Read nande Ezekĩelĩ 5 Bible Online

Ezekĩelĩ 5 - nande bible

Ezekĩelĩ 5

¹Nawe, omugala wʼomundu, ũyĩmĩraye omũyalĩ owatwĩre. Ngʼolugembe lwʼomũsĩsĩ wasyayĩmĩryago, wasyakĩryago oko mutwe wawe nʼoko nderũ syawe. Neryo wĩmaye ekĩlo busana nʼerirenga nʼerigaba esyonzwiri.

²Ekitswe kyʼebisatu wasyahĩsyakyo omo muliro omo katĩkatĩ kʼomũyĩ, omugulu ebiro byʼeribambirako byabibererera. Kandi wasyĩmya ekitswe kyʼebisatu, nʼerĩswĩrya omo mũyalĩ oko mbande syosĩ syago, nʼekitswe kyʼebisatu wasyapanzakyo omwʼihunga, nage nasyakula omũyalĩ enyũma kubo.

³Nawe wasyĩmya hike kusyo nʼerisengasyo omo mukuyiro wʼesyongimba syawe.

⁴Nʼũkwʼesĩ wasyĩmya kusyo kandi, nʼerigusasyo omo muliro, nʼerĩhĩsĩrĩryasyo omo muliro. Nʼerĩlũa musyo omuliro asyahuluka nʼerĩhĩka oko kihanda kyosĩ kya Ĩsraelĩ.

⁵Omukama Iye Omwami Mukulu ati, Eyĩ nĩ Yerũsalema. Nabĩrĩhĩrago omo katĩkatĩ kʼebihanda, nʼebihugo ebĩtĩmbĩre kugo.

⁶Nĩkwa abirihona oko bilayiro byage erikola ebibi kwilaba ebihanda, nʼerihona oko migambo yage kwilaba ebihugo ebĩtĩmbĩreko. Kusangwa babirigana ebilayiro byage, kandi emigambo yage sibetakwamayo.

⁷Busana nʼekyo, Omukama Iye Omwami Mukulu ati, Kusangwa muli nʼomwaga kwilaba ebihanda ebĩbatĩmbĩreko isimwetalendera omo migambo yage, kutse eribika ebilayiro byage, kutse erikola ebilayiro byʼebihanda ebĩbatĩmbĩreko;

⁸busana nʼekyo, Omukama Iye Omwami Mukulu ati, Lebaya, ĩngye, nĩna ngye, ngalwa nawe. Nasyahĩra eritswera omo katĩkatĩ kawe omo meso wʼebihanda.

⁹Kandi nasyakukolera ekyo ndakukolera kera, kandi sindiendisyaswakola ekiri ngʼekyo, busana nʼesyonye syawe yosĩ.

¹⁰Busana nʼekyo abĩse basyalira abagala omo katĩkatĩ kawe, nʼabagala basyalya abĩse wabo. Nage nasyahĩra eritswera ukʼuwe, nʼamasĩgalira wawe gosĩ nasyapanzago oko mahunga gosĩ.

¹¹Omukama Iye Omwami Mukulu ati, Ngoko nyiriho, kwenene, kusangwa wabĩrĩhalya ahabũyĩrĩre hage omo syosanamu syawe esyo ngagalirawako, nʼomo syonye syawe syosĩ, neryo nasyakũlũako, kutse erĩso lyage siryendĩsyakũbalya, kandi Sindiendisyaganyira.

¹²Ekitswe kiguma kyʼebisatu kyawe kyasyahola omo ndwala yʼakasũsũ, nʼomo nzala basyaherĩbwa omo katĩkatĩ kawe, nʼekitswe kiguma kyʼebisatu kyasyawa omo mũyalĩ oko mbande syosĩ, nʼekitswe kiguma kyʼebisatu nasyapanzirakyo oko mahunga gosĩ, kandi nasyakula omũyalĩ enyũma wabo.

¹³Erihitana lyage lyasyahĩkerera litya, kandi nasyũgũtya erihitana lyage lyo kubo, kandi nasyakĩranĩbwa. Nabo basyaminya ĩngye kwʼindi Mwami Mukulu, nabĩrĩbũga omo mũhwa wage, omugulu nabĩrĩhĩkererya erihitana lyage lyo kubo.

¹⁴Nʼakandi nasyakuyira mo kĩma nʼekĩtsũmĩ omo katĩkatĩ kʼebihanda ebĩkũtĩmbĩreko, omo meso wʼabosĩ abakalaba.

¹⁵Litya kyasyabya kĩtsũmĩ nʼerĩsekererya, erĩkangĩrĩrya ehee! nʼekindu kyʼenye kyʼeriswekera oko bihanda ebĩkũtĩmbĩreko, omugulu nasyahĩra eritswera ukʼuwe omwʼihitana nʼeriagalirwa, nʼomwʼikunga lyʼerihitana. Ĩngye, Mwami Mukulu nabĩrĩbũga.

¹⁶Omugulu nasyatuma kubo emisoha yʼerĩholya yʼenzala, eyikabya busana nʼerĩherya abandu abo nasyatuma busana nʼerĩbaherya. Kandi nasyakũkanyĩrĩrya kwʼenzala, kandi nasyalũsyaho obundu bwenyũ.

¹⁷Kandi nasyabatuma kwʼenzala nʼesyonyama syʼomolĩ nasyo syasyakuyira mo mũkwĩrwa. Nʼendwala yʼakasũsũ nʼomusasi byasyakũhĩkako, kandi nasyakuleta kʼomũyalĩ. Ĩngye, Mwami Mukulu, nabĩrĩbũga.