabandu, erihigabo omo nzĩgalya yabo. Asyaha abagala buwe omwandu omo bũsokĩ buwe, abandu bage sibapanzawe omundu oko nzĩgalya yiwe.

¹⁹Neryo mwanyĩlabya omo bwingiriro, obwabya hakũhĩ nʼolũkyo, erĩhĩka omo byumba bĩbũyĩrĩre byʼabahererĩ, ebĩlolĩrye ebwanga bwʼelutambi lwʼendata, neryo lebaya, habya omwanya oko luhande lwʼenyũma olũlolĩrye eyĩkwa.

²⁰Neryo mwambwira ati, Hano hʼabahereri basyahũka obuhere bwʼolubanza nʼobuhere bwʼebibi, nʼaho basyokya obuhere bwʼeyĩsyano yʼengano, isibaletago eyĩhya omo kibuga kyʼeyĩhya erĩlabya obũbũyĩrĩre oko bandu.

²¹Neryo mwanyĩhũlũkya omo kibuga kyʼeyĩhya, mwanyĩlabya oko syongonde ĩnĩ syʼekibuga. Neryo lebaya, omo buli ngonde yʼekibuga ihali kindi kibuga kyike.

²²Nʼomo ngonde ĩnĩ syʼekibuga habya ebibuga ĩbĩtĩmbĩre. Obuli bwabyo ini metere 21 nʼobugali bwabyo ini metere 16. Ebĩ bini omo syongonde byabya lulengo luguma.

²³Kandi habya ekĩyĩte ekĩtĩmbĩre kubyo kyʼamatafalĩ, ĩkĩtĩmbĩre oko bini byosĩ, nʼahʼerĩhũka mohakwikwa eyĩkwa oko milondo yʼekĩyĩte oko mbande syosĩ.

²⁴Neryo mwambwira ati, Eyĩ ni myanya yʼerĩhũkamo, aho abakolĩ bʼenyũmba basyahũkĩra abandu esyohongo syabo.